Fort Lauderdale,
Florida, U.S.A.
Lé 10 d'janvyi, 1981.
Moussieu l'Rédacteu,
J'ai ieu la chance, chutte sémaine. J'ai r'chu la gâzette dé Jèrri du huit dé novembre, 1980. V'là tchi m'rappréche dé l'Île, man bouanhomme! J'n'avais pon veu eune gâzette dé Jèrri dépis qué j'lé tchittis d'vîngt-tch'ieune d'octobre dé l'année pâssée.
La preunmié chose tchi m'a frappé en ouvrant chutte gâzette est l'annonce qu' un “immigrant civil servant” peut faithe douze mille louis sus la vente d'eune maîson auprès seulement deux ans et d'mi d'otchupâtion. Né v'là chein qu' l'Île a à supporter par embaûchi d's êtrangièrs à travailli pour L's Êtats. Eune louai tchi pèrmet d'ité a grand bésoin d'êt' changie au pus vite. Ch'n'est pon comme si lé “civil servant” en tchestchion n'était pon bein payi par lé gouvèrnément d'l'Île pour ses sèrvices. Ch'est seux tch'il a 'té bein recompense et qu'un Jèrriais éthait 'té bein content d'pouver en gângni autant.
En liêsant la gâzette, j'vai qué l'union des maîtres et maitrêsses d'êcole annonce qué ses rélâtions auve lé Départément d'Êducâtion sont déplorabl'yes. Ch'est entouôrre eune offre dé dgiex-huit du chent d'gages dé pus. Chein tch'est vraînment déplorabl'ye, à m'n idée, est tch'i' faut êt' membre d'union pour gângni sa vie. Quandtchi qu' la gourmandise pour les sou s'en va tchitter? Où'est tch'est l'temps qu' les Jèrriais 'taient contents d'lus sort et heutheux, et disciplinnés sans y'êt' forchis?
Pâlant d'disciplinne mé ramémouaithe qué quand j'tais en visite en Russie, y'avait eune femme (eune Angliaîche) dans nouot' groupe dé touristes tchi d'mandait tréjous des tchestchions împèrtinentes ès dgides tchi nouos prom'naient partout. J'tions à Moscou, et ch'tait un janne homme Russe tch'était dgide. Chutte femme-là lî d'mandit: “Tch'est qu' ou faites, en Russie, des êlèves tchi tchittent vouos êcoles s'gondaithes ou l's univèrsités d'vant aver finni lus êducâtion?” “J'n'en avons pon!”, lé dgide lî dît. “Mais si, ou-s-en avaient!”, ou lî dît. “Touos les pays en ont. I' l's appellent des “drop-outs” en Améthique”. “Eh bein,” l'dgide” lî dît, “en Russie, j'crions qu' ch'est eune honneu d'travailli et d'apprendre. Nouot' gouvèrnément nouos donne eune êducâtion dépis l'êcole élémentaithe jusqu'à l'univèrsité, pour rein, et si tchique êlève est îngrat et bête assez d'abandonner ses clâsses et tchitter l'êcole dévant la fîn d'ses êtudes, j'l'envions en Sibérie!”
Jé n'veurs pon vouos donner l'împression qué j'sis en faveur dé tout chein tchi s'pâsse en Russie, et j'n'ai autcheune idée d'êt' communiste. J'sis trop vièr consèrvateur pour chenn'na. Mais j'admithais la discplinne et la trantchilité qué j'viyais partout. Et acouo pus à ch't heu quand j'pense ès vols et meurtres tchi s'pâssent en Améthique, et l'fait qué la gâzette “Sun Sentinel” d'ichîn, du 9 dé janvri, 1981, nouos dit tch'i' y'iut 529 meutres en Galles et l'Angliétèrre duthant mil neu chent huiptante. Et ch'n'est rein à compather au nombre d'meurtres en Améthique. I' y'en eut pus d'mille à New York seulement dans l'année.
Eune chose tchi fait pliaîsi à liéthe dans la gâzette est quand nou vait tch'i' y'a acouo des Jèrriais tch'ont travailli pour le même maîson d'conmerce pour bein d's années. Par exempl'ye, lé Sieur “Gerry” de Louche, chînquante dans lé “Jersey Gas Co.” Et les sieurs Harold de Gruchy et Fraînque Thérin et Madanme Grace Shepstone chent douze ans entre les trais pour la boulanguethie L'Brun. Et l'Sieur David George Le Riche, chînquante-quatre ans dans la boulanguethie Gaudîn. Ch'est typique des viers Jèrriais tch'ont tréjous adopté l'prîncipe dé loyauté ès cheins tchi lus ont donné du travas. Et y'a d's exempl'yes d'même dans la gâzette toutes les s'maines.
V'là tchi montre qué chein qu'nou-s-apprannait dans la Litourgie à l'Êcole du Dînmanche quand nou 'tait mousse - tchi faut êt' content d'san sort et faithe san d'vai dans l'êtat tch'il a pliut au Bouan Dgieu d'vouos appeler - est un avis solide et profitabl'ye.
J'vai tch'i' y'a acouo tchestchion d'inonder la belle vallée mênommée “Queen's Valley” pour fourni acouo pus dg'ieau pour lé tourisme. I' faut admither et souot'nîn, et r'mèrcier en même temps, l'Député Helen Baker et l'Avocat Richard Falle pour aver travailli si dû pour consèrver la vallée et l'empêchi d'êt' dêtruite pour tout janmais. Et j'espéthe tch'i' y'a acouo assez d'Jèrriais d'restant en Jèrri pour les supporter comme i' faut.
George d'La Forge
Viyiz étout: