Fort Lauderdale, Florida,
U.S.A.
Lé 8 de mar, 1975.
Moussieu l'Rédacteu,
V'la tchi m'fait grand pliaîsi d'féliciter Moussieu Peter Crill à l'occâsion dé s'n assèrmentâtion comme Député Bailli, eune nouvelle qué j'veins d'vaie dans la gâzette du 23 d'janvyi tchi veint d'arriver. La cheinne du 16 janvyi n'est pon 'couo v'nue, mais ch'là n'm'êtonne pon. Les gâzettes arrivent pûtôt à Dgi-l'adèrt dépis qué l'sèrvice des postes a 'té modèrnîsé.
Lé portrait du spectacl'ye dans la Cour Rouoyale pour l'assèrmentâtion d'Moussieu l'Bailli Ereaut est mangnifique. I' m'ramémouaithe que j'jeus l'honneur d'êt' présent à la mème occâsion quand Messire Robert Le Masuthi fut assèrmenté y'a eune douzaine d'années - sénon qu'à ch't' occâsion-là i' n'y avait pon d'femmes Avocates et chutte fais y'en a deux. J'dis "Avocates" mais jé n'sai pon si l'mot Avocat peut êt' féminîsé. I' faudra qu'jé d'mande à Moussieu Bétchet, mén homme d'affaithes, quand j'îthai en Jèrri. J'vai tch'i' y'a un bieau portrait d'li dans la gâzette étout, a donner un superbe présent en argent à Messire Robert Le Masuthi.
Oulle en est plieine, de bieaux portraits, la gâzette. Eune bouanne chose pour les Jèrriais en exil. Lé chein d'Moussieu Crill et sa danme et sa fanmil'ye est mangnifique. J'tais bein content d'vaie que Madanme Crill, sa m'mèe, à Moussieu Crill, 'tait dans la Cour à l'vaie prendre sèrment. Ch'est seux qu'san p'pèe éthait 'té bein ordgilleux s'il avait vêtchu longtemps assez pour vaie san fis Député Bailli d'l'Île. Ché s'sa mangnifique dé ouï sa forte vouaix dans la Cour et dans la Chambre d's Êtats, et i' s'en va apporter du paids à sa chèrge împortante. En pâlant d'san p'pèe, j'm'èrsouveins comme si ch'tait aniet quand i' s'en fut à New York pour sé mathier. J'tais clèrcot dans La Rue des Trais Pigeons dans l'temps, et j'tions tous êmèrvilyis à la pensée d'pouver aller en Améthique et d'sé mathier en mème temps! Lé portrait d'la procêssion en c'mîn pour l'églyise est mangnifique étout. J'peux mème èrconnaître lé Juge de Faye quâsi à la tête des Juges. J'pense bein que l'Juge en tête à san tout seu est lé Lieut'nant Bailli Pallot.
J'mé d'mande tch'est tchi rempliaiche lé Sénateu Krichefski, mais i' faut qu'j'attenge l'arrivée d'la gâzette tchi m'donn'na l'înformâtion. J'vai tch'i' y'avait trais candidats. Les Députés Riley et Binnington ont prouvé lus valeu dans l's Êtats et l'Sieur Buêné a d'l'ambition si n'a pon d'expéthience politique, mais d'pis qué l'Révérend Moussieu Manton a signé san papi d'nominnâtion i' dait êt' un homme dîngne, et j'aspithe à vaie l'rêsultat d'l'êlection.
Y'a tant d'expèrts en Jèrri à ch't heu qué j'mé d'mande s'i' y'a tchique sorte d'travas tchi n'est pon spécialîsé et souos la direction dé tchique Angliais à haut gages. Par exempl'ye, les officièrs pour lé soin d's êfants dans l'Départément d'Êducâtion. Tch'est qu'ch'là veurt dithe? Quand j'tais mousse en Jèrri, nou-s-allait à l'êcole pour apprendre - pas pour êt' souangnis autrément qu'la disciplinne tchi souangnait d'nouos garder en ordre. S'i' fallait êt' souangnis pour maladie nou restait siez sé. Ch'tait la responsabilité des pathents.
Et tchi catastrophe pour l'Île! Iun d'ches expèrts en educâtion s'en allait tchitter l'Île viyant tch'i' n'tait pon satisfait d'la maîson louée pour li au Hocq. J'vai qu'les gages pour un homme dé mème sont entre trais mille huit chent louis et quat' mille. Sapresti! Est-ch' ravissant qu'la bureaucratie couôte tant en Jèrri? J'soulions aver toute l'êducâtion "physique" tchi nouos fallait à l'Êcole Wesleyenne à St. Ouën y'a quâsi huiptante ans en jouant ès Barres, au Tireli et à Saute Mouton! Les mousses d'à ch't heu ont pus bésoin d'un copeux dé j'veux et un co-d'pid au driéthe dé temps en temps pour les endueurchi qu'un moussieu tchi couôte dans les quat' mille louis par an à l'Île pour les garder en êtat robuste. Mais j'sai bein qu'un tas d'vouos lecteurs s'en vont dithe qué jé r'dotte!
Un aut' expèrt mentionné dans la gâzette est appathemment touoilli parmi les rélations commèrciales. J'sis trop bête pour pouver m'înmaginner tch'est qué l'titre du moussieu veurt dithe, mais quand la Chambre des Êcrivains n'est pon dé s'n avis v'la tchi m'fait penser qué l's Êcrivains peuvent faithe chein tch'il est à faithe - et probabliément l'faithe mus et en mème temps sauver un tas d'sou à l'Île! Pourtchi tant d'expèrts à hauts gages en Jèrri? V'la tchi veurt-i' dithe qué les Jèrriais n'ont pus dé p'tits boudîns dans la tête?
George d'La Forge
Jersey Evening Post 2/4/1975
Viyiz étout: