Trenton, Michigan,
U.S.A.
Lé 6 d'mai, 1967,
Moussieu l'Rédacteu,
L's êcrituthes dé Meridian m'ont tréjous donné hardi d'pliaîsi à liéthe, et ses r'mèrques sus l's êvénements du jour sont à point et à propos. Mais i' n'mé fait pon grand pliaîsi quand i' pâle dé St Ouen's Pond à la pliaiche dé La Mathe au Seigneu dans la gâzette du 23 d'mar. Ch'est un si bieau nom, La Mathe au Seigneu, et La Mathe a donné san nom au vaîsinné. Pourtchi changi un bieau nom d'même à Pond? J'pense bein tch'i' faut s'attendre qué iun d'ches jours nou ouitha pâler dé Pond Valley à la pliaiche du Val d'La Mathe!
Ch'est comme La Route des Mielles. Pourtchi changi l'nom à Five Mile Road? Ou' n'a même pon chîn' milles dé long! Et L'Etacq Hill? Létché des trais tchi mènent à L'Êta, et tch'ont tous des noms Jèrriais d'ancienneté? Ch'est si danmage dé vaie les vièrs noms Jèrriais dispathaître. Et pis, ch'est tch'i' n'sont pon rempliaichis par autcheune chose dé bé! Si l'affaithe continnue, l's êfants Jèrriais nés à ch't heu n'connaîtréthont janmais la langue de lus anchêtres ni les vrais noms des routes dé lus île natale!
Dans ma lettre du drein jour dé l'année passée, j'mentionnis qué 1967 vèrrait p't êt' eune tonnelle pèrchie souos l'Mont d'La Ville, et l'arrivée d'avions à réaction tchi ne f'thont pon d'brit. J'n'en n'tais p't êt' pon bein liain, car j'vai dans la gâzette du 23 d'mar tch'i' y'a pâlement d'aver eune tonnelle d'ichîn 1970! L'affaithe est p't êt' même décidée à ch't heu - dépis qu'oulle 'tait pour êt' soumînse ès Êtats lé quatre d'avri - mais i' prend trais ou quat' sémaines pour les gâzettes à v'nîn d'Jèrri en Améthique, et v'la tchi m'met tréjous en r'tard auve les nouvelles. Quant à mé, j'mé d'mandé si l'marchi en vaut le chandelle. La dêpense d'un d'mié-million d'louis n'est pon d'la p'tite biéthe pour Jèrri, et l'affaithe finni tréjous pouor couôter bein pus qu'l'apèrchu. Dans des temps l'apèrchu est même érdoublié! Sans doute, y'éthait mouoyen d'en èrtchilyi du r'vénu en faisant les motoristes payi eune somme tchelconque pour passer l'travèrs. J'avons des grand' routes ichin (Turnpikes ou Toll Highways en Angliais) tch'i' faut payi pour les faithe sèrvi, et nou paie d'bouan tchśu viyant qu'nou sauve hardi d'temps et tch'i' y'a mains d'dangi d'accidents. I' faut avouer qué ch'n'est pon tout profit. I' faut payi des fonctionnaithes pour èrchéver les sou à l'entrée ou à la sortie, et i' faut garder des comptes et agrandi l'troupé d'bureaucrates dé ville! Pour dé mé, jé n'crai pon que j'la f'thai sèrvi fort. Quand j'vais dans l'Êst, ch'est pour visiter l'Député de Veullle à Gouôrray, ou m'n anmîn Edgar Rive à St Cliément, et j'aime mus aller par les campangnes qué d'aver à combattre lé trafi entre Bieaumont et la ville!
Quant à la tchestchion d'avions à réaction, ch'est vrai tch'i font du brit. Nou y'est si accouôteunmés ichîn qu'nou n'y prend pon d'avis, ouaithe qué j'liêsais un cas dans la gâzette ou'est qu'un homme a r'chu compensation viyant qué l'brit avait tellement ênèrvé san tchian tch'il en avait perdu l'championnat gangni l's années dé d'vant! I' pathaît qu'les fèrmièrs d'ichîn ont pèrdu couôthage d'êprouver à r'chéver compensation viyant qu'lus vaques et bêtes à saie ont touanné touothâtres par la peux à cause du brit. Les compangnies d'aviation démandent tant d'détails en rêponse à la r'cliâme, qué l'férmyi en veint enn'yé. I' veulent saver l'heuthe exact qué l'avion volit par dessus la fèrme, tchi sorte d'avion qué ch'tait - y'en eut même iun tchi fut d'mandé d'donner l'nunmétho d'l'avion!
I' faut tout d'même avouer qu'les St Pièrrais ont raison d'lus pliaindre. Lé brit est d'autant pus sévéthe pour ieux viyant qué l'avion n'a pon ieu assez d'distance pour gangni un tas d'altitude dévant passer en d'ssus d'lus maîsons en dêcollant, et i' faut tch'i' d'vaie prèsqu'en d'ssus du lief en attèrissant. Ichîn, l's aérodromes sont tréjous un but des villes. J'mé sis souvent d'mandé pour tch'est que l'camp d'aviation en Jèrri n'a pon té êtablyi es Landes à St Ouen ou'est tch'i' y'a tout plein d'run, et tch'i' n'éthait pon té nécessaithe d'acater un tas d'propriêtés à un prix fo chaque fais tch'i' faut l'agrandi! J'vais dans la gâzette qu'un St Pièrrais est d'la même idée, ouaithe qué s'n idée qué l's avions pouorraient prendre vol et arriver tréjous par dessus la mé est tchestchionnabl'ye. I' faut qu'un avion prange l'air et attèrisse lé nez dans l'vent - et les vents changent!
Félicitations au Sieur Fraînque Le Maistre pour aver 'té êlu Membre d'Honneu dans La Sociêté Jersiaise, un honneu bein méthité. San dictionnaithe méthite touos l's honneurs tchi s'en vont li êt' accordés à m'suthe qué les savants s'en vont l'vaie et l'êtudier, mais à part du dictionnaithe i' méthitait l'honneu pour ses longues années d'travas pour la Sociêté, et l'organisation du Musée d'Agritchultuthe. Ch'est un bouan portrait d'li tch'est dans la gâzette chutte fais - d'habitude ses portraits n'lî font pon justice!
George d'La Forge
Viyiz étout: