Eh bein, garçons, chute semaine j'ai une histouaithe à vos raconter
Eh bein, garçons, chute semaine j'ai une histouaithe à vos raconter, mais pour des raisons spéciales i' faut que je change un mio les noms des personnes qui sont concernées dans l'aventuthe. Je n'peux pas vos dithe nittou dans tchi pâraisse qu'i d'meuthent, car i' y-en aithait parmi vous qui d'vin'naient lus indentité et v'là tchi pouorrait m'ner à des complications.
I' y-a tréis campagnards bein connus de touos vous, que j'apel'lons pour le moment Tom, Ph'lippe et Amice qu'ont 'tai tout l'hivé passé diversément intérêssis dans la gamme de football, et presque toutes les feis qu'i y-avait un match de tchique sorte sus l'Mont-ès-Pendus, i' mênageaient sus tchique sens de s'y trouver.
Mais i' fallait chaque feis inventer une exchuse pour embliûter lus femmes (car i' sont touos les treis mathiés), et lus missices lus en aithaient donné ieux des football s'illes avaient seu qu'ils 'taient à perdre lus temps là-haut.
A ouï nos garçons pâler, chein qu'i' n'savaient pas entouor la gamme ne valait pas a peine de saver, ils 'taient tout à fait experts là-d'dans ieux.
Bein souvent en critichant un match i' vos disaient carrément que l'referee était un imbécile, car autrement il aithait seu que Snatcher Muggins était off-side quand i' fit le deuxième goal.
Ch'tait bein amusant ettou de les ouï dischuter la composition du team qui devthait aller en Djernési jouer pour le Muratti.
Selon ieux, les membres du 'Selection Committee' étaient un tas d'achocres et n'savaient bein seux pas comment chouaisi lus hommes.
Amice trouvait li que 'Crack-ankle Jim' éthait deu y jouer, car i' pouvait êbréhagni une demié-douzaine de Djernésiais dans chinq minutes. Tom n'y-éthait pas envié auchun de ches half-backs là. Il en connaissait treis, li qui valaient bein mus qu'ieux, mais comme i' disait: Tch'est qu'ou voulez, ch'est justement comme à nos shows d'bestiaux, i' y-a des partialités là-d'dans.
Ph'lippe, li, au contraithe, n'avait rain à dithe quant ès backs et halfbacks mais selon s'n opinion ch'tait les forwards qu'étaient tout à fait mal assortis.
Slipper Charlie couothait assez bein s'ou voulez, mais i' n'savait jamais quantchi passer la balle à ses parchionniers. I' la gardait tréjous trop longtemps et touos ses efforts n'abuttaient à rain.
Quant à Bull's Eye Billy, il 'tait tout à fait mal nommé, ch'tis-là, car souvent quand il avait l'goal tout à fait ouvert en d'vant d'li, i' co'd'pisait la balle eune perque à côté ou bein vingt pids en d'sus.
* * *
Comme chenna, ou verrez que nouos treis garçons étaient convaintchus que ch'tait tout à fait un failli team qui s'en allait en djernési pour tâchi d'rapporter la coupe.
Mais malgré ch'la, i' brulaient d'enpie d'y-aller ettou, mais i' savaient bein que ch'tait inutile d'en pâler un mot à la maison à cause que les femmes aithaient fait du potin, alors avec bein d'la gronn'nie i' lus décidithent de r'nonchi l'entreprinse.
Si ch'avait tai en Jêrri oquo!
Mais v'là-t-i' pas que Mardi matin, Amice vit sus l'Morning News qu'un baté spécial était pour sorti d'ichin à une heuthe et d'mie Jeudi l'arlevaie et r'sortait d'Djernési à sept heuthes et d'mie du sé.
I' s'mint à ruminer là-d'sus à san tout seu et tout d'un coup i' vint une idée. V'là justement notre affaithe!
Dans un clyin d'yi i' sauti à cherchi Tom et les v'lo touos les deux aller trouver Ph'lippe. I' s'enfrumirent dans l'prinseu pour n'être pas disteurbés, et ch'est là qu'i' firent lus compliot.
Amice dit: I' y-a moyen d'y-aller sans que personne de nos gens en sache rain.
Mais à qu'menchi, Ph'lippe ne voulit pas en ouï pâler.
- J'n'ose pas y ristchi, qu'i dit, ou savez bein touos les deux tch'est qu'ch'est qu'ma bouannefemme, alors ou pouvez bein vos imaginer, si jamais ou v'nait à l'saver, si ch'est qu'y-en aishait du feu d'satchi.
- Bah, bah! s'fit Amice, j'ai fait touos les plians, mé, êcoute. Jeudi matin, dit à tes gens que tu t'en vas en ville tout d'suite oprès dîné pour faithe féther ta jument, i' n'se dout'tont pas d'rein.
Tom et mé, j'te trouvethons au carrefour, par accident sans doute.
Tom es'sa hors, li, pour tâchi d'trouver un ouaisé qui lis dait d'la rente et qu'a changi d'adresse, et mé je m'en vais passer m'n arlévaie en ville a péyi deustrais p'tits comptes, etc. Quand à ma missice, oulle a une telle confiance en mé, que j'peux l'enjôler comme je veurs, ou crait tout chein que j'lis dit.
Le pouore Ph'lippe raîponnit là-d'sus: J'voudrais qu'la mainne es'sait d'même, mé!
* * *
Enfin, oprès avé ardgumenté pour une démi-heuthe, i' fut décidé que che s'sait d'même.
Ph'lippe prendrait sa vainne et la mettrait ès êtables avc les instructions d'envier la jument à la forge, nou prendrait baté pour Djernési, nou verrait l'Muratti et pis nou s'en r'veindrait à la maison aussitôt dêbertchis l'sé.
Quant à la tchestcion des exchuses pour ervénin si tard, Amice dit qu'i' n'fallait pas s'embêté la tête de chenna acheteu.
La principale chose ch'tait d'vaie l'match, et pis i' s'sait temps assez en s'en r'venant de r'formuler tchique autre histouaithe.
* * *
Jeudi au dîner don vit nos treis garçons dans la vainne à Ph'lippe en route pour la ville et à une heuthe et d'mie ils 'taient à bord de l'Alberta.
Ph'lippe, qui r'grettait de s'être lanchi dans ch't'entreprinse-là était blianc comme une chique,mais les deux autres étaient tout à fait à lus aise et heutheurs comme des pinchons.
A bord, i' rencontrirent un grand nombre de lus connaissances et i' fallit acheteu les mettre sus lus gardes de n'pas dithe mot à la r'venue.
Enfin ils arrivirent en Djernési et s'en furent vaie chu match. Ou connaissiz sans doute le résultat.
Ph'lippe fut un mio malade d'la mé en s'en r'venant, mais i' se r'butti en passant le Breakwater et d'mandit à Amice: Tch'est qu'j'allons dithe à nos femmes?
Et l'autre lis raîponnit: Ecoute bein man vi, chein que j'm'en vais t'dithe. V'chin justement chein qui s'est arrivé. Ch't arlévaie quand tu-es v'nue à lier la jument pour t'en aller à la maison, tu t'es aperchu qu'ou cliopinait tout bas. L'imbécile de forgeux li-avait cachi un clio dans l'pid.
Il a fallu dêlier et la faithe dêféther et le vétérinaithe t'a dit que pour la djéthi comme i' faut qu'i fallait la garder en ville avec san pid dans une toubée d'iau caude pour siex heuthes de temps. T'n arlévaie et ta séthée lus sont passées à tender ta jument, Tom et mé, ne voulant pas te laissi tout seu dans t'n embarras, j'avons resté à t'aidge et pis v'là!
Comme i' vos racontait chenna, le pouore Ph'lippe le r'gardait tout êtonné et était quâsiment convaintchu li-même que ch'tait la véthité, l'autre vos disait tout chenna si naturellement. I' l'print par la main et lis dit: Amice man garçon, tu es un phénomène. Ah! comme je voudrais aver une imagination comme la tchienne!
* * *
Il 'tait passé onze heuthes quand ils arrivithent au carrefour. Tout l'vaisinné était sus pid et l'téléphone avait marchi toute la séthée sans auchun rêsultat. Les treis femmes étaient au m'sespé et des qu'i virent la vainne i' criyirent toutes ensemble: Mes pouores garçons! Mais de ouais qu'ou v'nez à ches heuthes ichin?
Ph'lippe toussit une feis ou deux et pis i' racontit la leçon qu'Amice li-avait si bein apprint. Amice dévallit de dans la vainne, i' fut même tâter le pid de d'vant à la jument et dit: Sais-tu bein, Ph'lippe, qu'y n'y a pas justement tant d'fièvre acheteu! Sa femme montit à côté d'li dans la vainne, les vaisins s'en r'furent siez ieux et jusqu'acheteu le pot-aux-roses n'a pas 'tai dêcouvert. Mais Ph'lippe ne pathaît pas trop à s'n aise, et sa femme dit qu'i n'a pas 'tai l'même dépis l'accident à sa jument Jeudi passé.
Nou z-en r'ouïtha peut-être pâler.
* * *
Raîponses ès Correspondants.
Jontchèt. - Si ch'est comme tu m'dit, ta biche est mal prinse et étha d'la peine à san r'dêhaller. Je n'veurs pas posé comme vétérinaithe, mais à ta pliaiche je lis don'nais un morcé d'ricolisse touos les matins pour arrêter sa toux et je lis fich'chais un empliâtre de moutarde sus l'estouma.
Caouain
La Chronique de Jersey 25/4/1914
Viyiz étout: