San Antonio, Texas,
U.S.A.
Lé 13 dé févri, 1971.
Moussieu l'Rédacteu,
Jé n'sai pon tch'est tch'i' y'a d'mal auve les sèrvices des postes. Ch'est seux tch'i' y'en a, car j'veins d'èrchéver trais Jersey Weekly Posts quâsi en mème temps - la cheine du 17 dézembre preunmièthement - et pis les cheinnes du 10 et du 24 dézembre en mème temps! I' m'sembl'ye aver ouï pâler d'eune grève des travailleurs dé la poste en Angliétèrre, mais j'n'en ai veu rein dans les gâzettes ichîn en Améthique, et ch'est p't êt' là la raison pour lé r'térgément des livraisons - prîncipalement les livraisons dé deuxième classe.
Comme j'l'ai mentionné d'vant, ch'est tréjous grand' fête pour mé d'èrchéver des gâzettes dé Jèrri et d'pouver vaie tch'est tch'i' s'y passe quand j'n'y sis pon! J'tais intérêssi d'liéthe, dans les discours des Membres d's Êtats à l'occâsion des distchusions au sujet d' L'Apèrchu pour ch't année, que l'Sénateu Krichefski annoncit des dépens inattendus dans l'couothant d'la preunmiéthe année d' l'administrâtion des Postes. Jèrri a la chance que l'affaithe n'est pon piéthe qu'ou n'l'est. En Améthique, la renchiéthe sus tout, prîncipalement deue ès grèves irresponsabl'yes des travailleurs dans touos les mêtchièrs, est si considéthabl'ye tch'i' faut s'attendre qué l's apèrchus s'en vont quâsi r'doublier d'vant qu'un bâtisse, construction ou entréprînse tchelconque es'saient finnis. L'affaithe est dév'nue si mal qué l'Président Nixon a propôsé un projet d'louai au Congrès pour aboli les grèves en faveur d'arbitrâtion, mais j'liêsais dans la gâzette l'aut' sé qué v'la tchi n'avait autcheune chance dé passer, car les Démocrates - tch'ont la mâjorité dans les deux Chambres du Congrès - ont peux d'offenser les grosses têtes des sŷndicats travaillistes et d'pèrdre lus vouaix dans la préchaine êlection.
Eune chose tchi m'amuse est d'vaie qué l'Parti Communiste en Jèrri vait du bel et du bouan - et du mauvais - dans la nouvelle louai propôsée pour l'asseûthance sociale. Est-che tch'i' n'y en a pon dans touos les projets dé louai?
En ouvrant la gâzette du dgix d'dézembre, v'la tch'i' m'a fait pliaîsi d'vaie l'portrait dé m'n anmie Betty Brooke parmi l's Êcôssais. Jé n'savais dgèthe qu'oulle 'tait Êcôssaise! Ou nouos dit tch'i' sont suprèmes, les Êcôssais. Mais s'i' sont suprèmes, tch'est qu'nou peut dithe des Jèrriais? I' daivent êt' supèr suprèmes, car j'ai souvent ouï dithe, quand j'tais mousse, qué les Jèrriais 'taient pus r'gardants qué l's Êcôssais, et tch'il 'taient mème si r'gardants qué ch'tait pour ch'la tch'i' n'y avait pon fort d'Êcôssais dans l'Île! J'ai r'gret qué l'portrait d'Madanme Brooke n'est pon en long dans la gâzette, car j'éthais voulu la vaie atout san kilt. Belle pétite femme qu'oulle est, ou dait être acouo pus belle en costeunme Êcôssais, et i' faudra qué j'lî d'mande dé mett' san kilt quand j'la vèrrai en Jèrri ch't êté tchi veint!
Les docteurs d'ichîn nouos disent tch'i' faut d'l'exèrcice pour sé garder en bouanne santé, et qué l'miyeu exèrcice (prîncipalement pour des vièrs comme mé) est d'marchi les c'mîns ichîn est înviter la tchulbute par les motos tchi l's encombrent ou bein êt' asphyxiés par lé gaz d'oxyde dé carbone tch'empestiféthe l'air! V'la tchi m'ramémouaithe qué L'Île dé Sèr est à bein près la seule pliaiche grande assez qué j'connais pour pouver y faithe eune bouanne promenade à pid, et où'est qu'nou peut marchi trantchilement et en seûtheté. J'viyais qu'un membre d'la fanmile dé La Danme est en train d'êprouver à la déjutchi dé d'ssus san trône citant, entr'aut' raisons, qué mème un docteu n'peut pon faithe sèrvi un moto dans l'île. L'Illustre Danme n'a pon dé r'pos dans sa vieillèche. I' n'y a pon longtemps qu'ou voulait lyi-mème laîssi couorre et délaîssi sa grand responsabilité ès Dgèrnèsiais. À ch't occasion-là, sa popularité comme Danme dé Sèr fut si bein êtablyie qu'ou décidit d'continnuer san règne, eune décision tchi fut r'chue auve accliamâtion par les vièrs Jèrriais - et mème par des savants d'Nouormandie tchi sont fièrs dé constater qu'nouos îles sont l'seul restant d' La Nouormandie tchi n'est pon souos l'joug dé La France! Espéthons qué ses ennemîns, à La Danme, es'sont confondus, et qu'ou siêg'gea acouo sus l'siège dé sa Seigneûthie pour bein d's années.
J'viyais dans les gâzettes tch'i' n'y avait qué deux pâraisses en compétition pour la Coupe des Enfuntchis à L'Eisteddfod. Tchi danmage! Deux pâraisses sus douze! Y'a tant d'pliaîsi à faithe du théâtre qué jé n'comprends pon pourtchi qu' châque pâraisse né trouve pon assez d'pèrsonnes pour jouer eune piéche dé théâtre par an. Quand j'tais janne, j'tais dans les Dickens Players dé Teddy Boiëlle, et dans l' Green Room Club, et si les jannes pouvaient rêaliser l'pliaîsi tch'i' y'a à pratitchi et produithe les piéches dé théâtre i' sé f'thaient un d'vé d'organniser un clobe dramatique dans châque pâraisse. I' pouorraient pratitchi toute l'année et v'la tchi f'thait toute une sémaine dé Séthées Jèrriaises pour l'Eisteddfod, à san grand profit!
George d'La Forge
Viyiz étout: