Le Ménage ès Feuvres,
St. Ouën.
Lé 12 d'août, 1978.
Moussieu l'Rédacteu,
Nou vait un tas d'drôles dé choses dans les gâzettes ches jours. L'aut' sémaine, par exempl'ye, j'liêsais qué les malfaiteurs dans la prison 'taient en grève viyant tch'i' n'avaient pon assez d'laîsi pour lus ensoliyi. Peut-i' y'aver rein d'pus riditchule qué d'vaie des prisonnièrs sé mett' en grève? Et pis eune femme êcrivait un p'tit pus tard à dithe qué l's hommes en prison avaient bein pus d'privilèges qué les femmes tch'y sont étout. Entr'aut' choses, les femmes avaient a dêteindre lus veues d'miyeuthe heuthe qué l's hommes, ou tchiquechose dé même. Ch'est vrai qu' nouos couochons n'veulent pus d'chours! Quand j'veins à y penser, ch'tait p't-êt' ch'là tch'a fait iun d'nouos pus fanmeux Sénateurs dithe tch'il est temps d'êgalîser les drouaits des femmes en Jèrri pour les mett' au même rang qué l's hommes.
Y'a des louais d'même entouorre les femmes en Améthique et ch'est eune embête dans l'conmèrce et l'îndustrie. Quand eune femme et un homme sé présentent pour un empliai, à tchi l'donner? S'nou l'donne à l'homme, et qu' les deux sont êgalement qualifiés, la femme a l'drouait dé s'pliaindre, et s'nou l'donne à la femme, l'homme a l'même drouait. Si l'Sénateu mênage à aver eune louai d'même pâssée en Jèrri, y'étha du feu d'satchi quand eune Angliaîche et eune Portundgaise es'sont candidates pour la même tâche, et i' faudra chouaîsi entre homme et femme et toutes choses. Si, par exempl'ye, y'a eune douzaine dé femmes dé sèrvice dans eune hôtel, i' faudra tch'i' y'en aie six d'châque nationalité si y'a deux nationalités en jeu, ou quatre dé châque sorte s'i' y'a trais nationalités en travas là. Un tas d'niolîn, ou m'dithez? Ch'est r'mèrquabl'ye comme des louais d'même mènent à des drôles dé situâtions. Sans doute, ché n'tait pon l'întention des législateurs dé créer telles situâtions, mais ch'est les difféthentes întèrprétâtions d'la louai tch sièvent s'n applyicâtion dans l'conmèrce et l'îndustrie tchi gâtent tout.
Quant à la grève dans la prison, il est temps dé r'mett' les malfaiteurs à câsser d'la pièrre comme dans l'temps pâssé. Ch'est seux qu' un tas d'ieux vivent mus dans la neuve qué siez ieux, et qué lus séjour dédans n'est pon grand' sorte dé peunnition.
Il est grand temps d'pâsser eune louai pour contrôller les grévistes. Ches fichues grèves înc'modent tout l'monde et sont cèrtainement la pus grande cause dé la renchiéthe du couôtement d'la vie.
Vouot' articl'ye d'fond dans la gâzette du 5 d'août au sujet d'faithe les pathents payi pour les mêfaits et d'gâts d'lus êfants est bein à propos. En pâlant dans mes lettres du vandalisme, j'ai souvent mentionnée qué ch'est là la miyeuthe manniéthe dé l'arrêter. Les jannes malfaiteurs n'ont autcheune crainte dé la “Juvenile Court” tchi les r'met souvent à la chèrge dé pathents tchi n'peuvent pon les contrôller ou bein i' né s'saient pon d'vant la Cour en preunmier lieu. J'ai ouï même dithe qué les mousses gagent entre ieux-mêmes pour décider létché tch'îthait d'vant chutte Cour lé pus d'fais dans un cèrtain temps. Mais si les pathents sont présentés en même temps auve lus êfants et condamnés à payi pour les d'gâts, i' s'en vont c'menchi à y porter r'miède.
Ch'n'est pon souvent qué j'sis împressionné par les sèrmons qué j'ouai à l'églyise. À c'menchi, j'ouai cônu, et à mains qué j'sais tout près d'la tchaise j'n'en ouai pon la maintchi et j'êprouve à dormi. Mais dans la gâzette dé sanm'di, dans la colonne “Talking Point”, j'vis eune articl'ye întitulé “Thank You” par lé Révérend David Mahy au sujet d'l'Églyise dé Notre Dame dé la Garde tch'est sus la hauteu à Marseilles, où'est qu' j'ai 'té mé-même et où'est qu' les pêtcheurs ramontent à r'mèrcier l'Bouan Dgieu pour ses bénéfices, tch'est en lyi-même un magnifique sèrmon tchi nouos apprend à êt' èrmèrciants pour touos les bénéfices qué l'Bouan Dgieu nouos accorde. Né v'là un sèrmon d'chîn minnutes tchi vaut la peine d'êcouter viyant tch'il est simpl'ye, înstructif, à propos, et court assez pour vouos empêchi d'aver envie d'dormi!
Quand tchi qué tchique Membre d's Êtats s'en va entanmé la tchestchion d'adopter eune nouvelle couleu pour Jèrri auve les trais léopards dé la Nouormandie d'ssus? J'ouiyais l'aut' sé qué la couleu actuelle 'tait en veue à Edmonton, au Cannada, à l'occâsion des “Commonwealth Games” mais tch'i' y'avait bein p'tit, si autcheunes, pèrsonnes tchi r'connaîssaient la crouaix d'St. Patrice comme ayant rein à faithe auve Jèrri. J'ai tréjous espéthé d'vaie l'changement d'vant mouothi, mais jé c'menche à en aver des doutes!
George d'La Forge
Viyiz étout: