Le Ménage ès Feuvres,
St. Ouën.
Lé 23 d'août, 1975.
Moussieu l'Rédacteu,
Hélas! L's accidents en moto continnuent. J'viyais dans la gâzette d'aniet qué iun d'nouos grands dans la police en ville nouos annonce qu' un tas d'ches accidents sont causés par lé fait qué hardi d'pèrsonnes dêpâssent les lînmites dé vitesse. Jé n'sai pon pourtchi tch'i' met ch'là au pluriel quand j'pense qué, à eune seule exception d'ma connaissance (à St. Pièrre, où'est tch'i' y'a eune lînmite dé vîngt milles à l'heuthe pour un p'tit but), la vitesse dé quarante milles à l'heuthe est pèrmînse par toute l'île.
J'sai bein qu' vouos lecteurs sont probabliément enn'yés dé m'vaie m'en pliaindre dans ches lettres, dé la vitesse des motos en Jèrri, mais j'aspithe au moment qu' les autorités responsabl'yes prannent sus ieux d'mett' des affiches lînmittant les vitesses dans les p'tites routes. Nou m'dit dans des temps qué v'là tchi n'empêch'chait pon l's accidents. P't-êt' bein, mais ch'est bein seux qué l's accidents s'saient mains des gens. I' n'faut pon fort d'înmaginnâtion pour vaie qu' eune vitesse dé trente milles ou mains par heuthe s'en va faithe mais d'mêché en cas d'accident qué ieune dé quarante milles à l'heuthe. Dans cèrtains cas, v'la tchi peut faithe la difféthence entre la vie et la mort. Est-ch' qué d'sauver mème qu' eune vie n'vaut pon la peine dé considéther?
Et les cas d'motoristes tch'ont bu trop tchi pathaîssent dévant la Cour continnuent en grands nombres - entre trais et quat' chents par an, pathaît-i'. Est-ch' qué ch'n'est pon honteux? Ch'est vrai tch'i' sont condâmnés à d'fortes amendes, mais v'la tchi n'pathaît pon arrêter la procêssion dévant la Cour. I' m'sembl'ye aver veu dans la gâzette y'a deux ou trais ans qu'un membre distîndgi dans L's Êtats avait dit qué la pus grand' peunnition qué nou pouvait donner à autcheune pèrsonne 'tait d'lî supprînmer l'drouait d'posséder et d'cachi un moto. Eh bein, né v'là la peunnition qué les Juges dév'thaient donner ès motoristes tchi bouaissonnent et cachent en mème temps.
Eune peste tch'a envahi Jèrri à ches drein est les voleurs dans les boutiques. Sans doute, les grand' boutiques, atout lus marchandises à l'ouvèrt sus l's ais, s'y prêtent, au vol. Ch'est l'couôtement d'la main d'oeuvre tch'est la cause de chu systéme où'est qué l'chein tch'y fait sa boutique prend chein tchi veurt dé s'ssus l's ais li-mème, et pis va à eune aut' partie d'la boutique payi pour. V'la tch'est bein quand l'acateux est honnête, mais v'la tchi n'empêche pon les voleurs dé voler.
Bailliz-mé les vièrs temps quand nou-s-allait à la boutique et qu' nou 'tait sèrvis par tchitch'un tchi vouos faîsait la beinv'nue et tchi pâlait l'Jèrriais. Et qu' les gages 'taient raisonnabl'yes assez pour pèrmett' au boutitchi d'aver assez d'main d'oeuvre pour sèrvi l'publyi îndividuellement.
Eune aut' embête qué j'n'aime pon vaie dans les grand' boutiques est les mousses à galvaûder dans l's allées plieines d'ais couvèrts dé marchandises. I' sont tréjous à couôrre partout et à paûtchi tout sus l's ais, et les pathents les laîssent lé faithe. Nou dithait qu' les méthes sont trop lâssées pour prendre la peine dé les seurvilyi et d'lus apprendre un mio d'la disciplinne tchi lus vaudrait tant pus tard dans la vie.
Châque fais qué j'vai la propriété d'Brabant mentionnée dans la gâzette, j'pense ès bouans vièrs temps quand j'y allais siez Moussieu et Madanme Alfred George Messervy jouer à la paûme, et tchiquefais au croquet. Dans chu temps-là (1908-1914), Moussieu Alfred Messervy, lé grand des fis au Juge Alfred Messervy, 'tait Trésôryi des împots, et san salaithe 'tait chent louis par an. J'pense bein qué l'salaithe pour chu poste là au jour d'aniet est dans les quat' chiffres. Comme hôtes, il' 'taient parfaits, li et sa danme, et Brabant 'tait eune mangnifique propriêté. À ch't heu, j'vai par la gâzette qué la fèrme produit des cats d'race et qu' iun a gângni l'preunmié prix sus sept chent chînquante cats en Angliétèrre Mangnifique! Et dîngne dé sa d'meuthe dé Brabant. Mais peut-i' attraper des souothis?
J'tais bein content d'vais l'portrait dans la gâzette d'hièr, du canon tchi dithait l'heuthe a méjeu touos les jours sus l'Fort Régent quand j'tait mousse. J'm'èrsouveins qué touos les cheins tch'avaient eune montre la r'gardaient quand nou ouïyait l'canon pour la réglier s'ou n'mèrtchait pon douze heuthes exactément. J'sis absolûment du mème avis qu' Moussieu “Meridian” quand i' suggéthe qué nou dév'thait r'quémenchi à tither l'canon touos les jours en mémouaithe dé la Milice Rouoyale dé Jèrri.
En pâlant d'montres, ou n'mé créthez p't-êt' pon, mais j'vouos asseûthe qué quand j'avais les talons jaunes tout l'monde n'en avait pon ieune. Mais, j'en ai ieune à ch't heu tchi m'dit tch'il est beintôt mînniet, ch'est en tchi j'm'arrête pour vouos dithe bouanne niet - et dormez bein!
George d'La Forge
Viyiz étout: