Trenton, Michigan,
USA.
Lé 14 dé mai, 1977.
Moussieu l'Rédacteu,
J'vai, dans la gâzette dé Jèrri du 31 dé mar, tch'i' y'a tchestchion d'eune nouvelle couleu pour Jèrri ch't' année d'Jubilé d'nouot' Duc, Sa Majesté la Reine d'Angliétèrre. Eh bein, y'a longtemps qu' j'en sis d'avis, mé. M'n i'dée est qu' la couleu d'Jèrri dév'thait montrer les trais léopards Jèrriais-Nouormands. À ch't êgard, j'ai pensé tch'il est à propos dé r'produithe ma lettre du 13 dé dézembre, 1969, publiyée dans la Jersey Weekly Post du 8 de janvyi, 1970. La v'chin:-
Quand j'tais à montrer les nouvieaux timbres d'Jèrri a un anmîn ichîn en Améthique l'aut' jour, il en 'tait tout à fait êprins. I' n'pouvait pon en r'vénîn qu' eune île si p'tite comme la nouotre pouvait affaûrder à produithe dé tchi si bé. Et il 'tait êmèrvilyi, étout, qu' la Reine pèrmettait à l'Île d'aver ses propres timbres. En r'gardant l'chein d'chîn ch'lîns, tchi montre lé portrait d'la Chambre d's Êtats, il appèrchut la couleu tch'est pendue en d'ssus d'la tchaise à Moussieu l'Bailli, et, en admithant les trais léopards en or dessus, i' m'dît: Tchi belle couleu tch'il ont, les Jèrriais! Ch'est seux qu' nou la vait au haut d'touos les mâts dans l'Île!
Nou-fait dgia, j'lî dis. 'Ch'est drôle d'aver à vouos l'dithe, mais la couleu adoptée par l'Île dépis longtemps est la crouaix d'St. Patrice - en rouoge sus blianc.'
Bon!, i' m'dît, 'n'en v'la, eune drôle d'affaithe! Les Jèrriais, tchi sont si loyaux à la couronne d'Angliétèrre, ont adopté la crouaix d'St. Patrice d'Irlande, tchi dêteste l's Angliais, pour lus couleu?'
Ch'est r'mèrquabl'ye!, j'lî dis, 'mais ch'est d'mème!'
J'mé sis souvent d'mandé pourtchi qué l's autorités en Jèrri n'ont janmais fait autcheune chose pour changi eune couoteunme tch'est, à m'n idée, riditchule. La couleu tch'est en d'ssus d'la tchaise du Bailli dans la Chambre des Êtats dév'thait êt' le couleu d'Jèrri! J'avons les trais léopards sus nouos sou, nouos êtchussons et l'sciau d'nouot' baillage. Et, j'mé r'souveins, sus l'însingne dé la Milice Rouoyale dé Jèrri quand j'tais soudard dans l'Bataillon du Ouest. Et à ch't heu sus nouos timbres. Mais nouot' couleu est la crouaix tchi r'présente l'Irlande!
J'ai 'té assez tchuthieux pour êprouver à dêcouvri comment qu' ch'là s'est fait, mais i' pathaît qu' l'originne de s'n adoption en Jèrri n'est pon trop bein connue. Dans san livre Lé Baillage dé Jèrri, lé Révérend G. R. Balleine nouos dit qué l'Mâjeur Rybot, dé mémouaithe respectée, tch'avait fait des r'chèrches au sujet, avait dêcouvèrt qué dans un livre en Angliais publîyé en 1783 par un Moussieu Bowles et tchi donne un accompte des couleurs dé navithes dé toutes les nâtions, i' s'appèrchut qu' eune couleu sus l'mât d'un navithe Hollandais, dé tchi qu' un portrait avait 'té dessinné en 1705, avait l'nom 'IERSE' d'ssus, et i' pense qué chu nom-là fut întèrprété comme voulant dithe Jèrri. Mais l'portrait des navithes Hollandais avait 'té copié dé d'ssus cèrtaines vielles cartes dé 1705 par un nommé Carel Allard ou par lé nommé van Keulen vèrs les 1720, et ch'tî-chîn avait êcrit 'IERSE' en d'ssus d'la couleu et 'IRLANDOIS' en d'ssus, évidemment pensant qué ch'tait la couleu d'Irlande.
Dans la langue Hollandaise, nouos dit l'Mâjeur Rybot, lé mot pour Irlande est 'IERSCHE', ch'est en tchi i' n'pathaît pon y'aver fort dé doute qué les navithes sus ches vièrs portraits-là 'taient Irlandais, mais qué l'mot pathaîssait assez comme lé nom d'nouot île pour qué tchitch'un l'adoptîsse comme étant l'nouotre, et la mêprînse a 'té continnuée pour pus d'chent-chînquante ans!
J'sommes, comme mé l'dîsait l'Abbé Lelégard, lé grand savant d'l'Abbaye d'La Lucerne, quand i' vînt en Jèrri ch't êté, la seule partie d'la Nouormandie tchi n'est pus souos l'joug dé la France, et les privilégiés d'la Couronne d'Angliétèrre dépis bein des siécl'yes, et j'avons eune couleu tchi r'présente pûtôt l'Irlande qué Jèrri, la Nouormandie ou l'Angliétèrre! À m'n idée, il est grand temps d'prendre les m'suthes nécessaithes pour adopter la vraie couleu qué j'dév'thions, comme bouans Jèrriais, êt' ordgilleurs dé haulîndgi au haut du mât à la pliaiche dé la crouaix d'St. Patrice, et tchi montre les léopards qué j'sommes ordgilleurs dé montrer sus nouos sou, nouos êtchussons et nouos timbres, et qué mème la Grande Brétangne, dé tchi nouot' Duc est la Reine, montre sus ses armeûethies!
J'avons-t-i' assez d'vièrs Jèrriais dans L's Êtats aujourd'aniet pour proposer l'adoption d'eune couleu tch'est Jèrriaise, Nouormande et en mème temps Britannique, pour en rempliaichi ieune tchi r'présente pûtôt l'Irlande qué Jèrri?
Jé n'crai pon qu' sa Majesté la Reine èrfûs'sait d'approuver l'changement. Et i' n'est pon bésoin d'aller liain pour un patron. La couleu en d'ssus du siège dé Moussieu l'Bailli dans la Chambre Législative est exactement l'patron voulu. Nou n'pouorrait pon faithe mus qué d'la copier, et Mêssieux les membres d's Êtats n'ont qu' à garder l'yi sus sa bieauté pour l's encouothagi à l'adopter. Et jé s'sais si ordgilleux d'la vaie adoptée dévant qu' nou piêsse mett' ma poutchie d'vièrs os souos la biête!
George d'La Forge
Viyiz étout: