Tch'est qui vos dounne counnaissance
Des Etats et d'lus séances,
Qu'ont une si grande importance?
La Gazette!

Tch'est qui raconte les procès,
Les poursuites et les protêts,
Et vos signale les arrêts?
La Gazette!

Tch'est qui publie les rapports
Des bêtes qu'ont battu les r'cords,
Gâgnant des prix d'touos les bords?
La Gazette!

Tch'est qui critique les Etats,
Et les faiseurs d'embarras,
Tappant d'sus à tour de bras?
La Gazette!

Tch'est qui dit du bein des gens,
Fait l's'êloges de lus bouan sens, -
- Quand i' sont morts, d'j'a! j'entends?
La Gazette!

Tch'est qui fait l'honneur ès boeux,
D'mettre lus pedigree fameux,
Deux fais la s'maine souos vos yeux?
La Gazette!

Tch'est qu'annonce la terre à louer,
Les bouannes pièches à otchuper,
Et chein qu'nou peut acater?
La Gazette!

Tch'est qu'imprime en bouan jerriais,
Les p'tites poêsies que j'fais,
Sus toutes les sortes d'sujets?
La Gazette!

Tch'est qui permèt au Caouan,
D'raconter chein qu'il entend,
Parfois, bein affrontêment?
La Gazette!

Tch'est notr' bouanne femme de grand'mèthe
Aime à mettre dans ses armoèthes,
Ses titheurs et chiffonièthes?
La Gazette!

Tch'est qui sert, enfin, tout l'temps,
Dans une grand' variêtè d'sens,
Et qu'ou n'voudraites pon être sans?
Votr' Gazette!

Elie