San Antonio, Texas,
U.S.A.
Lé 9 dé mar, 1968.
Moussieu l'Rédacteu,
J'veins d'èrchéver la gâzette du preunmyi d'févri. Les cheinnes du 28 dézembre et du 25 janvyi sont acouo à v'nîn! À ch't heu qué l's Êtats s'en vont s'enchèrgi d'la Grand' Poste, j'espéthe tch'i' s'en vont env'yer tchitchun à apprendre à la nôtre en Améthique à m'apporter la gâzette dé Jèrri à m'suthe à la pliaiche d'À Dgi-l'Adèrt! Dans l'entrétemps, i' faut espéther qué l's Êtats ont décidé la miyeu chose pour l'Île. Si ch'tait nouos législateurs à Washington tch'en éthaient décidé, j'en éthais mes doutes!
Comme d'amors, ch'est un pliaisi d'liéthe les nouvelles dé Jèrri, et acouo pus quand nou n'vait pon l'décès d'pathents et anmîns d'dans. Y'en a iun, chutte fais - un décès - tchi m'ramémouaithe man janne temps, lé chein du Cap'taine Leyghton Richardson. J'tions du mème âge. J'm'érsouveins d'li et d'sa physionomie en 1906 comme si ch'tait à ch't heu! Il 'tait blond et mince, et pas bein haut.
À ch't êpoque-là, j'tais janne commis dans l'office à Moussieu Charles Ouoyamme Binet, et ch'tait li tch'était l'homme d'affaithes au p'pèe à Leyghton Richardson, et tchi fît l's arrangements, comme sén agissant, pour san fis à être èrchu comme offici-apprenti à bord des navithes à Messire Thomas Dunlop. J'en 'tais impressionné dans l'temps. À c'menchi, lé nom d' Leyghton mé pathaissait hardi drôle pour un Jèrriais, et quand il' 'tait v'nu à l'office j'avais r'mèrtchi tch'il 'tait bieau garçon. Et pis, étout, dans chu temps-là j'éthais donné autcheune chose pour êt' à sa pliaiche et pouver aller en mé. J'pense bein qu'j'avais la mé dans la couënne viyant tch'i' y'avait ieu tant d'naviguants parmi m's anchétres. Il' avaient quâsi touos 'té en mé d'vant qu'd'être forgeurs, et man grand-péthe matérnel 'tait cap'taine. Et pis y'avait d's anmîns tch'étaient naviguants et tchi m'faîsaient envie quand i' m'racontaient l's histouaithes dé lus viages, et d'l'êtrangi quand i' v'naient à tèrre. Y'avait Alfred Monnamy (san p'pèe 'tait gardgien au phare dé La Corbièthe), et John Richardson Stèr, fis Cap'taine Stèr, tch'était chef-gardgien du phare, touos les deux dans la Marinne Rouoyale; les deux garçons Le Clercq, Charles et Fraînque, fils d'la soeu à m'n oncl'ye Fraînque d'Aubert, et bein d'autres, et pour mé, l'idée d'aventuthes en mé et à l'êtrangi avait pus d'attrait qu'ma tâche à copier des contrats dans eune office en ville! Comme i' s'est adonné, j'ai ieu ma part dé viag'gie et d'aventuthe dans la vie, mais nou n'savait pon dans chu temps-là (comme nou peut dithe qué nou l'lé sait pon à ch't heu) tch'est tchi vouos pendait sus la tête!
J'tais întérêssi d'liéthe lé rapport du dîner annuel dé L'Assembliée d'Jèrriais. Ouaithe qué j'sis membre fondateu et membre d'honneu d'L'Assembliée, j'n'ai pon ieu la chance d'êt' présent à chu dîner-là dépis 1953. Enfîn, i' n'faut pon m'pliaindre, car j'ai peu aller à quâsi touos les sèrvices annuels, et ch'est dêjà tchiquechose dé pouver en faithe autant quand nou d'meuthe en Améthique! J'tais bein content d'vaie qué l'Docteu Carré lousit les travaux littéthaithes dé l'Académicien L'Maistre, et tch'i' ramémouaithit ès membres qué l'honneu tchi lî fut accordé par L'Académie Rouoyale d'Upsala est un honneu pour Jèrri étout. Et j'èrmèrcie l'Docteu pour m'aver fait l'honneu d'mentionner tch'i' liet ches lettres ichîn et m's articl'yes dans les bulletîns d'L'Assembliée. J'peux lî r'touanner l'complyîment en lî disant par ces présentes, comme êcrivent l's êcrivains, qué j'trouve san Vocabulaithe Francais-Jèrsiais dans l'dictionnaithe bein utile, et qué j'lé consulte toutes les fais qué j'fais sèrvi l'dictionnaithe!
J'vai, étout, qué ch'tait l'Sieur Jean Anmîn L'Maistre tchi propôsit la santé d'L'Assembllaïe d'Dgèrnésiais. J'sis seux tch'i' s'atchittit bein d'sa tâche, car il a dêjà gangni san brevet d'orateur. I' pathaît tch'i' fît un si bieau discours quand i' propôsit la santé des nouvieaux mathiés à un dîner d'neuches l'année passée, qué v'la tch'a encouothagi un tas d'jannes hommes à lus mathier d'pis! Et j'sis content d'vaie qué l'Sénateur Rom'thi, Président d'L'Assembliée, dit qué tout l'monde dév'thaient apprendre l'Jèrriais à lus êfants. J'sis absolûment dé s'n avis qu'ch'est la seule manniéthe dé l'présèrver! Et pourtant y'en a si p'tit tchi l'font!
En liêsant l'rapport dé la rêunion annuelle dé l'Eisteddfod, j'tais êmèrvilyi d'vaie qu'Moussieu l'Bailli si souvent embarrassé au sé comme dé jour, prend quand-mème lé temps d'la présider. J'sis trop liain des lieux pour pouver êvaluer la suggestion d'coper la session annuelle en deux. I' m'sembl'ye quand-mème qué les gens sont trop embarrassés dans les clios au r'nouvé pour y prendre l'intéthét tch'en a fait un succès vèrs la fin d'l'année.
En r'gardant l'portrait d'la carrièthe à La Rosièthe, j'tais ravi d'vaie la grandeu d'la mathe tch'est d'dans. Quand jé d'meuthais à La Mouaie, j'viyais la carrièthe souvent viyant qué m'n oncl'ye Fraînque d'Aubert 'tait l'înginnieux tchi faîsait marchi les crannes. Il a passé un tas dg'ieau dans la carrièthe dépis, aussi bein comme par La Corbiéthe!
George d'La Forge
Viyiz étout: