Trenton,
Michigan, USA
Lé 8 d'août, 1981
Moussieu l'Rédacteu,
N'Pongo pathaît pensive dans san portrait tch'est dans la gâzette dé Jèrri du deux d'juilet tchi veint d'arriver ichîn. I' d'vait faithe fraid en Jèrri au c'menchement d'juilet, car N'Pongo a sa grand' câsaque dé pé. La drôle dé chose est qu'iun d'mes fréthe est d'opinnion qué j'lî r'sembl'ye, à N'Pongo! Ouaithe qué j'sai bein qu'ch'est pour m'êtibotchi tch'i' fait la minne dé craithe tch'i' y'a d'la r'sembliance, chose assez r'mèrquabl'ye est qué châque fais qu'j'ai visité un zoo j'ai 'té fascinné par les marmoûsets et j'ai tréjous pâssé du temps à l's obsèrver faithe lus marmoûsell'lies et sauticott'ties dans lus cages. Mais j'ai r'mèrtchi qué N'Pongo pathaîssait trantchil'ye et pensive quand j'la vis en Jèrri y'a un coupl'ye d'années. V'là tchi m'ramémouaithe lé vièr diton Jèrriais qué nou n'apprend pon à un vièr marmoûset à faithe des grîngnes. Chose assez êtrange est qué quand j'sis à les r'garder, les marmoûsets, i' pathaîssent êt' hardi întérêssis en mé étout. Éthaient-i' par chance ouï pâler d'Charles Darwin?
Eune întérêssante gâzette, la cheinne du 2 d'juilet. Ouaithe qué L's Êtats pathaîssent en faveur d'innonder La Vallée des Moulîns (mênommée "Queen's Valley"), chutte gâzette nouos dit qué lé "National Trust" èrfuse dé vendre sa propriêté dans la vallée. V'là tchi m'fait ordgilleux d'êt' un membre à vie du "Trust". Y'a p't-êt' acouo espéthance dé la sauver, la vallée. Et à ch't heu tch'i' y'a raison d'craithe qué l'tourisme en pèrd, n'est-i' pon là bouonne occâsion d'arrêter la folie d'continnuer à bâti tant d'additions d'chambres et d'bains dans l's hôtels, un procédé tchi gaspil'ye tant dg'ieau?
Jé n'sai pon tch'est tch'est responsabl'ye pour l'întitulement d'l'accompte d'un êvenèment partitchulyi dans la gâzette, mais n'en v'chîn un drôle: "Calves attack dog put down"! I' faut aver d'l'înmaginnâtion pour comprendre ch'la. V'là tchi veurt-i' dithe qué des vieaux ont attatchi un tchian dêjà abattu? Tchi drôle dé chose!
J'vai dans la gâzette étout qué Moussieu l'Connêtabl'ye d'St. Ouën est d'avis d'mett' des jaunes lîngnes dans "St. Ouen's Village." J'n'ai autchun doute qué y'en a bésoin si l'Connêtabl'ye lé considéthe nécessaithe, mais où'est tch'est "St. Ouen's Village"? Est-ch' par chance La Ville des Mathettes? Lé par dé stationnement en d'vant d'la boutique "Briggs" en a grand bésoin étout. Et des gros camions et machinnes dé toutes sortes tch'y pâssent la niet, et tchiquefais partie du jour, sont eune embête pour les gens tchi veulent boutitchi et aller à la poste et stationner lus motos.
Quand j'vai l'nombre d'pliaintes au sujet des cartes d'visite qué les tchians laîssent, jour et niet, sus les trottouaithes et les rues d'la ville, i' m'sembl'ye tch'i' y'a pus d'urgence dé bâti des p'tites maîsons pour les tchians qué pour les humains. Et y'éthait l'avantage tch'i' né s'sait pon nécessaithe d'en bâti d'deux sortes, ieune pour "Miton" et l'aut' pour "Charlotte." Ché s'sait eune bein miyeu manniéthe dé garder les trottouaithes dé la ville propre qué d's'attendre qué les tchians s'en vont les netti atout lus coues! Et pis, étout, ché s'sait eune bouanne opporteunité pour tchique janne architecte dé montrer san talent en dessinnant eune Pétite Maîson à Tchians d'distînction!
En liêsant l'accompte du rêsultat d'la compétition pour lé championnat du clobe dé golf dé La Mouaie à St. Brélade, v'là tchi m'ramémouaithe mes deux ans à l'École dé La Mouaie souos Moussieu George Boomer. Ch'tait lî tch'avait aîdgi à dêvelopper les dgiex-huit "greens" dé la touannée, et il 'tait un bouan joueux lî-même. Comme mousses à l'êcole, j'avions un întéthêt dans l'jeu, et deux d'ses fis, Percy et Aubrey, d'vîndrent "professionals" du clobe dé golf dé St. Cloud à Paris. J'pense qué Aubrey est acouo en vie et tch'i' d'meuthe en Belgique et tch'il est champion d'chu pays-là et d'la France étout.
Lé fanmeux champion Harry Vardon 'tait par les c'mîns quand j'tais à La Mouaie et jé l'viyais jouer d'temps en temps. Chose întérêssante est qu'auprès aver gângni l'championnat d's Êtats-Unis un coupl'ye d'fais i' visitit l'Cannada. Arrivé à Ottawa i' r'gardit dans tchique directouaithe pour des noms Jèrriais et trouvit l'nouotre et dêcouvrit qué M'mèe, née Florence Mary Giffard, avait 'té née à St. Cliément, sa pâraisse étout, et tch'i' s'étaient connus comme mousses à la même êcole. I' restit à dîner et il' eûdrent un mangnifique temps à pâler d'lus janne temps en Jèrri. Honneu à sa mémouaithe!
George d'La Forge
Viyiz étout: