Le Ménage ès Feuvres,
St. Ouën.
Lé 3 d'juilet, 1971.
Moussieu l'Rédacteu,
Nou m'a tchiquesfais dit qué si j'êcrivais entouorre l's êvénements du jour, mes lettres es'saient pus întérêssantes à liéthe. Eh bein, j'sis absolûment d'accord auve ch't idée là, mais les gâzettes dé Jèrri prannent trais - tchiquefais quatre - sémaines à v'nîn m'trouver quand j'sis en Améthique, et par chu temps-là les nouvelles dédans sont pûtôt l's êvénements du temps passé qué l's affaithes du jour. Pour vouos en donner un exempl'ye: J'veins d'aver des nouvelles d'Améthique mé disant qu' l'avèrti du décès du savant Nouormand, lé Professeu Fernand Lechanteur, tch'était “Proviseur” du Collège Malherbe à l'Univèrsité d'Caën, et tchi m'avait fait l'honneu d'êt' considéthé iun d'ses anmîns, veint d'arriver à Texas, quâsi huit s'maines auprès sa mort (i' mouothit l'sept dé mai). Par lé temps qué j'vai l'décès d'mes anmîns dans la gâzette dé Jèrri, j'n'ôse quâsi pon êcrithe à lus fanmiles pour exprînmer mes condoléances dé peux dé r'ravigoter lus chagrîn!
Si j'démeuthais en Jèrri toute l'année, ché s'sait difféthent. J'pouorrais suivre les débats dans l's Êtats et faithe des r'mèrques au sujet du comport et des discours des Membres. Ch'est p't êt' quand mème eune bouanne chose qué j'n'en sis pon à mème, car étant, à m'n âge, dé la vielle êcole, jé s'sais tréjous à crititchi les dêpenseurs dé sou, et ch'est tout bein d'crititchi, mais faut saver mus faithe! Ch'est comme les nouvelles dans la gâzette dreinement tchi nouos disent qué nouos grosses têtes sont en train d'payi tchiquechose comme tchînze mille louis pour faithe eune înspéction du trafi dans l'Île, ieune des raisons étant tch'i' son travis qu' la tonnelle souos l'Mont d'la Ville n'a pon aîdgi à soulagi l'voleunme dé la cirtchulâtion d'motos dans la ville. Eh bein, à m'n idée i' n'est pon bésoin d'dêpenser un seul sou pour dêcouvri la cause dé l'amas d'trop d'motos dans la ville. La raîson est tch'i' y'en a bein trop dans l'Île dé motos! Ch'est en plieine veue d'tout l'monde tchi n'sont pon aveugl'yes!
À c'menchi, touos les clèrcots et clèrcottes tchi travaillent dans l's offices en ville pouôrraient y'aller par beusse, mais nannîn, i' lus faut un moto! Un anmîn m'disait l'aut' jour qué sa fille, tchi v'nait d'tchitter l'êcole, 'tait à travailli dans eune banque en ville. “Oulle a la chance,” j'lî dis, “la beusse pâsse à côté d'vouot' porte!” “Véthe, ch'est vrai,” i' m'dit, “mais j'lî ai acaté un moto. Ch'tait bein au mains; j'en avais acaté iun à san fréthe quand i' tchittit l'êcole et allit travailli en ville, et fallait bein faithe la mème chose pour sa soeu. Ou n'oubliyit pon dé m'ramemouaither qu' j'en avais donné iun à san fréthe. Tu sai bein tch'est qu' ch'est qu' les jannes!” V'la tchi veurt dithe tch'i' y'a trais motos siez m'n anmîn tchi n'a qu' deux êfants, et qu'les deux (dans chu cas 'chîn) n'ont qu'deux ou trais milles à aller à lus travas et qu'eune beusse pâsse à côté d'lus porte! Et combein qu' y'en a d'mème à encombrer les rues et empouaîsonner l'air? Il' arrivethaient tout aussi vite en ville dans la beusse. S'ou n'lé criyiz pon, ou n'avez qu' à vaie les motos aller, patte à coue, comme nou peut dithe, à la vitesse dé quatorze milles dans tchînze jours, dé Bieaumont en ville, dé huit heuthes et d'mie à neuv heuthes au matin!
Eune aut' affaithe qué j'ai r'mèrtchi en ville, étout, est l'nombre d'gens tch'êprouvent à stationner lus motos endrait la porte d'la boutique, ayant peux d'aver à marchi deux pas sus lus pids d'driéthe! Et les cacheurs dé motos en ville et dans la campangne né pathaîssent pon saver qué l'piêton a priorité d'passage dans la rue ou dans la route, et i' pathaîssent êt' prêts à bouler par dessus li s'i' n'sé dêcarre pon dêliêment!
Et la vitesse dé quarante milles à l'heuthe partoute l'Île est eune folie! Combein d'fais qué j'l'ai mentionné. À la fin des fins j'ai ieu l'pliaîsi d'vaie, dans la gâzette dé mardi au sé, qué l'Chef Axon, d'la police salariée, est dé m'n avis. La gâzette est tréjous plieine d'accidents en moto, et ch'est seux qu' pus qu' la maîntchi sont à cause dé trop d'vitesse. Et pouv'ous m'dithe combein d'la bieauté d'nouos belles campangnes qué les touristes peuvent vaie, en cachant les motos tch'il' ont loué, à quarante milles à l'heuthe dans nouos p'tites ruettes? Bah! Nou pouorrait continnuer à êcrithe toute la niet au sujet des motos en Jèrri, mais ou-s-allez êt' enn'yés, bouannes gens, d'liéthe tout man bargouaîchîn. Mais nouos y v'la, j'veins d'êprouver à pliaithe ès cheins tchi craient qu' mes lettres dév'thaient êt' pûtôt un commentaithe sus l's affaithes du jour. Mais j'sai bein qué v'la tchi né f'tha pon fort d'êffet sus les grosses têtes tch'aiment tréjous à dêpenser des sou pour dêcouvri d'tchi tch'est en plieine veue du contribuabl'ye!
George d'La Forge
Viyiz étout: