Fort Lauderdale, Florida,
USA.
Lé 26 d'févri, 1977.
Moussieu l'Rédacteu,
Lé porteux d'lettres m'a 'té bouan chutte sémaine. I' m'a apporté deux gâzettes dé Jèrri, les cheinnes des six et treize dé janvyi. Comme les Jèrriais font tréjous en ouvrant la gâzette, j'ai r'gardé les décès, et ch'est auve èrgret qué j'vai qu' un aut' anmin d'vièr temps, Hedley George Luce, Êcrivain, n'est pus, et j'fais part dé man r'gret et d'mes condoléances à Madanme Luce. Et eune lettre d'un anmin à St. Ouën m'apprend la nouvelle qu' un aut' anmin, Philip Poch, Êcrivain étout, a pâssé l'pas. J'tions touos les trais clèrcots en mème temps dans La Rue ès Trais Pigeons, et j'ai eune idée qué ches deux-là sont les dreins tch'étaient là en mème temps qu' mé et qué mé v'la tout seu d'ma sorte. Lé Sieur Poch, un charmant corps tréjous prêt à faithe un pliaîsi, fut fait Franc-machon dans la lege La Césarée justément d'vant mé en 1919, et mé v'la don lé preunmyi en tête dé la liste des Franc-machons d'la loge. Ch'tait l'Avocat John Fleury L'Cornu tchi m'proposit, et si ma mémouaithe né m'trompe pon, ch'tait l'Sieur Frank Salmon Godfray tch'était Vénérable Maître.
En pâlant d'La Rue ès Trais Pigeons, i' m'veint à l'idée qu' les trais pigeons tchi li donnîdrent san nom multipliyîdrent bein pus vite qué les deux-s'trais Avocats d'lus temps, mais qu' à la fîn l's Avocats sont en train dé l's attraper et qué l's autorités ont décidé dé dêtruithe assez d'pigeons pour balanchi l's affaithes et êgailli l'nombre d'Avocats et d'pigeons. J'crai bein qu' ch'est à cause dé chu problème là qué l'pouorre moussieu tchi voulait sauver la vie d'ches bieaux ouaîsieux n'a pon rêussi!
J'admithe vouot' articl'ye d'fond dans la gâzette du sept dé janvyi au sujet d'la nécessité d'peunni sévéthement les motoristes tchi cachent quand i' sont cauds d'baithe, mais jé n'm'en vais pon en dithe pus. J'en ai tant pâlé qué vouos lecteurs peuvent m'atchûser auve raison, d'répétition. Quant à l'accident d'moto tchi rompit les gambes à deux êfants en driéthe dé l'Êcole dé la Preunmié Tour, i' faut êprouver à êviter d's accidents d'mème. Ichîn en Améthique y'a des poteaux indicateurs ou affiches, dans les rues à eune bouanne distance dévant arriver à toutes les êcoles, ordonnant la réduction d'vitesse à 20 milles ou mains à l'heuthe jusqu'à cèrtaine distance pâssée l's êcoles, quand mème tch'i' n'y ait pon un mousse visibl'ye dans la rue. Et la police est bein stricte au sujet. Malheur qu'un motoriste sé trouve en d'lit. Il est seux d'êt' arrêté. En Jèrri ch'la dév'thait s'faithe à l'entou d's êcoles. Lé fait mème d'aver à réduithe vitesse met l'cacheux sus ses gardes.
Pour la preunmié fais, j'vai qué lé IDC est mentionné dans la gâzette du treize dé janvri comme étant sŷmpathique et tch'i' c'menche à gângni l'estînme du publyi! Si ch'est d'même ch'n'est pon ravissant qué l'Sénateu Shenton pathaît si content dans san portrait, et i' faut lî donner san drouait et l'féliciter, car il a surmonté l'appathemment împossiblye. Mais jé r'chus eune lettre d'un Jèrriais l'aut' jour tchi n'en crait pon grand' chose, du IDC. V'la tchi m'donne l'împression qu' touos les Jèrriais n'sont pon d'la mème opinnion comme la gâzette!
En pálant d'portraits dans la mème gâzette, y' en un bé d'Moussieu l'Connêtabl'ye Tomes, auve sa danme à san côté à célébrer sa re-êlection comme Connêtabl'ye dé St. Jean. Jé n'sai pon si ch'est du champangne ou d'la limonnade qué j'vai dans les vèrres, mais n'împorte j'sis à vèrser eune fais d'jus d'tomate dans l'mein pour trîntchi les vèrres auve ieux et féliciter Moussieu Tomes et lî souhaiter un aut' tèrme heutheux et sans avâries comme Connêtabl'ye dé sa pâraîsse, sachant tch'i' n's'en va pon mantchi d'ajouôter fouai et honneu au système honorifique tch'a si bein sèrvi l's habitants d'Jèrri duthant les siècl'yes.
En liêsant l's annonces des engagements et d'nassances dans les deux gâzettes, nou n'peut sénon penser qu' les vrais noms Jèrriais éthont dispathu d'ichîn deux ou trais généthâtions. Dans dgiex-sept engagements, i' n'y en a pon un seul où'est qu' les deux noms d's engagis sont vrais Jèrriais, et i' n'y a qu' deux cas où'est qué l'nom du garçon est Jèrriais.
Sus vîngt-quatre naîssances i' n'y'a qué quatre vièrs noms Jèrriais. Malheutheusement, j'n'y pouvons rein. Un vièr diton nouos dit qué si nou combat eune maladie, nou-s-y pèrd à la longue!
George d'La Forge
Viyiz étout: