Les Pages Jèrriaises

La Bouanne gâzette dé Jèrri

Fort Lauderdale,
Florida, USA.

Lé 30 dé dézembre, 1978.

Moussieu l'Rédacteu,

Y'a un vièr diton tchi nouos dit: “I' n'plieut tch'i' n'vèrse!" Eh bein, ch'a 'té l'cas pour mé chutte sémaine. Dans ma lettre du 23 d'dézembre j'mé pliaingnais qué j'n'avais pon 'couo r'chu eune gâzette dé Jèrri du mais d'novembre. Chutte sémaine il en est v'nu trais, la cheinne du 19 d'octobre et les cheinnes des deux et neuf dé novembre. J'mé d'mande si janmais la cheinne du 26 d'octobre arrivetha. D'la manniéthe qué la Poste marche à ch't heu nou n'sait janmais. Enfin, j'sis bein content d'aver, à la fîn, des nouvelles dé Jèrri.

La gâzette du 19 d'octobre nouos dit qué L's Etats învitent lé publyi à l's aviser d'autchun cas dé discèrnément d'traitement entre homme et femme tchi lî veint à connaîssance. Ch'est probabliément en veue d'pâsser tchique louai pour mett' homme et femme dos à dos et en pliein drouait êgal d'empliai pour toutes sortes d'travas par eune maison d'conmèrce quelconque.

Ch'est assex r'mèrquabl'ye pour eune pèrsonne à l'êtrangi d'vaie comment qué l's autorités d'eune pétite île comme Jèrri, si liain du Nouvieau Monde, lus mettent dans la tête d'adopter ses conditions d'vie et d'empliai. Y'a longtemps qu' j'avons eune louai ichîn en Améthique appelée «Equal Rights Opportunity» tchi donne absolûment l'même drouait ès femmes comme ès hommes point d'veue d'empliai, et v'la tchi donne tout pliein d'troubl'ye et d'embarras à touos les maitres tch'embauchent des emplyiyés. Ichîn, où'est qu' douze pour chent d'là populâtion est d'race Afritchaine, et hardi Mexitchaine-Espangnole dans certains êtats dans l'sud du pays, i' y'a tréjous d'la jaloûsie entre les gens tchi s'présentent pour êt' empliyés dans les maisons d'conmêrce, et l'maître est supposé empliyer l'même nombre dé châque race, homme ou femme. Si un homme et eune femme sé présentent pour la même tâche, létché accepter? S'i' disent touos les deux tch'i' sont êgalement instruits et capabl'yes dé faithe la tâche voulue, lé maître peut s'trouver en embarras s'i' prend iun ou l'autre. Lé r'fûsé peut l'actionner pour cause dé favoritisme. La même chose quand y'a tchestchion d'empliyer un homme blianc ou un nègre. Et j'ai connu l'cas où'est tch'il a fallu mett' des hommes bas viyant, qu' la proportion d'hommes et femmes 'tait trop en faveur des hommes et tch'i' fallait êgalîser!

Ch'est bein seux qué l'Congrès Améthitchain n'pensait pon faithe tant d'embarras dans l'conmèrce industriel en pâssant eune louai d'même. Ch'est la bureaucratie êtablyie pour adminnistrer la louai tchi fait tout l'embarras en mettant sén interprétation d'ssus et forchi l'conmèrce à s'y soumettre. Et i' couôte tant pour aver d's hommes d'affaithes à combattre ch't' intèrprétâtion bureaucratique dans les Cours dé Justice qué l'pouôrre conmèrcant décide souvent d'accepter l'înc'modité et taithe sa becque.

Eune aut' embête est qu' en êgalîsant l'empliai entre homme et femme v'la tchi fait la femme vouler travailli dans l'conmèrce et gâgni autant comme sén homme pûtôt qué d'rester siez lyi à garder maîson et souangni d'sa fanmil'ye, et les mousses êl'vés sans seurvillance né pensent qu'à faithe mêché.

Auve lé nombre d'femmes qué j'vai dans La Rue ès Trais Pigeons et dans les boutiques en ville, et même dans les clios à la campangne, j'mé d'mande s'i'y'a bésoin d'itelle louai en Jèrri?

Malheutheusement, jé n'vais pon grand amendement dans l'êtat d'mauvaîtchi et d'vandalisme dans l'Ile vèrs la fin d'l'année. La gâzette du 19 d'octobre annonce pus d'un cas d'viol, et vouot' mangnifique articl'ye d'fond nouos montre qué la Cour dé Police Correctionnelle a trop à faithe pour sé garder au ras d'san travas. La gâzette du deux d'novembre annonce eune condamnâtion pour meurtre, et la cheinne du neuf dé novembre annonce eune séance dé la Cour d'Assise, pour en jugi un aut' pathel cas. Et toutes les gâzettes mentionnent des assauts sus des pèrsonnes dans les rues d'la Ville dé jour comme dé niet. Tchi tragédie pour nouot' vièr Jèrri, aut'fais si paîsibl'ye et si bein adonné à la vie trantchil'ye et agriabl'ye!

Et quand nou pense tch'i' y'a pus en pus bésoin d'r'ligion pour aîdgi à combattre chutte mauvaîtchi dans l'Ile, et qu'en même temps nou vait qué l's autorités ecclésiastiques sont en train d'réduithe lé nombre d'minnistres, et qué l'nombre d'aubèrges grandit à m'suthe qué l'nombre d'églyises et d'chapelles en activité dinminnue, nou sé d'mande si ch'est vrainment la fîn du monde, prédite par les Saintes Ecrituthes, tchi nouos pend sus la tète?

 

George d'La Forge

 

Viyiz étout:

 

Les Pages Jèrriaises