Trenton, Michigan,
U.S.A.
Lé 15 dé novembre, 1975.
Moussieu l'Rédacteu,
Quand nou-s-est hors Jèrri, l'arrivée dé la "Jersey Weekly Post" est eune grand' fête, et j'veins d'èrchéver la cheine du deux d'octobre. Ch'est vrai qu'les nouvelles dédans ont dêjà siez s'maines et qué jé l's avais probabliément veues d'vant tchitter Jèrri, mais v'la tchi n'm'a pon empêchi d'les r'liéthe. Dé chutte distance ch'est comme s'il' 'taient d'à ch't heu!
La chose tchi m'a frappé l'pus dans chutte gâzette est la magnifique lettre dé Messire Robert Mathet, Député d'St. Brélade, au sujet d'la politique en Jèrri. Né v'la eune lettre tchi vaut la peine dé liéthe et tchi dévthait êt' l'êvangile politique dé l'Île, car oulle est plieinne dé sagesse, dé raîson et d'bouan sens. Ou dévthait êt' apprînse par tchoeu par touos l's îndividus tchi n'sont pon Jèrriais d'naîssance ni d'race mais tchi jouissent du privilège dé d'meuther en Jèrri et tchi veulent êt' êlus pour siégi dans L's Êtats et boulevèrser tout ch'tch'a bein sèrvi pour gouvèrner l'Île dans l'pâssé.
I' m'sembl'ye qué L's Êtats ont dêjà considéthé et voté contre la proposition dé la Député Joan du Feu d'empêchi la Police Honorifique dé fouoilli quand oulle est appelée. Ch'est drôle comme y'a des gens tchi veulent favoriser l'malfaîteur et faithe la tâche dé la Police pus difficile, et j'ai hâte dé vaie l'rêsultat d's êlections d'chu mais.
En liêsant qu'les grands batchieaux ont d'la peine à entrer et r'sorti d'la caûchie en ville quand y'a des tempêtes, mé fait penser qu'nou dévthait admither les cap'taines et pilotes tchi peuvent controller des grands navithes dé mème dans eune rélativement p'tite caûchie comme la nouotre, et les condithe travèrs l'entrée tchi n'est pon fort pus large qué l'baté mème. Et quand ch'est des vents d'sud, tchi poussent contre lé bord et toute la londgieu du navithe, i' dait êt' lé dgiâbl'ye à confêsser, en sortant d'l'entrée, à li pointer l'nez au large dévant êt' poussé au pliein contre l'esplanade.
Jé v'nons d'aver eune tempête ichîn auve des dgêles dé vent dé huiptante milles à l'heuthe sus l'grand Lac Superior, et iun d'nouos grands navithes, lé Ernest Fitzgerald, sept chent vîngt-neu pids d'long, a coulé dans eune profonde (525 pids) partie du lac auve sén êtchipe dé vîngt-neuv hommes. Lé Fitzgerald 'tait chèrgi d'trente mille tonnieaux d'minnéra d'fé pour la compangnie Great Lakes Steel Corporation à Ecorse, Michigan, pas bein liain d'ichîn. Autchun membre de s'n êtchipe n'a 'té sauvé. Lé Fitzgerald fut bâti en 1958 dans l'chantchi oû'est qué j'soulions travailli, man fréthe Fraînque et mé, à Ecorse étout, et i' couôtit sept millions d'dollars à bâti et 'tait l'pus grand baté à navidgi les Grands Lacs dans l'temps. Pèrsonne né sait tch'est tch'a 'té la cause dé sa pèrte. Un aut' navithe tchi l'siévait à dgiex milles dé distance viyait ses veues et i' dispathûdrent d'un moment à l'autre, et l'înmage du navithe dispathut dé s'n êcran d'radar en mème temps.
En tempête, l's ieaux des Grands Lacs sont aussi rudes comme la grand' mé d's océans, mais les louêmes sont pus courtes et mème pus dangereuse qué les longues louêmes rouôlantes dé la mé. Les vents du mais d'novembre ichîn sont hardi orageux, et quâsi touos les naufrages dé navithes ont ieu lieu dans les Grands Lacs, sustout dans lé Lac Supérieur, dans chu mais.
En pâlant d'navithes, j'tais content d'vaie qu'la compangnie Condor Ltd, s'en va p't-être acater un Boeing Jetfoil pour la travèrsée dé St. Hélyi à St. Malo. Les Condor en sèrvice ch't êté ont fait la travèrsée un pliaîsi. Ch'est mangnifique quand nou pense qué nou va à Saint Malo dans mains d'la maîntchi du temps qu'les navithes du temps pâssé prannaient à faithe lé viage.
J'mé d'mande si lé "Island Development Committee" a finnalement donné pèrmission au Sieur Bower dé bâti des cottes à couochons dans san clios près des Potithons dépis qué lé "Review Board" a fait sa r'quémande. I' faut donner crédit au Sénateu Shenton pour aver aîdgi au Sieur Bower à pliaidgi sa cause. Quant à mé, jé n'peux sénon penser ès pouorres bêtes à saie tchi sont à l'înjuthe du temps dans un grand clios et à souffri d'la fraid et du mauvais temps d'hivé. À m'n idée, si l'Sieur Bower né r'chait pon la pèrmission d'bâti des cottes, les pouôrres annimaux, dépis qu'la mort l's attend dans autchun cas, es'saient pus heutheux dans l'saleux qué d'êt' à patouoilli dans l'pité.
(Ché n'tait pon lé "Ernest Fitzgerald" mais l'navithe avait nom "Edmund Fitzgerald")
Viyiz étout: