Fort Lauderdale, Florida,
U.S.A.
Lé 20 d'dézembre, 1975.
Moussieu l'Rédacteu,
Dans la gâzette du six d'novémbre, la dreine èrchue ichin, j'viyais l'portrait dé dgiex candidats pour Sénateu dans L's Êtats. J'y r'connais deux vièrs anmîns, les Sénateurs Le Mèrquand et Vibert, tch'ont l'air séthieux et responsabl'ye. La grand' partie ont l'ri sus la fache, et i' pathaîssent tous heutheux et contents. Jé n'sai pon si l'êlection a ieu lieu. Si oui, quatre sus les dgix sont d'sappointés. Sans doute, les Députés Riley et Sandeman restent dans L's Êtats quand mème tch'i' né s'saient pon gangnants. Si Messieux Rondé et Buesné sont pèrdants i' pouorront êprouver pour Député dans lus pâraisses quand y'étha eune aut' êlection.
Eune chose est bein cèrtaine, ch'est tch'i' faut des gangnants et des pèrdants dans toute les êlections, et qu' ch'est un bouan sîngne pour lé bein-être dé l'Île qué y'a un bouan nombre dé candidats pour les postes honorifiques dé san gouvérnément. Mais i' s'en va faller qué touos l's êlecteurs faichent lus d'vé et aller voter pour les candidats connus comme étant solides et en faveur dé consèrver la prospéthité d'l'Île et l'bein-être dé touos ses habitants, pûtôt qué pour avanchi l's intéthêts d'cèrtaines groupes, comme il en est si bein explyitchi dans vouot' articl'ye d'fond, Moussieu l'Rédacteu, dans la “Jersey Weekly Post” du 30 d'octobre.
J'tais bein întérêssi d'liéthe dans chutte gâzette du 30 d'octobre qué l'Député Ph'lippe de Veulle a dans l'idée qué ché s'sait eune vraie punnition d'empêchi les malfaiteurs “dé cachi un moto dans l'Île", et tch'i' voudrait vaie eune louai pâssée pour mett' telle punnition dans l'pouvé d'nouos Cours dé Justice. Eune fichue bouanne idée, man bouanhomme! Et il a fallu un homme auve lé couothage du Député de Veulle pour avanchi eune idée d'mème. La gâzette nouos dit qué l'sujet fut considéthé en 1966, sans succès, dans la Chambre.
Dans par ichîn, lé drouait d'cachi un moto dans l'Île n'a 'té halé qu' à cèrtains motoristes tch'ont d'sobéi la louai tchi concèrne l'ûsage du moto, mais l'idée du Député de Veulle est qué ch't ûsage est dév'nu si nécessaithe pour les bésoins et c'modités d'touos les jours, pour presque tout l'monde, qué v'la tchi s'sait eune vraie punnition si la licence dé cachi 'tait annulée par la Cour pour autchun délit pour eune période pus ou mains longue ou pèrmanente.
Sans doute, eune telle louai es'sait eune si nouvelle méthode dé punni l'monde qu' un tas d'gens, habitués à cèrtaines punnitions dépis l'temps jadis, s'en vont dithe qué ch'n'est pon la chose à faithe dé punni dé mème quand i' n'y'a pon tchestchion d'êt' en contravention d'la bouanne condite d'un moto. Mais i' n'y'a pon d'doute dans m'n idée qué ché s'sait eune punnition pus sévéthe qué d'aver à payi eune amende ou mème d'êt' emprisonné dépis qu'la neuve prison ouffre pûtot un r'pos en trantchilité d'campangne et à côté d'la mé, à la pliaiche du vièr système des travaux forchis dans la vielle prison quand fallait câsser d'la pièrre à londgieu d'jour. Y'a-t-i' rein d'pus înc'modant, prîncipalement pour les jannes, dé n'pouver pon cachi un moto en Jèrri? J'sis bein seux qué, donné l'chouaix dé pèrdre la licence dé cachi ou d'payi eune forte amende, la grand' partie des gens chouaîssithaient d'payi d'amende! Ché s'sa întérêssant d'liéthe lé dêbat dans L's Êtats.
Lé portrait du forgeux Garrett en train d'féther un j'va, dans la gâzette du six d'novembre, mé ramémouaithe mes p'tits jours dans la forge d'man Papa L'Feuvre à St. Ouën. La gâzette nouos dit tch'i' n'y'a qu' trais fétheurs dé j'vaux d'restant dans l'Île et qué l'Sieur Garrett est iun des trais. J'sis content d'vaie tch'il est dans la pâraisse dé St. Ouën. Nouot' pétite forge n'était pon aussi grande comme la cheinne à Maît' “Bill” Farrell à Grantez, mais oulle 'tait dé grande utilité pour les fèrmièrs dé la contrée des Landes.
Quand j'y pense, ch'est assez tchuthieux qué la pus grand' forge à St. Ouën quand j'tais mousse 'tait la cheinne d'un forgeux atout un nom Angliais (“Farrell”), et qué l'seul forgeux dans la pâraisse eune huiptantaine d'années pus tard a un nom Angliais étout! Quand j'tais mousse, les vocâtions continnuaient d'pèthe en fis dans les mèmes fanmil'yes, mais appathemment l'habitude s'est pèrdue à St. Ouën. Dans nouot' cas, sans doute, man p'pèe continnuit la vocâtion d'fanmil'ye mais i' s'en fut à La Côte. Et m'n oncl'ye 'Dalpheussé, forgeux étout, finnit par s'en aller forgi dans la forge d'un nommé Morris au Bel Rouoya. J'tais bein content d'vaie qué l'Sieur Garrett a ieu pèrmission d'bâti eune forge et d'continnuer sa vocâtion à St. Ouën, car pour mé, ma vielle pâraîsse et l'conmèrce d'forgeux et d'fétheux dé j'vaux sont alliés!
George d'La Forge
Viyiz étout: