à Portînfé,
Saint Ou.
Moussieu l'Editeu,
Grace à notre radio, j'pûmes êcouter, la Merrienne et mé, à la deuxième maintchi du Muratti. Comme la grande mâjorité d'nos vaisîns, j'n'avions pas grande espéthance qu'nos hommes pouôrraient gagni, car i' nos sembliait qu'les sélecteurs avaient fait un drôle de chouaix. Quand j'entendîmes qu'après quarante-chinq minutes Jêrri avait fait assez bein, ch'tait tréjous tchiquechose. Mais à ch'teu' nos garçons avaient à jouer contre un fort vent, et nou s'faisait seux qu'les Djérnésiais en prendraient avantage. Mais, nouffé, car une fais que Gorîn avait fait le total trais-zéro, i' sembliaient aver perdu couothage, et pour la dernié dém'ieuthe Jêrri faisait quâsi comme ou voulait. Même à ch'teu, je n'pouvons pas en r'vénîn, et nou-s-aim'thait saver tchèsque Djernézi en crait. Siez fais de siète ils ont 'té battus, et i' dévent en aver grand mal-au-tchoeu. Tant mûs!
Mais, Moussieu, tchi drôle de temps. Lûndi le "Bill" Lé Brun vint m'cherchi pour aller au p'tit "show" d'Saint Hélyi, et y'avait une bliâse si fraide que nou-s-éthait g'lé si nou n'avait pas 'té bein abrié. Y'avait de bouonnes bêtes, mais sinon dans les vieaux d'un an, je n'crais pas que j'vîmes autchune chose tout-à-fait bouon assez pour v'nIn sûs l'Ile, sinon, p't'être, la jeune vaque à Clifford Pallot. Mais jamais nou n'sait, car souvent ch'est une affaithe de difféthents juges, difféthents jugements.
J'mé r'souveins d'la vaque au "Fred" Starck, du Mouothîn, tchi vînt quatrième dans sa clâsse et gagnit le championnat du "show"; d'la vielle vaque à Arthut L'Mèrquand, d'Saint Piêrre, tchi fit hardi la même chose y'a bein d'anées, et d'la belle vaque à la Trin'té que les juges d'la clâsse avaient laissi d'côté, mais tchi 'tait yunne des belles vaques de l'année. Ch'n'est pas d'agniet, Moussieu, qu'nou-s-a veu de drôles de jugements, et ch'est seux et certain que nou-s-en vêrra d'autres.
Après l'"show", lé "Bill" nos prîn pour une p'tite touônée à Saint Cliément. La preumié fais que j'arrêtîmes j'vîmes un bieau bétchet de patates et une bein charmante femme. La ferme est nommée "Alexander Farm", et ch'est là que l'Captaine Le Gresley avait d'meuthé y'a bein d's années. I' fit une p'tite fortune avec des tomates tch'il avait plianté de l'autre bord d'la route. Ch'est le grand des qutre fils au Raymond L'Brun, d'Saint Jean, tch'est là à ch'teu'.
De là j'nos en fûmes à l'autre but d'la pâraisse pour vaie la ferme tch'appartenait au Chantgni Desmathes. Ou fut accatée par le quatrième des fils à Raymond, et si jamais j'ai veu un garçon entreprenant, ch'est li. Il a dêjà fait un tas de r'pathâtions et i' s'en va plianter pûs d'souësante vrégies d'tomates en saison. Nou li souhaite toutes les bouonnes chances.
Pour changi d'sujet, la Merrienne, ayant liut la "Post" hier au sé, r'mertchit que ch'tait honteux d'vaie tant de divorces. "Y'en a pûs que jamais," ou s'fit, "et si chonna continue, i' faudra qu'la Cour siège touos les jours. Vraiement, nou n'peut pas comprendre le monde d'à ch'teu'!"
"Nou-s-avait pûs ou mains prévu chonna quand la louai fut pâssée," j'li dis, "mais quant à mé je n'éthais jamais creu que y'éthait yeu tant d'couplyes tchi n'accordaient pas."
"Mais ch'n'est pas là l'pièthe," ou dit, "car j'ai ouï agniet d'un homme tch'a prèsque quatre-vîngts, et tchi marche avec deux bâtons, tchi s;en va mathier une fille tch'a djais-sept ans. Chonna ne dév'thait pas être permînt, Ph'lip."
"Et comment qu'tu t'en vas l'empêchi?" j'li d'mandis.
"Les Etats dév'thaient pâsser une louai," ou dit, "et si y'a un ministre tchi n'a pas pûs d'idée que d'les prononcer homme et femme, i' dév'thait être sévèthement puni. Peux-tu m'dithe, à qu'menchi, pourtchi qu'une fille tchi 'tait ocquo à l'êcole y'a un an ou deux, veur mathier un homme tch'a bein d'la peine à se t'nîn d'but?"
"Mais oui," j'li dis; "j'n'y vais autchune diffitchulté. Sans doute le bouonhomme a des sous, et sans doute étout ou de f'tha seuze tch'i' li f'tha san testament. Pour lé restant, ou pouôrra trouver moyen de l'envier au rouoyaume des taupes aussi vite que possiblye, épis ou pouorra se r'mathier à tchique bieau garçon."
"Pourtant," ou dit, "i' m'sembl'ye que té et mé, quand j'fûmes nos faithe mathier, je n'pensaimes pas ès sous."
"Damme, nan!" j'li dis, "car j'n'en avions pas, ni té ou mé. Tout ch'que j'avions, à qu'menchi, ch'tait deux apartements, contenant la tchuîsine et la chambre, mais d'vant long chonna ne suffisait pas, car la famille vînt vite."
"P't'être un mio trop vite," ou s'accordit, "mais, après tout, nos mousses ont touôné bein. Ouèsque je s'saimes, au jour d'agniet, sinon pour l'aide que notre grand, lé Bram, nos a tréjous donné."
"Dans l'chim'tièthe ou à l'Hôpita," j'li dis, "mais Merrienne je n'te pas félicité sûs l'appathence de tan gardîn. Vraiement jamais je n'éthais creu tch'il éthait flieuthi comme il a fait, malgré les limaches, les colînmachons et les taupes. I' n'y a pas pûs bé dans tout l'vaisîné. Ma bordeuse étout en a fait hardi chutte semaine."
"Ch'est la natuthe," ou dit. "I' n'faut jamais perdre epéthance. Au mais d'janvyi tout pathaissait fichu, mais nouffé, pas d'un bieau but. À ch'teu', Ph'lip, voudrais tu deux p'tits d'gouts de raffraîchissements?"
"Bein seux qu'oui, ma vielle," j'li dis, "ch'est ma natuthe."
Ph'lip
Jersey Weekly Post 11/5/1963
Viyiz étout: