Fort Lauderdale, Florida,
USA.
Lé 26 d'mar, 1977.
Moussieu l'Rédacteu,
J'veins d'èrchéver deux gâzettes dé Jèrri dans la s'maine, les cheinnes du 27 dé janvyi et du 3 d'févri. Ch'tait mangnifique d'aver d'tchi liéthe entouôrre l'île ouaithe qué ch'est des nouvelles tch'ont dêjà d'l'âge. Mais ch'n'est rein d'nouvé d'aver d'l'âge. J'en ai étout. Et j'sis attristé d'vaie tant d'vièrs anmîns tch'en avaient et tch'ont pâssé l'pas dreinement. Lé drein est Pat Rumfitt. Ch'est drôle, j'avais r'chu la nouvelle dé san décès d'Australie dévant lá ouï d'Jèrri. Un charmant corps qu'un tas d'campangnards respectaient ouaithe tch'il 'tait villais. V'la tchi lî fît hardi mal au tchoeu d'pèrdre sa dreine êlection pour Sénateu, et nou n'ouiyait pon pâler dé lî ches dreines années.
Eune grand' partie des deux gâzettes est remplyie par les débats dans L's Etats au sujet des tîmbres et du Conmité Postal tch'a ieu à dêmissioner, et ch'tait întérêssant d'liéthe les discours des membres pour et contre. Appathemment, y'en avait pus du côté contre et l'Sénateu Shenton 'tait du côté gângnant. I' s'en va en aver pliein ses braies à presider l' IDC et l'Postal étout, mais i' pathaît tch'il est un fort mâtîn et tchi peut travailli comme deux. En liêsant touos les discours, j'crai qué ch'tait Moussieu d'Rôzé tchi fit l'pus bé. J'avons la chance d'aver des mêssieux comme li et Moussieu d'La Trinneté dans L's Etats.
Dans la gâzette du 27 dé janvyi, lé portrait du Connêtabl'ye Le Mèrquand d'St. Pièrre présentant un bâton d'justice à Moussieu l'Bailli est mangnifique. Ch'est un bouan portrait d'touos les deux, et ch'est seux qu' Moussieu l'Bailli s'en va l'enfrêmer car à ch't heu tch'il est en possession officielle d'un bâton d'justice dé la pâraisse dé St. Pièrre, il est en êffet membre dé la Police Honorifique dé chutte pâraisse, et Bailli en même temps!
Lé plian d'présèrver la vie des êcoles Catholiques dé l'île est simpl'ye assez dans l'cas du Couvent FCJ en ayant l'île à payi les frais d'couôrre l'êcole. Mais l'affaithe ne pathait pon si simpl'ye dans les cas d'Beaulieu et De La Salle. Toutes les églyises tch'ont d's'êcoles à maint'nîn ont fort à faithe dé nouos jours.
J'vai tch'i' y'a tant d'maîsons bâties à Dgi l'Adèrt dans la pâraisse dé St. Brélade qué même lé Connêtabl'ye d'La Haye l'Sénateu Madanme Hueulîn en sont enouorfantés. Et Madanme Hueulîn dit tch'il est temps d'organniser un plian pour bâti. Il est bein trop tard! La pâraisse est gâtée à ch't heu, et la preuve en est qu' la gâzette en pâle comme eune pâraissse en d'sordre. Ch'est amûsant d'vaie tch'il a fallu un moussieu auve lé goût du Sénateu Ralph Vibert pour dithe tch'i' voulait vaie un mio d'gardîn et des bouais entre les neuves maisons tchi s'en vont bâti au Pont du Va. Et i' faut donner san drouait étout au Sénateu Jeune pour aver suggéthé tch'i' dév'thait y'aver un mio pus d'tèrrain entre les maîsons. I' n'y'a qu' à faithe eune touannée l'tou d'la contrée des Tchennevais pour vaie comment qué quâsi toutes les maisons sont bâtis l's eunes sus l's autres comme des casses à lapîns. Où'est tch'est l'temps qu' les maîsons en granit tch'avaient du caractéthe? Mais, quand nou-s-y pense, i' n'y'en a presqué pon d'restant, d'Jèrriais. Et comme architectes et bâtisseurs dé maîsons sont à lus enrichi, i' veulent comme i' peuvent sus eune pèrque d'tèrre!
J'sis bein content d'vaie qué L'Assembliée d'Gouvèrneur, Bailli et Jurés, tchi donne les licences ès aubèrges, s'en vont env'yer chînq des Juges vaie si cèrtaines dé ches aubèrges ont assez dé p'tites maîsons pour les bésoins d'lus clients. Ch'est bein amûsant, quand nou-s-y pense. Tant pus qu' ches ivrouangnes baivent, tant pus qu' ch'est nécessaithe dé faithe du run pour pus d'baithie, ch'est en tchi i' faut lus fourni les prémisses pour y suffithe! Ch'est logique, sans doute, et ch'est bouan pour lé conmèrce dé la bouaisson et ch'est tout au profit d'l'aubèrgiste dépis qué v'la tch'agrandit sa vente dé litcheu et d'biéthe. Mais quant à mé, j'aimethais mus liéthe dans la gâzette tch'i' sont à env'yer les Juges pour les freunmer, l's aubèrges, et ch'est seux tch'i' y'a un tas des femmes des goudaleurs dé biéthe tchi sont dé m'n idée étout!
L'bouanhomme Alphonse Le Gastelois a pus d'ambition qu' mé. D'après l'articl'ye dans la gâzette du 3 d'févri, le titre dé Seigneur dé Patronage du Fieu des Êcréhous, tch'i' voulait adopter, pathait êt' péthînmé ou bein il est p't-êt' engaûmé dans iun d's aut fieus d'lá pâraisse dé St. Martin. Lé Sieur Le Gastelois éthait deu s'couronner Rouai des Êcréhous lî-même, et pèrsonne né l'éthait empêchi. I' y'en avait iun quand j'tais mousse tchi s'donnait chu titre-là. Ma fîngre, j'ai oublié san nom. Né v'la eune preuve qué j'mé vieillis à grands pas!
George d'La Forge
Viyiz étout: