Fort Lauderdale,
Florida, USA.
Lé 19 dé janvyi, 1980.
Moussieu l'Rédacteu,
J'sis chanceux, chutte sémaine. J'ai r'chu la gâzette dé Jèrri du 22 d'novembre dé l'année pâssée, et j'l'ai lieue tout l'travèrs sans arrêter quand l'porteux d'lettres l'a apportée.
J'ai grand r'gret d'vaie l'décès du Sieur Snowdon Amy dans chutte gâzette. J'savais bein tch'il 'tait malade, mais jé n'savais pon tch'i' n'tait pus du rang des vivants, et j'prends ch't' occâsion pour faithe part dé mes grands r'grets et condoléances à Mesdanmes La Maistre, Vautchi et Holley, ses soeurs, et à ses êfants et sa fanmil'ye. Un charmant moussieu si janmais y'en a ieu iun, l'Sieur Snowdon, doux d'caractethe, tréjous riant et av'nant et tréjous prêt à rendre sèrvice et faithe un pliaîsi. I' n'méthitait pon d's'en aller si janne, et l'vièr diton qu' ch'est les bouans tchi s'en vont m'est v'nu à l'idée en liêsant les décès dans la gâzette.
Un aut' décès tchi m'a frappé en ouvrant la gâzette est l'chein d'man couôsîn (par mathiage) Ronald Alfred Hunt, “Town Surveyor” pour la ville dé St. Hélyi. I' s'adonnait qué j'tais en Jèrri dans l'temps d'san mathiage à ma couôsinne, et j'eus l'pliaîsi d'aller à lus neuches. Mes r'grets et condoléances vont à ma couôsinne et à ses êfants et à la fanmil'ye Hunt.
La preunmié page dé la gâzette nouos annonce la fête, honorée et ornée par la présence dé Sén Altêsse Rouoyale lé Prînce Philip, tchi produisit eune somme dé huiptante-huit mille louis pour la charité. I' faut êt' èrconnaîssants à Messire Ouoyamme Butlin et sa danme, tchi fîdrent tant pour tchêter chutte mangnifique somme. Mais faut-i' tch'i' y'ait des hèrpîns en Jèrri, man bouanhomme!
Eune chose hardi întérêssante pour mé est lé p'tit but dans “Meridian” entouôr lé Ford trimoteur avion, bâti à Detroit, Michigan, en 1919 et tchi s'trouvit en sèrvice à Papua, dans La Nouvelle Dginnée. La chose tchi m'întérêsse est qué, d'après l'articl'ye mentionnée par Madanme Ingham, dé Port Moresby, l'avion en tchestchion fut fait sèrvi comme avion pâssagi en Jèrri dans l's années 1930 et auprès. J'ai connu l'avion tout à fait bein et j'ai monté à bord bein des fais. Ch'tait un avion construit entchiéthement en méta et tchi, à cause dé ses trais motos, 'tait considéthé absolûment seûthetabl'ye, et un tas d'pèrsonnes tch'avaient normalement peux d'monter en avion 'taient aisîement persuades d'monter dans ch'tî-là. Y'en avait iun dans l'hangar dé l'aérodrome privé dé la Ford Motor Company à Dearborn, près dé Detroit, Michigan, et nou pouvait faithe un court viage dédans, un tou en d'ssus la contrée, en payant chînq dollars par pèrsonne. J'ai convié plusieurs anmîns du Cannada tchi v'naient m'vaie à un tou d'dans, et il' en 'taient êmèrvilyis.
L'avion Ford tri-moteur a ieu eune réputâtion fabuleuse, et la preuve en est qu' nou l'trouve mentionné comme étant d'sèrvice dans des pays si liain l's uns d's autres comme l'Île dé Jèrri et La Nouvelle Dginnée, tch'est d'l'aut' côté du monde, et en Améthique. Il 'tait hardi en veue un 1939 ichîn quand j'tais à apprendre à êt' pilote aviateur dans l'aérodrome tch'est lé “Metropolitan Airport” dé Detroit, Michigan, à ch't heu.
Dans chu temps-là, j'travaillais dans un chantchi à River Rouge, Michigan, où'est tch'était l'quartchi-général dé la “Ford Motor Company” et j'tions à bâti des navithes pour chutte compangnie. Lé bouanhomme Henry Ford v'nait souvent dans l'chantchi vaie l'progrès sus ses navithes, et il emm'nait ses deux p'tits-fis, Henry Ford II et Benson Ford, fis d'Edsel, auve li. I' n'avait pon d'ordgi. I' pâlait à tout l'monde.
Un homme èrmèrquabl'ye sus bein des sens, l'bouanhomme Henry Ford. Ouaithe tch'il 'tait millionnaithe, eune pèrsonne né gângnait rein d'lî d'mander pour des sou comme aîgue, même s'il' 'tait dans l'bésoin. Mais il 'tait prêt a lî louer un mio d'tèrre gratis, et fourni graisse et graine pour l'ens'menchi s'i' voulait travailli. I' n'pouvait pon supporter la pièrcheûtheté, et il 'tait d'avis qué ch'tait faithe un pièrcheux d'donner ses sou à un homme sans tch'i' travaillîsse pour. Sus bein des sens, i' m'faîthait penser à un vièr Jèrriais du temps pâssé.
Il êl'vit san fis Edsel à travailli, et Edsel fut un dîngne fis d'san péthe. Malheutheusement, i' mouothit d'un mauvais ma quand i' n'avait pon fort pus qu' chînquante ans. San fis Henry Ford II s'est prouvé dîngne héthitchi d'ses péthe et grand-péthe. Il est iun des grands hommes dé conmèrce en Améthique au jour d'aniet.
George d'La Forge
Viyiz étout: