Fort Lauderdale, Florida,
U.S.A.
Lé 30 dé mar, 1968.
Moussieu l'Rédacteu,
Un aut' jour dé fête pour mé! J'veins d'èrchéver deux gâzettes dé Jèrri, les cheinnes du tchînze et vîngt-deux d'févri, et j'ai ieu l'nez d'dans tout l'jour! Comme d'amors, j'ai c'menchi par les décès, et comme d'amors j'ai r'gardé combein d'vièrs noms Jèrriais tch'i' y'avait d'dans. Sus quarante y'en a sept, et sus trente-ieune naissances y'en a quatre! Sans doute y'en a deux-s'trais tchi c'menchent à êt' Jèrriais dé p't êt' trais ou quat' généthâtions. Ch'est seux qué d'ichîn tchiques généthâtions à v'nîn, i' s'sont péthinmès, les vrais noms Jèrriais - et la langue Jèrriaise étout, à mains qu'les membres d'L'Assembliée d'Jèrriais faichent lus êfants l'apprendre et la pâler! Et les Jèrriais d'l'av'nîn né s'sont pus d'puthe race Nouormande!
Ch'est intérêssant d'liéthe chein tch'i' s'passe dans l'Île quand nou d'meuthe à l'êtrangi. Ch'est bouan signe, par exempl'ye, dé vaie tch'i' né s'sa p't êt' pon nécessaithe dé bâti eune neuve prison auprès tout. V'la tchi montre qué l'Avocat L'Bro avait raison quand i' nouos disait ch'la dans ieune dé ses lettres à la gâzette y'a tchique temps. J'n'ai pon l'honneu dé l'connaître pèrsonnellement, l'Avocat, mais j'sai bein tch'il a des p'tits boudîns dans la tête! I' tcheint d'san p'pèe (qu'j'ai bein connu dans san vivant) pour chenna!
J'avais pensé tch'i' n'y éthait pon fort d'accidents auve les motos l'hiver, viyant tch'i' y'en a hardi d'mains par les c'mîns auve touos les visiteurs houors siez ieux, mais j'vai tch'i' y'en a acouo souvent. Eune chose tchi m'êtonne, étout, est qué l'Juge Substitut à la P'tite Cour est d'avis qu'ch'est dangereux d'aver un radio en allant dans un moto quand nou-s-est à l'cachi. Si ch'tait d'mème ichîn en Améthique, touos les motoristes es'saient en dangi, car i' n'y a pon fort dé motos tchi n'ont pon un radio d'dans!
J'sis tréjous content d'vaie les portraits des gens qué j'connais. I' n'en manque pon dans les deux gâzettes! À c'menchi, y'a les cheins d'Moussieu l'Bailli et sa danme - èrvénue dé Singapour, Penang et Hong Kong - des villes orientales si fascinnantes qué j'îthais acouo les r'vaie d'bouan tchoeu ouaithe qué j'y ai dêjà 'té pus d'eune fais! Et pis y'a l'portrait d'Moussieu Bouais, l'Député Bailli. Quand j'vai les portraits d'Moussieu l'Bailli et d'san député, v'la tchi m'ramémouaithe qué j'connaissais lus péthes quand i' n'avaient pon 'couo mème un gris j'veu sus la tête. Et j'ai tréjous pensé qu'ch'est danmage tch'i' vêtchûdrent pon longtemps assez pour vaie lus fis assis dans l'pus haut siège dé justice dans La Cour Rouoyale - un siège tch'est acouo pus haut qué l'chein du Gouvèrneux!
Un aut' portrait m'montre la fache souôriante du Connêtabl'ye J'Valyi d'St. Brélade. Un bouan vièr St. Ouënnais! Et i' m'sembl'ye aver ouï qué l'nouvieau Chent'nyi Lucas est d'souche St. Ouënnaise étout. Tch'est faithe quand i' n'y étha pus d'Gris-Ventres dans lus pâraîsse pour êt' dé la police?
Acouo un aut' portrait tch'i' m'fait pliaîsi d'vaie dans la gâzette est l'chein du Sieur F.E. (Sam) Ernon, rouai des bourdons! Un charmant moussieu tchi n'a pon d'peux d'êt' pitchi, et tch'a un caractèthe doux comme lé myi d'ses bourdons! J'lé félicite d'aver 'té êlu président d's amateurs dé moûques à myi, un honneu bein méthité.
Et ch'est mangnifique dé vaie l'bieau portrait d'l'entrée du chînm'tchiéthe dé St. Brélade. J'crai bein qu'j'ai passé pus d'fais souos chutte belle arche-là qu'autcheune autre arche en Jèrri, car j'y passais deux-s'trais fais dinmanche et sus s'maine quand j'tais dans l'chant d'l'églyise dans man janne temps.
Lé projet d'haler l'sé dé d'dans l'ieau d'la mé à La Rosièthe est ambitieux. J'en pâlais à un Améthitchain l'aut' jour, et il 'tait êmèrvilyi qu'eune pétite ile comme Jèrri avait l'mouoyen d'payi les frais nécessaithes pour eune entréprînse dé mème tch'est r'connue comme étant hardi couôteuse. J'vouos félicite, Moussieu l'Rédacteu, pour l'articl'ye d'fond dans la gâzette du tchînze févri au sujet du contrôle d'sithabl'ye dans la compangnie des ieaux. I' faut espéther tch'i' s'en vont trouver tchique mouoyen d'chèrgi pour l'ieau sus l'prîncipe dé payi pour la quantité tch'est faite sèrvi. Nou sait bein qu'les machinnes pour m'suther l'ieau couôtent des sou, mais y'éthait p't êt' mouoyen d'en acater à miyeu marchi qu'nou n'pense. La compangnie a-t-alle êprouvé d'en marchander au Japon? Pourtchi-pon si v'la tchi sauve des sou? J'acatons un tas d'tchi en Améthique tch'est fabritchi au Japon!
En autcheun cas, i' m'sembl'ye qué ch'est riditchule dé payi pour autcheune chose sus autcheune aut' mannièthe qué la quantité faite sèrvi!
J'vai qu'la cheunm'né à La Rosièthe étha chent vîngt pids d'hauteu. Jèrri c'menche à aver des hauts monuments! L'mât ès Pliatons, l'gratte-ciel au Havre des Pas et des hautes cheun'mnées à La Collette et à La Rosièthe! S'il' 'taient touos en lîngne et au mème nivé, v'la tchi f'thait Jèrri, veu d'la distance èrsemblier à un navithe à vailes du temps jadis!
George d'La Forge
Viyiz étout: