Fort Lauderdale, Florida,
U.S.A.
Lé 26 d'avri, 1969.
Moussieu l'Rédacteu,
J'veins d'èrchéver la gâzette du six d'mar. Oulle a 'té chîn s'maines à faithe la travèrsée entre 'chîn et Jèrri. Oulle est quand-mème la beinv'nue, car ch'est tréjous un rayon d'solé dans l'sombre ciel d'exil d'un Jèrriais à l'êtrangi quand i' r'chait des nouvelles dé d'siez-li!
Tant pus qué l'temps va, tant pus nou vait qu'les mèmes mînséthes arrivent un mio partout l'monde civilisé. Par exempl'ye, j'sommes embêtés à londgieu d'années ichîn en Améthique par les grèves - autorisées ou pon par les sŷndicats travaillistes - dans toutes sortes d'activités, et ch'est tréjous l'pouôrre dgiâtre d'contribuabl'ye tchi souffre et tchi paye à la longue, car châque grève des travailleurs fait l'couôtage d'la vie renchiéthi. Dans chutte ville 'chîn, j'avons des grèves par les tchèrpentchièrs, les machons, l's êlectriciens et autres, et des chentaines dé maisons à maîntchi bâties sont à l'abandon. Lé rêsultat s'en va sans doute être qué châque maîson s'en va couôter un coupl'ye d'mille dollars dé pus eune fais bâtie. L'entrépreneur s'en fiche, li. I' s'en va payi pus d'gages mais ché s'sa l'acateux tchi paietha pour à la longue!
En pensant à tout chu tripot-là, j'ouvre la gâzette dé Jèrri, et la preunmié chose qué j'vai est qu'les travailleurs tchi sont à creûser la tonnelle souos l'Mont d'La Ville sont en grève pour la traîsième fais ch't année! Bon!, j'mé dis à mé-mème, en Jèrri étout? Eh bein, bouannes gens, i' dév'thait y'aver eune louai contre les grèves. I' n'y a pon autcheune raison tch'empêche l'ouvriyi et san maître dé lus assiéthe trantchilement et distchuter l'affaithe en dispute à tête èrpôsée s'i' sont touos les deux raisonnabl'yes. S'i' n'y sont pon, y'a mouoyen d'mett' l'affaithe dévant tchique sorte d'consil-arbitre. Malheutheusement, autcheune chose tch'est si sîmpl'ye et pratique n'est pon populaithe auve les grosses têtes tchi dirigent les sŷndicats!
J'vai étout, qu'les fèrmièrs en Jèrri s'en vont aver à payi d'pus hauts gages à lus travailleurs. Comme s'i' n'avaient pon dêjà fort a faithe pour gangni un mio d'profit à la fin d'trais chent souoxante-chîn jours dé travas par an! V'la tch'îthait bein s'il' 'taient asseûthés qué l'prix des patates s'en allait hauchi, et que l'boutitchi dans l'marchi s'en allait lus donner douze sou à la pliaiche dé siex sou pour eune caboche! Lé temps s'en va v'nîn qué l'fèrmyi es'sa si d's'encouothagi tch'i' tchit'ta l'fèrmage pour dév'nîn journalyi sus eune aut' ferme li-mème! I' traval'la mains d'heuthes la s'maine, n'étha pon d'responsabilités et s'sa seux d'ses sou!
J'èrgrette hardi d'vaie qu'la tragédie des drogues s'êtend jusqu'en Jèrri. Ch'est un traffi tch'est responsabl'ye pour un tas d'mînséthe et d'troubl'ye ichîn, et probabliément dans d'aut' pays étout, et tch'est en grand' partie responsabl'ye pour la mauvaise condite d'un tas d'jannes malfaiteurs dans nouos grand' villes.
Heutheusement qu'toutes les nouvelles dans la gâzette né sont pon mauvaises. Ieune des choses tchi m'fait pliaîsi est d'vaie qué l's hôtels sont d'avis d'aboli l' pourboire (tip en Angliais). J'mé sis souvent d'mandé pour tch'est tch'i' n'chèrgent pon l'dgix pour chent d'pus pour lé r'pas et l'donner ès cheins tchi sèrvent à tabl'ye. Dé mème, i' s'saient seux d'lus coup. Et pis - en prîncipe - pour tch'est qué l'client tchi veint dîner paiethait eune partie des gages dé l'empliyé d'l'hôtel?
J'tais hardi întérêssi d'vaie que l's Anglyicans et les Méthodistes en Jèrri ont vote en majorité pour lus entr'joindre. Si j'avais 'té en Jèrri dans l'temps, j'éthais 'té du côté votant contre. J'sis d'l'avis du Sieur Alan Colback, comme i' nouos l'est dit dans la gâzette du 27 févri, qué nou n'dév'thait pon forchi les Méthodistes à soumettre les minnistres - dépis tch'i' n'y craient pon - à l'acception d'la Succession Apostolique tch'est la base dé la prêtrise dans l's églyises Anglyicanne, Romaine, Orthodoxe et Coptique, comme il est si bein explyitchi par lé Sieur John S. Hitchcock dans la gâzette du 6 d'mar, 1969. Un tas d'mes bouans anmîns sont Méthodistes et pathaissent heutheux et contents d'y être, et j'respecte lus convictions. Pourtchi don êprouver à les faithe èrvénîn dans eune églyise tch'il ont tchitté d'lus puthe et entchièthe volante? I' s'sont r'chus à bras ouverts autcheune temps tch'i' veulent y r'vénîn îndividuellement, et i' n'faut pon oublyiyer qué s'i' jouaignent l'Églyise Anglyicanne en blio i' pèrdront lus identite dans p'tits d'temps viyant tch'i' s'sont engaûmés par eune églyise bein pus grande qué la leu!
Comme Anglyicans, jé d'vons un vote dé r'mèrciments au Sieur Hitchcock pour aver si bein explyitchi la Succession Apostolique dans sa lettre, eune explyication tchi f'thait l'sujet d'un sèrmon întérêssant dans nouos églyises, et tchi f'thait tant d'bein viyant tch'i' y'a tant d'Anglyicans tch'ont bésoin d'apprandre l'histouaithe et l'originne dé lus églyise!
George d'La Forge
Viyiz étout: