San Antonio, Texas,
U.S.A.
L'preunmyi d'avri, 1967.
Moussieu l'Rédacteu,
Ch'est tréjous eune jouaie pour mé d'èrchéver eune gâzette dé Jèrri, et ch'tait eune doubl'ye jouaie chutte sémaine viyant qu'j'en ai r'chu deux en mème temps, les cheinnes du neuf et du vîngt-trais d'févri. La cheinne du seize févri 'tait v'nue y'a tchînze jours. Il' arrivent dé mème à Dgi l'adèrt dé temps en temps, mais v'la tchi n'l'est fait pon mains beinv'nues!
Pour un Jèrriais à l'êtrangi y'a tant d'choses întérêssantes dans ches deux gâzettes-là qué v'la tchi li donne eunne idée du penser des gens dans la communauté d'un Jèrri tchi n'est cèrtainement pon l'Jèrri d'ma jannèche! Quand j'vai, par exempl'ye, en liêsant l'compte rendu des discours dans l's Êtats qué lus apèrchu pour 1904 'tait trente mille louis, et qué l'aperchu d'aujourd'aniet est un d'mié million d'louis pour lé départément des téléphones seulement, sans pâler d'touos l's autres, ch'est assez pour faithe les vièrs membres d's Êtats d'y'a septante ans touânner dans lus côffres! Et v'la tchi m'ramémouaithe qué quand j'tais mousse dans Hill Street lé salaithe du Bailli 'tait mille louis par an. Dans chu temps-là nou criyait qué ch'tait eune vraie forteune! Mais à ch't heu? Dans san discours dans l's Êtats au sujet du propos d'payi les membres, lé Sénateu Cyril Lé Mèrquand mentionnit tch'i' y'a deux-s'trais fonctionnaithes dans l's offices du gouvèrnément d'Jèrri tchi gangnent trais fais autant par an!
Appathemment, personne né pathaît content d'sa gangne dé Dgi en Jèrri à ch't heu. Certains membres d's Êtats sont en faveur d'êt' payis. J'avais tréjous pensé, comme lé disait l'Député Tchéthée l'aut' jour, qu'un Député considéthait sa tâche comme étant un sèrvice grâtis à ses parouaissiens et tch'i' les r'présentait tous - riches ou pauvres, fèrmièrs, ouvrièrs, domestiques, gens d'vocation et commerçants - mais d'nouos jours i' pathaît y'aver un certain nombre d'gens dans la communauté tchi craient tch'i' dév'thaient aver des privilèges qué d'aut' n'ont pon, et qu'lus r'présentants dév'thaient êt' payis pour tâchi d'tchulbuter l'êtat des choses tch'a engendré la prospéthité pour lé pus grand nombre! Ch'est tous tchi d'mandent pus d'sou! La pâraisse dé St. Cliément a ieu à payi entre 140 et 160 louis la s'maine pour eune volée comme assistance publyique! Y'a pâlement d'hauchi l'prix d'passage par air et en mé entre l'Angliétèrre et l's îles. Les batchieaux s'en vont aver à payi pus pour amathage dans la cauchie, et l's avions pour mett' pid à terre à l'aérodrome. I' s'en va couôter pus pour env'yer les mousses au Collège Victoria. Les travailleurs veulent pus d'gages. L's hôtels continuent à chèrgi pus viyant tch'il' ont à payi pus pour la main-d'oeuvre. Les restaurateurs ont décidé d'payi quarante pour chent d'pus d'gages à lus emplyiyés tchi veinnent dé l'êtrangi. V'la tchi veurt dithe qué les r'pas s'en vont renchiéthi à proportion. L'affaithe n'en finnis janmais! Est-che ravissant qu'tout renchiéthis dans les boutiques? I' n'y a qué l'pouorre dgiâtre d'fèrmyi, tch'est à l'înjuthe des marchièrs, tchi n'est janmais seux d'faithe assez d'sou pour couvri ses frais - sans pâler d'rêcompense pour san travas!
Et quantchi qué l's Êtats s'en vont autoriser les restaurateurs et les fèrmièrs à dêdithe un impôt sus l'èrvenu d'lus gages en payant lus travailleurs tchi veinnent des pays êtrangièrs? J'ai tréjous ouï tch'i' n'en paient pon d'impôts, ches gens-là et ché s'sait eune maniéthe simpl'ye et seuthe et cèrtaine dé les faithe payi! Y'en a tchi craient qué v'la tchi l's empêch'chait dé v'nîn travailli pour tchiques mais d'êté, ch'est sîngne, à m'n idée, tchi font assez d'sou pour pouver faînianter siez ieux l'hiver, et i' n's'en vont pon laîssi un împôt raisonnabl'ye l's empêchi d'en prandre avantage!
J'èrgarde tréjous les portraits dans la gâzette. Y'en a un bé dé m'n anmîn l'Connêtabl'ye J'valyi d'St. Brélade, un bouan vièr St. Ouënnais, sus la dreine page dé la cheinne du neuf dé févri. À vaie l'chein du Connêtabl'ye Ryan sus la septième page, auve deux-s'trais Députés, nou dithait tch'il a râsé sa barbe - car nou peut vaie san collet souos san mouton! Un aut' portrait qué j'tais content d'vaie est l'chein d'Mad'mouaîselle Constance Brown, M.B.E., à châtchi d'main auve l'illustre Lord Coutanche. V'la tchi m'ramémouaithe qué j'la vai tréjous à sa pliaiche dans l'chant d'l'églyise dé St. Brélade quand j'sis en Jèrri. Ou' peut chanter aussi bein comme ou' peut nouer!
Et j'èrconnais l'haut du Mont ès Anes, et la propriêté d' Mess Hubert West End (ch'tait d'mème qué nou l'appelait quand j'tais mousse!) où-est qu'nou vait les gens à plianter à l'Êta, sus la traîsième page. V'la tchi m'fait pliaîsi, étout, d'vaie un j'va et un hèrnais dans les routes dé ma pâraisse natale, acouo eune preuve qué ché s'sa d'dans qu'les vielles couôteunmes vèrront la fîn d'lus jours!
J'sis tréjous ordgilleux d'vaie l' Football Club dé St. Ouën gangni, mais j'mé d'mande tch'est tch'est dév'nu des vrais Jèrriais St. Ouënnais. I' n'y a qu'un vièr nom Jèrriais - un Payn - parmi les noms des joueurs mentionnés à la page treize dé la gâzette du 26 d'févri!
George d'La Forge
Viyiz étout: