Trenton,
Michigan,
USA
Moussieu l'Rédacteu.
Dans la gâzette du huit dé mar, tchi m'attendait ichîn en m'en r'vénant du Cannada, j'vai qué l'Mangni d'La Hague, à St Pièrre, s'en va dév'nin eune êcole. J'sis bein content d'vaie ch'la pûtôt qué d'vaie chutte mangnifique propriêté-là s'en aller dans les mains d'êtrangièrs dé hors-pays. Mais est-ch' qué ch'n'est pon tragique tch'i' n'ya pon d'héthitchièrs Jèrriais à rempliaichi les Seigneurs d'aut'fais?
J'm'èrsouveins d'aver 'té au Mangni d'La Hague bein des fais dans l's années d' 1907 à 1912 quand l'Juge Francis Vibert Le Feuvre, dé mémouaithe respectée,'tait Connêtabl'ye d'St Pièrre et qué j'tais san ségrétaithe. Quand y'avait tchiquechose d'împortance tchi fallait l'support et l'approbation du Coronel C P Le Cornu, C.B. et Aide dé Camp au Gouvèrneux, Moussieu d'La Hague, lé Connêtabl'ye m'enviet lî d'mander dé nommer l'heuthe et jour tchi lî conveindrait pour eune consultâtion. Le Connêtabl'ye considéthait qué ch'tait pus dîngne et à propos dé faithe ses arrangements d'même qué d'faithe sèrvi l'téléphone, car lé Coronel 'tait catouoilleux quand ch'tait affaithe dé "protocol".
Un charmant moussieu, lé vièr Coronel, quand nou v'nait à l'connaître, mais il avait l'air sévéthe et aristocratique. I' mé r'chévait dans s'n office dans l'Mangni, et quand j'lî d'mandais quandtchi qué v'là tchi lî conveindrait d'èrchéver l'Connêtabl'ye pour considéther telle et telle affaithe dé paraisse, sa rêponse 'tait tréjous dé dithe au Connêtabl'ye qué ché s'sait à sa convênience, et d'lî téléphoner lé jour dévant v'nîn au Mangni pour arrangi l'heuthe dé s'n arrivée. Nou peut dithe, en fîn d'compte, tch'il 'tait tréjous prêt à s'arrangi aîsiement auve lé Connêtabl'ye, mais tch'i' fallait lî faithe l'honneu dé l'consulter en pèrsonne "au préalable" comme disent les hommes d'affaithes, et pis nou pouvait finni l'arrangement par téléphone.
J'vai qué lé "Jersey Democratic Movement" a êlu un nouvieau conmité exétchutif. J'tais tchuthieux d'vaie combein tch'i' y'avait d'Jèrriais d'dans, et j'vai que sus onze membres i' n'y'a qué quatre noms Jèrriais. Ch'est seux qué ches quatre-là n'ont pon ieu l'bénéfice d'aller a l'êcole politique du vièr parti du Louothi à St. Ouën!
I' m'sembl'ye qué l'conmèrce des drogues n'a pon molli en Jèrri, et qu' la Cour passe hardi d'san temps à jugi des causes qué chu trafi-là apporte. Ch'est un trafi tch'est si profitabl'ye qué ch'est quâsi împossibl'ye dé l'empêchi. Dans chu pays 'chîn la police l'a trouvé împossibl'ye jusqu'à ch't heu. Les drogues, prîncipalement lé hachisch (ou "cannabis"), veinnent en gros dé certains pays dé l'Améthique du Sud par baté et par avion, et ouaithe qué l's autorités ont agrandi l'nombre d'agents tchi sont en garde niet et jeu, lé conmèrce agrandit en même temps. Sans doute, les deux côtes dé la Floride sont longues, comme ou pouvez l'vaie sus la carte géographique, et i' faudrait eune "armada" dé navithes dé dgèrre pour empêchi les batchieaux fraudeurs dé dêchèrgi lus cartchaisons dé drogue, prîncipalement la niet. Et les p'tits avions, tchi peuvent quand même porter eune bouanne cartchaison, attérrissent un mio partout dans les contrées tchi n'sont pon fort habitées
Les pays d'l'Améthique du Sud tchi fournissent les drogues né sé d'mentent pon d'empêchi l'conmèrce viyant qué v'la tchi lus rapporte des millions de dollars des Etats Unis touos l's ans.
J'vai qu' ou-s-avez l'même problème en Jèrri comme ichîn au sujet d'prédithe lé temps. Tout l'monde sé pliains qué la prédiction du "Bureau Météorologique" - ichîn et au Cannada - est fautive a un dégré abominabl'ye. L'articl'ye du Sieur Roger Thébault au sujet dans la gazette du huit dé mar est don întérêssante. Ou nouos donne tchiques bouannes explyications des raîsons pour tchi tch'il est împossibl'ye dé prédithe le temps pour pus d'vîngt-quatre heuthes à l'avanche. Quant a mé j'ai tréjous admithé la manniéthe qu'les vièrs fèrmièrs en Jérri lèvent lé nez en haut et r'gardent lé ciel en général, et les nuages en parthchulyi et prédisent le temps pour démain. I' n'y'a pon d'doute tchi lus y r'connaîssent car il' ont a travailli a l'înjuthe du temps comme au bieau solé. Quant a mé, quand j'sis en Jèrri j'mé fie pus sus la prédiction du Docteu Fraînque Le Maistre qué sus la prédiction du Bureau Météorologique ou d'la gâzette. Combein d'fais qué j'lî' ai dit qu' ch'est li tchi dév'thait êt' à la tête dé chu bureau-la! I' n'y'a pas d'doute qué les gens tchi sont accouôteunmés a travailli la tèrre lus r'connaîssent mus a predithe lé temps qué la machinn'nie météorologique.
Viyiz étout: