À Portinfé,
Saint Ou.
Moussieu l'Editeu,
Agniet, la Merrienne et mé, j'nos trouvons parmi les enfuntchis, ch'est à dithe que j'n'savons pas trop bein ouèsque j'en sommes, et tout à cause dé chutte fichue êlection pour Sénateurs.
Pour vos dithe, j'avais 'té faithe une touônée vendrédi. J'sortis à djais heuthes et d'mie et je r'vins trais heuthes pûs tard, ayant 'tait à Saint Piêrre, ichin à Saint Ou, à Saint Mathie, à Saint Jean, la Trin'té et finissant à Saint Martin. J'n'fus pas à Saint Louothains, car la Merrienne m'avait dit que ch'n'tait pas la peine, car les seuls candidats tch'éthaient des vouaix là 'taient Hedley Maillard et Bill Perchard. S'oulle avait yeu raison, le r'sultat éthait 'té bein difféthant, mais, comme bein d'autres, ou s'trompait hardi.
Partout je pôsais des tchestchions à d's amins, lûs d'mandant tchèsque éthait l'pûs d'vouaix, mais quand je r'vins, tout ch'que j'pus dithe à la bouonnefemme ch'tait que l'John Le Mèrquand 'tait seux de v'nin l'preunmyi, et que l'Peter Crill et l'Sieur Farley n'en s'saient pas lien, ni l'Bill Perchard ni n'tout. Tout 'tait bein trantchille partout, et j'qu'menchi à douter si la Campagne s'en allait dêshaller comme oulle éthait deu. J'n'ai pas besoin d'vos dithe, Moussieu, car ou-s-avez veu les chiffres dans la gâzette qu'une bouonne maintchi n'se gênit pas d'aller voter, et j'crais que ch'est une fichue honte. Des gens tchi n'votent pas dév'thaient perdre lûs vouaix.
Mais à ch'teu, Moussieu, i' faut que j'vos diche tchèsqu'i' nos apportit les nouvelles sam'di matin. J'fûmes nos couochi d'vant djais heuthes, car j'tais lâssé après ma touônée du matin, quand j'n'avais yeu qu'une p'tite fais à bèthe à l'hôtel au Sieur Gueno à Sainte Mathie. La Merrienne s'êbaillyait à châque minute et, don, j'décidimes de ramonter et d'arrêter pour le r'sultat jusqu'au préchain matin.
J'dormaimes comme des princes quand, siez heuthes ayant à peine sonné, j'fus rêvillyi par un brit à la porte comme si nou 'tait à la capuchi avec un marté. Je d'vallis après aver mint mes braies et man 'jacket' et, bon! ch'tait la Bella toute excitée et pathaissant à maintchi folle. Ou 'tait en chabots, sûs sa tête oulle avait un chapé qu'un chiquetchi n'éthait pas donné deux liards pour, et oulle avait mint la grande câsaque à s'n homme contre la fraid. La Merrienne m'asseûthit après qu'ou fut horte que sinon pour sa qu'minsôle, ou n'avait rein d'autre sûs l'co, ni corset, ni cotillions, ni rein!
Oulle explitchi tout d'suite qu'ou n'avait pas dormi d'niet, voulant saver tchèsqu'i' s'était arrivé, et qu'ou 'tait v'nue au pûs vite nos donner les nouvelles, car, la pouôre achocre, ou 'tait seuze que j'n'avions pas dormi ni-n 'tout, et quand ou nos nommit les quatre tch'avaient 'té êlus, ou r'fichit san camp pour aller rêvillyi l'vaisiné. Vraiement, Moussieu, il en affole à tout âge, même parmi les mèthes dé famille!
J'eûmes lé temps de méditer sûs chein qu'ou nos avait dit, et j'vinmes touos les deux à la meme conclûsion, que, à l'exception d'la p'tite pâraisse de Saint Mathie, pas une seule des pâraisses de Campagne avait fait san d'vé. J'avais dit la s'maine pâssée que l'Hedley Maillard et l'Bill Perchard avaient une grande chance s'i' 'taient supportés comme i' faut dans la Campagne, mais j'avais mes doutes à ch't' êgard-là. A ma veue les Recteurs dév'thaient aver un service de penitence pour la mâjorité d'lûs pâraissiens.
Pour les raisons tch'ont contribué ès surprinses que nous a yeu, la preunmièthe j'ai dêjà éxplitchi: mais y'en a d'autres. Nou savait du tout qu'mench'ment que chein tchi sauvethait lé Sénateur Krichefski ch'tait la Ville et des pâraisses comme Saint Brélade et Saint Sauveux, mais nou savait étout que si la Campagne dêshallait en mâsse, oulle éthait une mâjorité suffisante pour contre-balanchi autchune chose que les trais pâraisses que j'ai nommé pouôrrait faithe. Eh bein, la maintchi d'nos campagnards ne bougites pas et à ch'teu tch'ils ont yeu l'temps d'y penser un mio, je n'doute pas que y'en a hardi tchi voudraient aver 'tait mettre lûs crouaix sûs la forme pour aidgi à un bouon Campagnard.
Lé Peter Crill eut la bouonne idée d'envier une lettre à touos l's êlecteurs. Chounna li couôtit tchiques hèrpins, sans doute, mais étout li gâgnit des chents vouaix. J'si content tchi fit si bein, car ch'est un raide bouon corps et bein capablye, chein tchi n'est pas êtonnant viyant que san grand-pèthe, du bord de sa charmante mèthe, 'tait man couôsin germain.
Le Sieur Farley étout print des m'suthes dé bouonne heuthe pour gâgni du support. Dans ses discours, même à la Preunmiée Tour, i' 'tait directe et absolument franc. Si y'a une chose tchi n'li manque pas, ch'est du couothage, une qualité que l's êlecteurs ont tréjous admithé. Y'a siez s'maines i' n'avait pas une chance, mais i' y'est v'nu quand-même , et i' faut l'féliciter.
J'éthais 'te pûs content si l'Bill Perchard l'avait battu, mais pour un homme sans autchune expéthience des Etats, lé Bill fit raide bein, et, sans autchune doute, i' s'trouv'tha dans l's Etats d'vant long. Nou dit tchi s'en va être candidat pour Député en Ville lé préchain mais. Y'a hardi d'fèrmiers dans l'Mont au Prêtre et deux autres vingtaines, et i' dév'thait ramâsser assez d'vouaix pour y v'nin chutte fais.
Hedley Maillard n'éthait pas perdu si l'terme avait té pour trais ans, et la même chose s'applique au Sieur Norman. Hardi d'êlecteurs trouvaient chais deux Mêssieurs un mio vièr pour une terme de neuf ans, mais, quand à mé je n'peux pas l'vaie, et après tout lûs expéthience éthait 'té bein utile. J'crais que Hedley, en partitchulyi methitait mûs du publyi.
A ch'teu, Moussieu, ou voudraient saver, sans doute, tchèsqu'i' s'en va gâgni l'êlection pour Député ichin le préchain mais. Pour lé moment je n'dis rein, mais i' s'peut que j'éthais hardi à dithe pûs tard. A bétôt!
PH'LIP
14/11/1960
Viyiz étout: