À Portinfé,
Saint Ou.
Moussieu l'Editeu,
Y'a déjà une volée que j'vos avais écrit au sujet des êlections pour Sénateurs et dernièthement pour Députés, mais après agniet j'n'éthai qu'à vos pâsler des r'sultats, tchi s'sont annoncés vendrédi tchi veint, quand nou sétha tchèsqu'a réussi et tchèsqu'a perdu.
La grande surprînse dans la Campagne ch'est que y'étha deux candidats à Saint Piêrre, car j'avions tréjous creu la Merrienne et mé, que l'Sieur Simon pouvait s'faithe seux de se r'trouver dans l's Etats sans aver à contester une êlection. Mais ch'n'est pas la preunmiée fais que y'a yeu des surprînses à Saint Piêrre, et sans doute ch'né s'sa pas la draine. J'n'ai autchune idée tchèsque les êlecteurs ont contre lûs présent Député, sinon tch'il a tréjous supporté lé Sénateur Krichefski. Mais y'en a tchi disent étout que l'Chantgni L'Mèrquand, tchi l'oppose, est bein pûs populaithe parmi, le jeune êlément, parsqu'il a tréjous print un gránd intérêt dans lûs activités, tandis que l'Sieur Simon a resté trantchilement siez-li.
J'ai veu deus-trais Saint Piêrrais chais jours, mais quand j'lûs d'mande tchèsqu'i s'en va y v'nin, y'a deux opinions et nou n'sait pas tchi en craithe. La pûs drôle dé chose que nou m'a dit ch'est qu'un certain moussieu, ayant signé l'papi du Sieur Simon, 'tait tout prêt à prendre contre li. J'n'ai pas d'peine à craithe chonna car y'a tréjous yeu d'bein dróles dé gens à Saint Piêrre. J'ai idée d'sauter jusqu'là d'vant diné pour tâchi d'en saver un mio pûs long. Quant à la Merrienne, oulle est pour lé Chantgni L'Mèrquand, car une bordée, y'a p't'être une doûzaine d'années, i' li'avait donné un pâssage dans san car d'la Ville jusqu'ichin. Ou dit que chonna montrait tch'il est un homme de bouon-tchoeu, et qu'ch'est une qualité qu'oulle admithe hardi.
Mais si j'vais jusqu'à Saint Piêrre pour une dém'ieuthe ou d'même ou pouvez vos fier, Moussieu, qu'après chonna j'restithai dans la noblye pâraisse dé Saint Ou, pas lien d'la Salle Pârouaissiale, pour lé restant du jour. Nou dév'thait aver l'résultat au pûs tard à djais heuthes, et malheutheusement la Merrienne ne m'laiss'sa pas tout-seu après huit heuthes ou un p'tit pûs tard quand nou s'mettra à conter les vouaix. J'ai tchiquechose ichin dans une boutelle pour empouaisoné les rats, et j'avais pensé d'li en verser deux d'gouts dans une tâsse dé tais, mais p't'être que ch'est trop ristchi!
En Ville, sam'di j'rencontris yun des grands d'la pâraisse, mais tout ch'qui m'dit ch'tait que l'Mâjeur éthait p't'étre bein pûs d'vouaix que nou n'criyait. Dans san portrait sûs la "Post" le Mâjeur pathaissait dêterminé, mais j'fûmes bein d's'appointés la Merrienne et mé, quand i' n'voulit pas adresser l's êlecteurs, disant tch'il avait déjà explitchi ses principes et tch'i' n'avait pas changi. Nou voudrait, sûs un sens lé r'vaie dans l's Etats, car il est l'seul dé sa sorte, et quand i's'sa hors nou n'en vêrra pas d'autres. Lé Sieur Tchéthée pâslit bein, et l'Ecôssais étout, un charmant moussieu tch'aime Saint Ou et les Saint Ouënnais, et tch'est déjà bein populaithe, mais j'crais tch'il étha ocquo à arrêter pour un siège dans l's Etats.
Pour la Ville? Eh bein, Moussieu, un Avocat qu'ou d'vez connaître a crié ichin en passant, car i' voulait châtchi d'main avec la Merrienne, tch'est souo-disant pathente du bord dé san grand'-pèthe. Ou fut si contente qu'ou déshallit la boutelle qu'ou garde dans l'armouaithe, et i'vos en avalit deux ou trais lachis dans p'tit-d'temps, et éthait sans doute viédgi la boutelle si la bouonne-femme n'avait pas print la pré-caution d'la r'mettre à la clié. Mé, j'en eus un p'tit lèrmin et j'profitis de l'occâsion pour d'mander à notre visiteur tchèsqu'i' pouvait nos dithe au sujet des trais êlections à Saint Hélier.
En qu'menchant, i' dit que hardi des voteurs n'taient pas intérrêssis, et que probablyement la maintchi restéthaient siez-yeux. "Je n'sais vraiement pas tchèsqu'i' faudrait pour révillyi l's êlecteurs d'la pâraisse," i' dit. "I sont prèsque endormis."
Dans l'District Numétho 1 il 'tait seux que l'Député Dupré et l'Sieur Tanguy éthaient pûs qu'assez d'vouaix, mais pour lé restant i'n'pouvait garanti rein. Lé Sieur Hettich pouôrrait y v'nin malgré s'n âge, et l'Député Smale pâslait déjà de chein tch'il avait idée d'faithe dans 1961, mais p't'être tchi s'faisait un mio trop seux.
Dans l'District Numétho 2, les Députés Baal et Troy ne d'vaient pas lûs gêner du-tout, car i' 'taient seux d'réussi. "Bill" Perchard dév'thait v'nin traisième, car i' n'avait pas grand'chose à battre. S'i' pouvait faithe trais ans d'apprentisage et pouvait tch'i' méthitait tchiquechose dé miyeu, nou l'vêrrait sans doute Sénateur pûs tard.
Dans l'traisième District, lé Sieur Venables, tch'avait déjà 'té là pour des années, éthait, sans doute, assez d'support, et l'Mâjeur Blakeway, un homme tchi n'avait jamais yeu peux d'pèrsonne, avait une raide chance, pourvu qu'ses supporteurs travaillaient assez dû. Lé Député McCarthy, étout, avait déjà prouvé tch'i' 'tait un homme bein capablye. Pour lé quatrième, Norman Lé Bro éthait 'té dans l's Etats y'a longtemps s'i' n'tait pas un Communiste. Il éthait des vouaix sans doute, mais pas assez. Ch'tait grand dommage, car i' 'tait bein êdutchi, et, comme nou pouvait vaie par ses lettres dans la "Post", un homme bein intelligent.
Mais, Moussieu, je r'veins tréjous à Saint Ou. Tchèsqu'i' s'en va s'arriver là?
PH'LIP
3/12/1960
Viyiz étout: