Lillie Langtry 'tait p't-êt' la pus belle et fanmeuse des Jèrriaises. Ou fut née à St. Saûveux lé 13 d'Octobre, 1853 et mouothit à Monaco lé 12 dé Févri, 1929.

Ou pâlait l'Jèrriais bein seu. Les gâzettes nos racontent qué quand oulle ouvrit l'Opera House à St. Hélyi en 1900, ou dît tchiques patholes en Jèrriais. Malheutheusement, les gâzettes né nos dîsent pon exactément chein qu'ou dît.

La Gâzette du Sé nos raconte étout qu'ou fit sèrvi l'Jèrriais au Cannada duthant la Preunmié Dgèrre Mondiale à un concèrt (Evening Post 23/12/1916) - ch'est probabl'ye qu'i' y'a d'aut's histouaithes tchi nos dithaient entouor coumme tchi qu'ou pâlait l'Jèrriais. Mais avait-alle murmuthé tchiques mots en Jèrriais à s'n amouotheux, l'Prînce dé Galles? Nou n'saitha janmais!

Ou pâlait l'Jèrriais étout auve John Everett Millais, acouo un Jèrriais, tchi fit san portrait. Chu portrait est ieune des pus fanmeuses înmage dé Lillie et tch'a nom "A Jersey Lily". Ach'teu lé portrait est dans la gal'lie du Mûsée d'Jèrri.

Lillie Langtry fut entèrré dans l'chînmtchiéthe d'l'églyise dé Saint Saûveux où'est qu'san péthe 'tait Recteu quand ou 'tait janne fil'ye.

La stchulptuthe sus sa sépultuthe est hardi belle et est dans l'style Art Déco, est y'a bein dé touristes tchi veinnent vaie lé lieu du drein r'pos du "Jersey Lily".