Les Pages Jèrriaises

Dans mes poummes dé tèrre
sus l'air de "It's a Long Way to Tipperary"


Il arrivit à Londres un jour un vièr St.-Ouennais,
Tchi vénait d'sorti d'Jèrri pour sa toute preunmié fais,
Y'avait tant d'monde sus les pavés tch'i' marchit dans la baue
I' faillit être êcrasé et s'mînt à chanter bein haut:

Comme jé voudrais r'être en Jèrri,
Jé m'pliais bein mus siez nous,
Comme jé voudrais r'être en Jèrri,
Londres n'est pas à man goût.
Gardez vot' Piccadilly
Et vot' Leicester Square.
Pour de mé, j'm'en r'vais bein vite en Jèrri
Dans mes poummes dé tèrre!

Quand les pâssants l'ouïdrent chanter, il' en restîdrent là!
I' n'savaient pon tchi bagoulîn est qu'était chonna!!
Y'en eut bétôt eune racachie arrêtée l'tou d'li,
S'grattant la tête et sé d'mandant: Tch'est janmais qu'i' dit?

Comme jé voudrais r'être en Jèrri,
Jé m'pliais bein mus siez nous,
Comme jé voudrais r'être en Jèrri,
Londres n'est pas à man goût.
Gardez vot' Piccadilly
Et vot' Leicester Square.
Pour de mé, j'm'en r'vais bein vite en Jèrri
Dans mes poummes dé tèrre!

Les tchethtchièrs 'taient touos oblyigis d'arrêter lus j'vaux.
En faisant-i' des sapresti et d'bein pus vilains mots!
Ch'la n'sèrvait d'rein, la foule craîssait à touos les moments
Pilant les iuns l's'aut's pour ouï l'houmme tchi chantait tout l'temps:

Comme jé voudrais r'être en Jèrri,
Jé m'pliais bein mus siez nous,
Comme jé voudrais r'être en Jèrri,
Londres n'est pas à man goût.
Gardez vot' Piccadilly
Et vot' Leicester Square.
Pour de mé, j'm'en r'vais bein vite en Jèrri
Dans mes poummes dé tèrre!

Mais à la fîn, les policeman s'en vîndrent à grands pas.
I' s'fidrent un c'mîn à coups d'bâton en enviant lé monde bas.
Il' arrêtîdrent not' St.-Ouennais tchi s'était mîns à g'noux
L'atchusant d'faithe un attroupement tandi qu'i' 'tait sous.

Comme jé voudrais r'être en Jèrri,
Jé m'pliais bein mus siez nous,
Comme jé voudrais r'être en Jèrri,
Londres n'est pas à man goût.
Gardez vot' Piccadilly
Et vot' Leicester Square.
Pour de mé, j'm'en r'vais bein vite en Jèrri
Dans mes poummes dé tèrre!

Lé pouôrre chanteux n'eût pon persounne à prendre sa part,
Et fut traîné hors dé la vaie sans autchun êgard.
Dans un cachot à la stâtion, i' pâssit la niet,
I' n'a janmais r'sorti d'Jèrri jusqu'au jour d'aniet.

Pour de mé, j'rest'thai en Jèrri,
Jé m'pliais bein mus siez nous,
Pour de mé, j'rest'thai en Jèrri,
Londres n'est pas à man goût.
Gardez vot' Piccadilly
Et vot' Leicester Square.
Pour de mé, j'm'en vais rester en Jèrri
Dans mes poummes dé tèrre!

Elie
1916

 

 

Viyiz étout:

 

Les Pages Jèrriaises