|
J'èrgarde l'êchafaûdage et l'blianc papi, Les vielles stchulptuthes et les vielles estatues. Faut c'menchi, j'ai les créyons appointchis - Monet, li, fît chein qué j'fais... mais bein mus. J'èrgarde les pièrres stchulptées, et les cliochièrs. Man Doue, tchil amas d'saints et d'carres aidgues, Dé tours, dé détails et dé grands pilièrs. Mais Monet fît chein qué j'fais.... mais bein mus. La leunmiéthe est à changi tout lé temps. Faithe un portrait, ma fé, j'vos dis qu'ch'est dû. Les pièrres ensolilyies dé driéthe, dé d'vant - Et Monet vit chein qué j'vai... mais bein mus. Les pièrres sont néthes, nou-fait, i' sont en or! Lé ciel est gris, nou-fait, achteu ch'est bliu! Né v'là des împressions à touos les bords Coumme Monet trouvit... mais i' l'fît bein mus!
Geraint Jennings |
Viyiz étout: