|
Combein qu'i' y'a d'ouothelles siez Picasso? Sus eune fache, nou pouôrrait bein en vaie trais. Lé chein tchi copit s'n ouothelle 'tait Van Gogh (Assa, nou n'fait janmais d'même pus qu'deux fais!) Bellini et Giotto, ieux, sont dé vrai Les grands maît's dé l'Èrnaîssance Italienne; J'admith'thons lus înmages à tout janmais. Mé, j'prîns un photo du cliochi d'Big Ben. La Mona Lisa dé Léonardo S'trouve à Paris. Ichîn étout nou vait Les portraits qu'Monet fit dé ses lis dg'ieau. En vîsitant les mûsées et palais, Nou peut s'prom'ner par les Champs Élysées; Et sus chutte place, où'est qu'les gens lus promènent, La dgilliotinne soulait faithe des têtes tchaie. Mé, j'prîns un photo du cliochi d'Big Ben. Y'en a tchi vont à Madrid au Prado - Et d'aut's tchi vont à Ibiza, ma fé, À seule fîn d'baithe et danser coumme des fos. Ch'est bein cliai tch'est qu'i' sont, ches clobes dé niet Où'est qu'la mûsique sé pompe sans s'arrêter: I' sont des pliaiches dé fanne tchi sont toutes plieines Dé jannes hoummes et hardelles extasiés. Mé, j'prîns un photo du cliochi d'Big Ben. Touristes! V'nez prendre des photos des Jèrriais Et belles Jèrriaises (dans lus bannètes d'îndgienne). Prannez-en du Vièr Châté à Gouôrray. Mé, j'prîns un photo du cliochi d'Big Ben.
Geraint Jennings
|
Viyiz étout: