Iun d'nos fermiers Jerriais qui n'avait jamais ieu l'occasion de sorti d'l'île, vaint justement de r'venin d'Londres ouest qu'il a 'té passer tchinze jours siez un couôsin à li.
Il est r'venu tout êmervillyi de tout chein qu'il a veu dans la grande capitale et i' vint l'aut'e jour à la boutique nos raconter ses aventuthes et ses impressions.
Parmi les choses qui l'frappithent partitchuliéthement était d'abord la grandeu de la ville, car i' s'était imaginé qu'oulle 'tait raique une feis ou deux pus grande que la ville de St. Hélier et il avait fait s'n idée quand i' sorti Jêrri, d'en faithe le tou à pid, car il est hardi porté pour la marche, ayant êtablyi un "record" ichin en allant touchi les douze églyses parouaissiales dans mains d'temps qu'autchun autre piéton qu'en avait fait l'êpreuve.
San couôsin êprouvi à l'dissuader, en li disant qu'il 'tait fo d'entreprendre de tchi qu'était impossiblye.
Mais notre amin était entêté et li dit que rain n'était impossiblye à un homme energique et rêsolu.
Et don un biau matin i' s'mins en route. S'n intention était de garder tréjous dans la même direction jusqu'à qu'i' s'trouvîsse dans la campagne et en continuant san c'min en rondissant, i' finithait par encerclyi Londres et arrivethait à san point de départ.
Mais tchi déception!
Quand la niet tombi et qu'il avait parcouothu une vingtaine de milles, il 'tait absolument rendu par la fatigue et i' d'mandi à un passant tchi distance qu'i' y avait oquo devant que d'trouver la campagne, nou li dit qu'i' y avait oquo au mains une douzaine de milles. chenna l'décidi d'abandonner san projet et i' r'prins la prumié "bus" pour ervenin siez san couôsin. Il est satisfait que la ville de Londres est bain pus grande que la nôtre.
Une contraption qui li êcalli l'y yiers était un jour que san couôsin l'emmeni par le "tube."
I' fallait d'cendre souos terre une certain distance pour prendre le "train" et quand san compagnon ergardi sus l'escalateur en li disant "fait comme mé, saute ichin!" i' failli de s'drotchi. N'étant pas accouôtumé à d'valler des d'grets qui cirtchulaient d'la sorte, i' s'accrochi à san couôsin duthant toute la descante, mais quand vint l'moment pour dêbertchi, i' s'crouâsi les gambes et s'êtraveli sus la piatte-forme au grand amudement des autres voyageurs.
Un jour san couôsin fut li montrer les Maisons de Parlement, l'Abbaye de Westminster, Scotland Yard et tout l'vaisinné de Whitehall.
Quand i' ramontithent Downing Street notre amin fut êtonné d'vaie une foule de deustrais chents personnes sus les pavés et controlées par une djaingue de policemainnes.
I' pensi qu'i' y avait ieu un accident ou tchiquechose comme ch'la mais san couôsin li explitchi que ches gens là attendaient pour vaie certains Membres d'Parlement entrer au Numétho Dgix.
"Et sus tchille accompte, mon doux?" se fit notre Jerriais. "Est-che que ches Angliais-là n'ont pas d'autre chose à faithe? I faut p'tite chose pour les interessi. Peut non s'imaginer une multitude de nos Jerriais attroupés dans l'Vier Marchi dans l'seul but de vaie nos Connaîtablyes et nos Députés entrer dans l's Etats?
Notre amin nos raconte qu'il avait ieu de sérieuses distchussions avec san couôsin sus des tchestions importantes et qu'ils en avaient quâsiment ieu du brit.
I' li dit un jour, quand ils 'taient à dîner, "Vous autres habitants de Londres ous n'avez autchune initiative. Ous imitez Jerri dans tout, même dans la nommethie de vos rues. Ous avez copié notre King Street, Broad Street, Cheapside, Charing Cross, Bond Street et je n'sais combain d'autres. Ous avez même prins l'nôtre pour patron quand ous avez bâti votre Cenotaphe!"
L'autre li raîponni que tout chenna était un tas d'niolin, que ch'tait justement l'contraithe mais notre homme ne vouli jamais admettre chenna.
"Et pis chenna n'est pas tout." Pas pus tard que ches jours quand votre Moussieu Chamberlain se décidi d'aller en Allemagne vaie Hitler, vous, aussi bain comme d'autres pays, en avez fait des êloges dans les gazettes, applaudissant la bouanne idée qu'il avait ieu. Mais tch'est qui lui en donni l'inspithation? Ch'tait oquo Jêrri!
"Oh vraiment?" l'autre se fit, "et comment chenna?"
"Mais tu n'liet pas "Les Chroniques" don? Tu n'savais pas que quand la rumeur se rêpandi que l'Colorado Beetle avait envahi la ville et la grève de St. Malo et était à mangi les ormers sus les Mintchais, ch'était une sérieuse chose pour Jêrri. I' n'y avait pas un moment à perdre! I' fallait bain faithe tchiquechose. I' n's'agissait pas d'aver des conférences et des pourparlers.
Une visite personnelle par des gens haut-pliaichis s'imposait.
Ni l'Bailli, ni l'Protchutheux-Général ne pouvaient y aller, ch'est pourtchi je y envyîmes les préchains en grade, deux des pus importants Inspecteurs de sus l'Weighbridge.
I' sortirent le Dimanche matin et dans l'couothant de deustrais heuthes se rendithent compte de la situation et r'vinrent en Jerri le même jour avec lus rapport.
Le succès de chute dêmarche-là eut un rêtentissement par le monde entchi, avec le rêsultat que dans touos les grands pays quand i' s'êléve une situation critique, la prumié tchestion que nou se d'mande est:
"Tch'est qu'Jêrri f'thait dans les circonstances?"
Caouain
24/9/1938
Viyiz étout: