Té, Dgieu, tu'es man Dgieu, jé t'chèrche tchoeuthûment; j'sis altéthé pouor té, ma chai té d'sithe, dans un pays sé et assitchi où'est qu'i' n'y'a pon dg'ieau. J't'ai veu dans l'sanctuaithe et j'ai contemplié tan pouver et ta glouaithe. Viyant qué t'n amour est miyeu qu'la vie, les lèvres té glorifiéthont. Jé t'louang'geai aussi longtemps qué j'vivthai, et en tan nom jé m'lèv'thai les bras. Jé s'sai rassâsié coumme auve lé pus riche du mangi; atout les lèvres chantantes ma bouoche té louang'gea. Sus man liet jé m'souveins d'té, j'pense à té l'travèrs d'la vil'lie d'la niet. Viyant qu'tu'es m'n aîgue, jé chante à l'ombre dé tes ailes. Jé m'croch'te à té; ta main dêtre mé souôtcheint. Les cheins tchi veulent mé tuer s'sont passecrits, i' d'val'lont ès avanteurs d'la tèrre. I' s'sont d'livrés au sâbre et d'veindront du mangi pouor les dgiatchieaux. Mais l'rouai s'sa rêjoui en Dgieu; touos les cheins tchi juthent par lé Bouôn Dgieu lus en glorifiéthont, quandi qu'les bouoches des menteurs s'sont teues.
Viyiz étout: