Les Pages Jèrriaises

Sieaume 36

S'lon man tchoeu, j'crai qu'lé chein tchi fait du maûvaitchi n'a pon d'crainte l'avant au Seigneu, car i' s'dit, véthe, qué san péché né s'sa pon dêcouvèrt et condamné. Chein qu'i' dit est du maûvaitchi et des menn'ties; il a r'nonchi la sagesse et la beinfaîsance. Au liet i' pense coumme tchi faithe du ma, i' marche avaû un c'mîn tchi n'est pon bouon, i' n'èrfuse pon l'ma. Ta mînséthicorde, oh Seigneu, est ès cieux et ta fidelité monte jusqu'ès nues. Ta justice est coumme les hauts monts, tan jugement d'vale jusqu'à l'avanteu, o Seigneu tu souongne les hoummes et les bêtes. Qu'tén amour est bouon, oh Seigneu! Les êfants d'l'houmme lus abrient souos l'ombre dé tes ailes. I' s'sont combliés des richesses dé ta maîson et tu lus donn'na à béthe dé d'dans la riviéthe dé tes pliaîsièrs. Car ch'est par té tch'est la fontaine d'la vie, et tu'êcliaith'thas not' leunmiéthe. Qu'i' n'y'ait d'fîn ni à t'n amour pouor les cheins tchi t'connaîssent ni à ta justice envèrs les cheins tchi sont honothabl'yes. Qué la vandgîthe né m'trébuque pon, et qu'la main ès malfaîteurs né pique pon bas. Les cheins tchi font la maûvaitchi ont tchée bas là. Il' ont 'té renvèrtchis et n'lus lév'thont d'aut'.

 

Viyiz étout:

 

Les Pages Jèrriaises