Man tchoeu tcheint bouôn, oh Dgieu. Jé chant'tai et f'thai d'la musique atout toute mén âme! Rêvil'-ous, ma hèrpe et ma lythe! J'rêvil'lai l'assinne. Jé t'louang'geai, Seigneu, parmi les peupl'yes! Jé t'chant'tai parmi les nâtions, ch'est en tchi t'n amour est grand, pus haut qu'les cieux, et ta fidélité aveint jusqu'ès nues. Sai louangi, oh Dgieu, au-d'ssus des cieux; qu'ta glouaithe sait sus toute la tèrre! Sauve-nous et aîgue-nous atout ta main dêtre, qu'les cheins qu'tu'aime saient d'livrés. Lé Bouôn Dgieu a pâlé d'san sanctuaithe: "En triomphe j'partag'geai Sichem, et jé m'suth'thai la vallée d'Succoth. Galaad s'sa à mé, et Manassé étout s'sa à mé, et Ephraïm s'sa man helme, Judà man scèpt'. Moab s'sa man bachîn à laver, j'flianqu'thai ma chavette sus Édom. Par sus la Palestinne, j'braithai en triomphe." Tchi qui s'en va m'am'ner à la ville fortifiée? Tchi qui s'en va m'am'ner à Édom? Ch'n'est-i' pon té, Dgieu, tchi nos as achteu réj'té et n'sortithas d'aut' acanté nos armées? Bâle-nous d'l'aîgue contre l'enn'mîn, ch'est en tchi l'aîgue des hoummes né vaut rein. Auve lé Bouôn Dgieu jé gângn'nons la victouaithe, et i' pilonn'na nos enn'mîns.
Viyiz étout: