Tu nos as réj'té, Dgieu, et nos as parféné; tu'as 'té mârri - èrgraie-nous achteu! Tu'as châtchi la tèrre et l'as êtrilyi; èrgraie ses câsseûthes ch'est en tchi ou trembl'ye. Tu'as mouontré à tan peupl'ye lé temps du m'sespé; tu nos as bailli du vîn tchi nos fait craûler. Mais pouor les cheins tchi t'craingnent, tu'as haïsté eune banniéthe à êt' dêfèrlée contré l'ar. Sauve-nous et aîgue-nous atout ta main dêtre, qu'les cheins qu'tu'aime saient d'livrés. Lé Bouôn Dgieu a pâlé d'san sanctuaithe: "En triomphe j'partag'geai Sichem, et jé m'suth'thai la vallée d'Succoth. Galaad s'sa à mé, et Manassé étout s'sa à mé, et Ephraïm s'sa man helme, Judà man scèpt'. Moab s'sa man bachîn à laver, j'flianqu'thai ma chavette sus. Par sus la Palestinne, j'braithai en triomphe." Tchi qui s'en va m'am'ner à la ville fortifiée? Tchi qui s'en va m'am'ner à Édom? Ch'est-i' pon té, Dgieu, tchi nos as achteu réj'té et n'sortithas d'aut' acanté nos armées? Bâle-nous d'l'aîgue contre l'enn'mîn, ch'est en tchi l'aîgue des hoummes né vaut rein. Auve lé Bouôn Dgieu jé gângn'nons la victouaithe, et i' pilonn'na nos enn'mîns.
Viyiz étout: