Alléluia! J'louang'geai l'Seigneu atout tout man tchoeu dans la compangnie des justes et dans l'assembliée. Les faits du Bouôn Dgieu sont grands; i' sont dans l'esprit d'touos les cheins tch'en sont rêjouis. Ses faits, ch'est d'la glouaithe et d'la majesté, et sa justice enduthe à janmais. Il a fait ramémouaither ses mèrvelles; lé Seigneu est grâcieux et mînséthicordgieux. Il a bailli à mangi ès cheins tchi l'craingnent; i' s'souveint dé s'n alliance à janmais. Il a mouontré à san peupl'ye lé pouver d'ses faits, en lus baillant les tèrres d'aut' nâtions. Les faits d'ses mains sont fidèles et justes; touos ses c'mandements sont cèrtains. Il' ont 'té êtablyis à tout janmais, enr'gîstrés dans la fidélité et la raideu. Il a envyé la rédemption à san peupl'ye; il a c'mandé s'n alliance à janmais - san nom est saint et à craindre. La crainte du Seigneu est lé c'menchement d'la sagesse; touos les cheins tchi l'siêthent ont du bouôn sens. À li appartcheint la louange êtèrnelle.
Viyiz étout: