J't'appelle, Seigneu, vein quédaine à mé; ouai-mé quand j't'appelle. Qué ma priéthe sait mîns l'avant à té coumme dé l'enchens, et la lèv'thie d'mes mains sait coumme lé sacrifice du sé. Mets eune garde à ma bouoche, Seigneu, vil'ye sus l'vitchet d'mes lèvres. N'laîsse pon man tchoeu êt' attraîné à chein tch'est du ma dé sorte qué j'prenge part dans du mauvaîtchi acanté ches malfaiteurs; né m'laîsse pon fricoter acanté ieux. Qu'lé juste mé tape - ch'est d'la douocheu; qu'i' m'tanche - ch'est dé l'hielle sus ma tête. Ma tête né la r'fûs'sa pon, ch'est en tchi ma priéthe s'sa acouo contre les faits des malfaiteurs. Lus gouvèrneurs s'sont pitchis bas des falaises, et les mêchants apprendront qu'mes patholes avaient 'té bein pâlées. I' dithont, "Coumme nou touônne et bûche la tèrre, nos os ont té d'même parfénés à la goule dé la fôsse." Mais j't'èrgarde fisquément, Seigneu souvérain; j'm'èrfugie en té - né m'lâque pon à la mort. Garde-mé seûth'tabl'ye des pièges bandés par des malfaiteurs, des lachons qu'il' ont mîns pouor mé. Qu'les mêchants tchaient dans lus drannieaux à ieux, quandi qué j'les pâsse en seûth'té.
Viyiz étout: