Oh Seigneu l'Dgieu d's armées, tchi qu'est fort coumme té, oh Seigneu? Ta fidélité t'entouothe. Tu gouvèrne lé cliapotais et l'boulais d'la mé, quand ou rud'gue, tu l'èrcalme. Tu'êcouochis et gav'lis l'ordgilleuse jusqu'à en mouothi; tu'êtrav'lis t's enn'mîns d'eune cliamûthe. Les cieux sont à té, et la tèrre est à té étout: l'monde et tout chein tch'y'est d'dans - tu l'as grée

Tu'as créé l'nord et l'sud; Thabor et Hèrmon sé rêjouissent en Tan Nom

J'ai trouvé man sèrveux Dâvi; atout m'n onguent bénîn j'lai onguenné; ma main restétha tréjous auprès d'li et man bras l'renforchitha étout.

J'mettrais sa main sus la mé et sa main dêtre sus les riviéthes. I m'crietha, "Tu'es man Péthe, man Dgieu et l'Rotchi d'man salut" J'lé f'thai l'preunmié né, l'pus haut des rouais d'la tèrre.

San lîngnange enduth'tha à tout janmais et san trône s'sa êtablyi l'avant à mé coumme lé solé, et fitchi à tout janmais coumme la leune, un têmouongnage à enduther ès cieux.

D'en par iou, oh Seigneu? T'en vas-tu t'muchi tréjous? Combein acouo qu'ta mârrisson brûl'la coumme un radgîn?