Les Pages Jèrriaises

Sieaume 78

Vèrsets 2-3

J'ouvrithai ma bouoche pouor prêchi eune pathabole; j'dêmuch'chai des vièrs ditons s'grets, dé tchi qu'j'avons ouï et seu, qu'nos anchêtres nos ont raconté.

 

Vèrsets 2-3

J'ouvrithai ma bouoche pouor pâler en pathaboles; j'publiéthai des choses tch'ont 'té ch'lées d'pis la criâtion du monde.

 

Vèrsets 11-16

Il' oublyîdrent chein qu'il avait fait et les mithacl'yes qu'i' lus avait mouontré. L'avant ès ièrs à lus anchêtres il avait accomplyi des mèrvelles dans l'pays d'Êgypte et dans les clios d'Zohan. I' s'pathit la mé et les laîssit pâsser l'travèrs, et il amouoch'lit l's ieaux. Dé jour i' les m'nit atout un nouage et toute la niet atout eune veue d'fliambe. I' cratchit des rotchièrs dans lé d'sèrt et lus baillit à baithe coumme ch'tait d'l'avanteu. I' halit des dous du rotchi et fit vèrser l's ieaux ava coumme des riviéthes.

 

Vèrsets 39-40

I' s'ramembrait qu'i' 'taient raîque d'la chai, un co d'vent tch'est soûfflié et tchi n'est janmais r'soûfflié. Combein d'fais qu'i' lus r'bînfraient contre li dans lé d'sèrt et lus pliaingnaient d'li dans les fîns fonds pèrdus?

 

Vèrsets 45-46

Il lus envyit des divèrs êtchèrbots pouor les tâsser, et des raînottes pouor l's achouêmi. I' baillit lus avoût ès carpéleuses et lus gângne ès critchets.

 

Vèrsets 47-48

Il êg'dachit lus vîngnes atout d'la grile et lus sycomôres atout d'l'aubegélée; il achouêmit lus bestchias atout d'la grile et lus troupieaux atout d's êparts dé feu.

 

Viyiz étout:

 

Les Pages Jèrriaises