Vous les gouvèrneurs, pâl'-ous auve d'la justice? Jug'-ous les gens auve du fèrre-pliaie? Nânnîn, dans vot' tchoeu ou pliannez d'l'înjustice, et vos mains font du combat sus la tèrre. Même dé lus naîssance les malîns vont d'travèrs; d'la bielle i' sont pèrvèrs et êcliandrent. Lus v'lîn est coumme lé v'lîn d'un sèrpent, coumme lé chein d'eune tchilieuvre à capuchon tch'a êtoupé ses ouïes, tchi n'êcout'ta pon la mélodie d'l'entchéthaûdeux, en d'pit d'l'ajet du charmeux. Bûche les dents dans lus bouoches, oh Dgieu; Seigneu, êraiche les cros d'ches lions! Qu'i' dispathaîssent coumme dé l'ieau tchi dêpense; quand i' bandent lus ars, qu'lus èrchelles n'adèrchissent pon. Qu'i' saient coumme eune lînmache tchi s'fond coumme ou va, coumme un avouorton tchi n'vait janmais l'solé. D'vant qué vos pots aient senti la caleu d's êpîngnes - s'i' sont vèrtes ou secques - les malîns s'sont brîngis hors. Les justes es'sont heutheurs quand i' s'sont r'vengis, quand i' tremp'thont lus pids dans l'sang des malîns. Épis l'monde dithont, "Véthe, les justes éthont tréjous lus rêcompense; véthe y'a un Dgieu tchi juge la tèrre."
Viyiz étout: