Jé chant'tai dé t'n amour et d'ta justice; jé t'chant'tai des louanges, Seigneu. J'prendrai souain dé m'ner eune vie sans faute - quand tchi qu'tu veindras à mé? J'mèn'nai l's affaithes dé ma maîson auve un tchoeu sans faute. Jé n'èrgardéthai pon d'un bouôn yi chein tch'est bas. J'déteste chein qu'i' font, l's înfidèles; j'm'en cârr'rai. Les pèrvèrs dé tchoeu s'sont au liain d'mé; j'n'éthai rein à faithe auve chein tch'est du ma; autchun tch'êcliandre san vaîthîn en s'gret, jé l'taithai; autchun tch'a un r'gard ordgilleux et un tchoeu haûtain, jé n'lé toléth'thai pon. Mes ièrs s'sont sus les fidèles dans l'pays, qu'i' d'meuthent auve mé. Lé chein tchi va sans faute mé sèrvitha. Fis d'âme tchi pratique la menn'tie né d'meuth'tha siez mé; fis d'âme tchi pâle faussement né s'mât'ta dans ma présence. Châque matîn j'taithai touos les malîns dans l'pays; j'cop'thai châque malfaiteux hors d'la ville du Seigneu.
Viyiz étout: