Quand, l'Samedi, nou z'est en ville
Tch'est qui, d'un coup d'main habile,
Plie la Gazette d'la famille?
Mess Bisson!

Tch'est qui châque de main ov tous,
Et qui s'prête à touos les goûts,
Et fait la beinv'nue, tréjous?
Mess Bisson!

Tch'est qui tend sa boête à s'no
Quand nou z'en a dêjà trop
Et disant : "Ocouothe un mio?"
Mess Bisson!

Tch'est qui vos fournis d'papi,
D'encre et d'crayons au pliaîsi
Et vos l'vend à bouan marchi?
Mess Bisson!

Au matin nou z'entend
Tout l'combat d'lus Parlement,
Tch'est qu'est tréjous l'Président?
Mess Bisson!

Tch'est qu'est prêt à distchutter
Touos les points d'matin à ser
- Mais sans s'laissi emporter?
Mess Bisson!

Tch'est qu'est tréjous bein heutheux
D'exposer, sus san compteux,
Tout ché qu'est pus ou mains tchuthieux?
Mess Bisson!

Tch'est qui va touos les matins
Se proum'ner par les p'tits qu'mins
Admithant les biaux gardins?
Mess Bisson!

Tch'est qui, dès qu'il est r'venu,
En êcrit vite un p'tit bu
Bein asseuthè qu'i' s'sa lu?
Mess Bisson!

Tch'est qu'êcrit qu'Moussieu' Langliais
- De "Plaisance" je cré qu'il est -
A tant d'begonias parfaits?
Mess Bisson!

Tch'est qui va d'un pas pressi,
Traversant le Vièr Marchi,
Ov touos ses c'ats souentre li?
Mess Bisson!

Tch'est qui fliatte san gros Prêtro
Et qui l'nouorris - quâsi trop -
Ov d'la bouanne soupe de mancho'?
Mess Bisson!

Tch'est qui, ov un p'tit pann'yi,
Braies 'r'troussèes, va dans l'rotchi
Pour ses chièrs c'ats baînitchi?
Mess Bisson!

Tch'est qui n'va jamais au ser
Ouïr Pierrots ou Coons chanter,
Mais qu'aime ouïr les mêles sufflier?
Mess Bisson!

Tch'est qui n'va jamais lunchi -
A la Poumme quand veint l'Samedi
Mais qui s'pliaît bein mus siez li?
Mess Bisson!

Tch'est qui n'va pon es concerts,
Bals, bazars et grands dînièrs
Ov des gens qui sont trop fièrs?
Mess Bisson!

Quand les fruits sont meûx et v'nus
Et qu'les Vignes ont du verjus,
Tch'est qui l's'apprécie le pus?
Mess Bisson!

Tch'est qu'aime assez san Jerry
Pour n'aller pon hors pays
Es Casinos s'appauvri?
Mess Bisson!

Tch'est qui n'aime pas les morgaches,
Ni les gens à doubl'ye fache,
Ni l's'esprits songeux qui s'cachent?
Mess Bisson!

Tch'est qui n'tcheint pon à l'anglais,
Mais qu'aime mus notr' vièr jerriais
Ou même notr' failli français?
Mess Bisson!

Tch'est qu'est paisibl'ye entre tous,
Et qui u'dispute pon les goûts,
Mais veur s'acc'moder tréjous?
Mess Bisson!

Tch'est qui m'a permins, enfin,
De pâler d'li d'même ichin,
Et qui rit d'tout man gniolin?
Mess Bisson!
 

ELIE