En Allemangne.
Lé 20 d'août, 1966.
Moussieu l'Rédacteu,
"J'sis lâssé, à ces sé," Papa nouos dit eune séthée auprès l'thée à La Forge ès Landes à St. Ouën y'a septante ans. "À l'entèrrement du bouanhomme Pièrre Le Règl'ye, j'avons marchi d'Gros Nez à la Grande Églyise - tout l'long du c'mîn - et j'tais iun des porteurs. Lé bouanhomme n'avait pon dé n'veurs."
"Mais, av'ous porté à bras d'la maison à l'églyise?", Manman lî d'mandit.
"Oui dgia," Papa lî dit.
"Combein d'fais qu'ou-s avez changi d'porteurs?", Manman lî d'mandit.
"Eh bein," Papa lî dit, "Arrêtes qué j'caltchule; la preunmié portée 'tait d'Gros Nez jusqu'auprès d'siez nouot' vaîsîn Bram Le Ruez. Ch'tait l'Sieur Ph'lippe Le Feuvre, dé La Fontaine, tchi faîsait l'entèrrement. Arrivés près d'siez l'vaîsîn Bram, il a mîns les scabelles en pliaiche et j'avons pôsé l'côffre d'ssus et changi d'porteurs. J'tais iun du preunmié lot, et j't'asseûthe qué j'tais content quand j'ai dêvié la sèrviette du tou d'man pouangnet et qu'j'ai peut r'pôser man bras!"
"Lé deuxième lot d'porteurs ont porté jusqu'ès Chîn' Verges, et'j'avons r'prîns l'côffre dans l'carrefour et porté jusqu'auprès d'la forge à Ouoyamme Farrell à Grantez, et l'deuxième lot ont porté d'là jusqu'à l'églyise. Lé pouorre bouanhomme Le Règl'ye, tch'est mort d'eune êtropisie, né p'sait dêjà pas mal dans san vivant, êtant un homme dé siex pids deux, ch'est en tchi tu n'as qu'à d'mander si san côffre 'tait p'sant à porter. J'sai bein qu'j'en avais pliein mes braies, mé! J'ai souvent pensé qué l's entrépraneurs d'entèrrements dév'thaient înventer tchique sorte d'strappe atout des hangnes ès buts pour porter un côffre, à la pliaiche dé vier les buts d'eune sèrviette lé tou du pouangnet."
"Mais pour tch'est tch'i' n'ont pon ieu la hèrse?", Manman dit à Papa. "Est-che tch'il' 'taient trop pauvres pour payi pour?"
"Ah Man Doue nannin!", Papa lî dit. "Lé bouanhomme avait des rentes. Il a laîssi sa bouannefemme assez confortabl'ye pour ses vièrs jours. Oulle apprèche dé huiptante. Mais il avait tréjous dit tch'i' n'voulait pon êt' porté au chînm'tchièthe par des j'vaux, et la bouannefemme a voulut donner êffet à san drein d'si. Faut dithe qué j'sis dé ch't avis-là étout, mé. Man d'si est d'êt' porté à bras au chinm'tchièthe par nouos vaîthîns -si n'y a pon assez dé n'veurs - quand j'm'en îthai au r'pos êtèrnel."
"Tch'est tch'i' 'tait l's aut' porteurs auve té?", Manman dit à Papa.
"Eh bein," Papa lî dit. "Y'avait Bram Le Ruez, Dardo L'Cornu, Fraînque Coutanche, Elie Maugi, Ph'lippe Hubert et nouot' fréthe Charles. Lé deuxième lot 'taient Charles Vibert, d'La Ville la Bas, nouos couôsîns Douard et Fraînque Le Feuvre dé Gros Nez, Fraînque et Ph'lippe Hamon d'Portinfer, et Douard Maugi."
"Quant à mé," Manman nouos dit, "Jé n'voudrais pon donner tant d'embarras pour êt' portée au sépulcre. Les j'vaux sont des créatuthes qué l'Bouan Dgieu nouos a donné pour nouos aîdgi à gangni nouot' pain et gabather à travers dé la vie sus chutte tèrre, et jé s'sai bein contente dé l's aver à m'porter a ma dreine démeuthe. Quant à la hèrse: jé n'voudrais pon qu'les cheins tchi restent éthaient à payi pour aver la cheinne tch'a des côtés en vèrre et toutes les plieunmes sus l'haut, à m'porter. Oulle en a trais ou quatre dé châque côté sus l'haut, d'ches plieunmes, et quand oulle est faite sèrvi, les j'vaux en ont sus l'haut d'la tête étout, et l'entèrrement couôte bein pus."
"Eh bein, Ann," Papa lî dit, "J'espèthe qué chu jour-là est bein liain d'ichîn, et qué j'né s'sai pon là mé-même pour l'occasion!"
"Av'ious des cipres, à l'entèrrement du bouanhomme Le Règl'ye?", Manman dit à Papa.
"Oui dgia!", Papa li dit. "J'avions tout ch'tchi fallait pour un entèrrement conv'nabl'ye au rang du défunt. À la maîson y'avait des rafraîchissements sus la p'tite tabl'ye dans l'allée auprès d'la grand' porte. Y'avait d'l'ieau d'vie pour les cheins tch'en voulaient, du vîn et des galettes, et d'la gâche d'entèrrement. Lé côffre 'tait sus des scabelles dans l'aître à liet, et les gens ont 'té învités à payi lus drein respect et vaie l'défunt dévant mett' lé couvercl'ye d'ssus. L'entrépraneux a donné des gants et des cipres à tout l'monde dans l'parleux dévant sorti d'la maîson."
"Lé défunt dans san côffre a sorti d'la maîson les pids l'avant. Tu connais bein la vielle crianche tch'i' faut qu'ché s'sait d'même pour empêchi l'défunt d'vaie sa maîson et pouver r'trouver san c'mîn comme èrvénant! Ch'est drôle comme les vielles crianches continuent, même dé nouos jours quand j'avons l'avis d'saver qu'les morts né peuvent pon vaie! Dans l'églyise lé défunt est tréjous pôsé dans l'tchoeur en d'vant d'l'Autel - les pids à l'Autel. Ch'est pour vaie l'Autel, où-est qué l'Sacrement s'èrpose et qué l'minnistre prononce la bénédiction, quand i' réssuscit'ta des morts. Mais, ch'est l'contraithe quand ch'est l'corps d'un Ministre (appellé l'prêtre lé temps passé). Il est pôsé la tête à l'Autel pour tch'i' fache sa congrégation et piêsse prononcer la bénédiction quand i' réssuscit'ta!"
George d'La Forge
Viyiz étout: