Tch'est qu'a l'pé niêr coumme est l'jais,
Long et doux coumme est la souaie?
Prêtro!

Tch'est qu'est gras coumme un patè
A forche d'supper du lait?
Prêtro!

Tch'est qui ronfl'ye tout autant
Evill'yi coumme en dormant?
Prêtro!

Tch'est qui s'respecte bein trop
Pour faithe autchun tort ou dro?
Prêtro!

Tch'est qu'aime à faithe à san goût
Et qui n'sièd pon l's'autr's matous?
Prêtro!

Tch'est qui r'connaît ses amins
Et n'lus montre pas ses grins?
Prètro!

Tch'est qui, dès qu'i' vait des tchans,
Couort au galop par dedans?
Prêtro!

Quand san maître est à s'cauffer
Tch'est qui va l'long d'li s'frotter?
Prêtro!

Quand souothis sort de san creux
Tch'est qui dort, vilain plièrcheux?
Prêtro.

Quand j'ouait des cats touos les sièrs,
Tch'est qui manque à lus concerts?
Prêtro!

Quoi qu'i' s'sait bein gros et grand
Tch'est qu'est sans femme et êfant?
Prêtro!

D'héthitchièthe ou d'héthitchi,
Tch'est qui n'n'étha, jamais? Tchi?
Prêtro.

Bieau qu'je l'mette en poésie
Tch'est qui mains qu'tous s'en soucie?
Prêtro!

Tch'est qui s'sait bon, transformè
En un lapin êtuivé?
Prêtro!

Elie.