Un r'cit du jeu comme il 'tait joué par man fréthe Frainque et mé siez Papa à La Forge, ès Landes, à St. Ouën, 'l'y'a souaixante ans.
Lé tireli est un rond but d'bouais, à bein près un pouce et d'mi d'dgiamètre et dans les sept pouces dé long, auve les buts appointchis sus eune londgeu d'pouce et d'mi, pus ou mains, à v'nîn à un d'mié pouce dé dgiamètre au but. S'il 'tait trop appointchi, lé bâton bûch'chait l'but trop vite et trop souvent.
Lé bâton dévthait êt' rond étout, et d'la même grôsseu qué l'tireli et dans les deux pids et d'mi d'londgeu.
Lé chein tchi pique ou envyie l'tireli est appelé lé pitcheux.
Lé chein tchi mannyie l'bâton est appelé lé bâtonnyi, lé pranneux ou l'chein tchi prend.
Nou peut jouer au tireli dans l'bel, dans la cache, dans la route, ou même dans un clios si la tèrre est duthe assez pouor qué nou piêsse mèrtchi et vaie l'cârré et la mèrque du pitcheux.
I' faut mèrtchi un cârré (ou un bêlong) là où'est qu' nou s'en va jouer, dans les deux pids et d'mi cârré - la londgeu du bâton. Les quat' bords du cârré dévthaient tréjous êt' dé la même londgeu qué l'bâton.
A eune douzaine dé marches du cârré nou fait eune longue mèrque. Ch'est la mèrque du pitcheux.
I' faut "patter" pouor dêtèrminner tch'est tchi s'en va êt' bâtonnyi pouor quémenchi l'jeu, viyant qué l'bâtonnyi a l'avantage dé pouver compter l'preunmyi. Lé jeu peut êt' à autchun nombre dé points, "agréé et accordé à l'amiabl'ye", comme disent les hommes d'affaithes. Chent points est d'amors un bouan jeu.
Un point est accordé pouor châque marche, saut ou engambée qué l'pitcheux prend entre l'cârré et l'tireli en jeu auprès qué l'bâtonnyi a finni ses tapes ou coups.
Un coup est l'action du bâtonnyi quand i' tape atout san bâton sus iun des buts du tireli quand il est bas, pouor lé faithe sauter en l'air. Quand il est en l'air lé bâtonnyi li baille eune aut' ouappe atout san bâton et l'lanche aussi liain comme i peut. La tape sus l'but du tireli et la deuxième tape en l'air comptent comme eune seule tape mais si l'bâtonnyi manque lé tireli en l'air auprès l'aver fait sauter, v'là tchi compte comme eune tape quand même. Et s'i' tape lé tireli quand il est bas sans l'faithe sauter, v'là tchi compte comme eune tape. Et s'i' touche lé tireli atout san bâton par mêsgarde quand il est bas, v'là tchi compte comme eune tape étout.
Dévant c'menchi l'jeu i' faut dêtèrminner lé "hors du ji" du tèrrain et en décider entre sé. Les fôssés, muthâles, ronches, geon et êpinnes sont tréjous considéthées hors du ji viyant qu' nou n'peut pon sauter d'ssus ou d'dans pouor compter marches, sauts ou engambées. Lé tireli tapé par dessus bâtisse, mâsuthe, fôssé ou muthâle est tréjous hors du ji, et l'bâtonnyi tchi l'a tapé là est "hors" étout, et i' change dé pliaiche auve lé pitcheux.
Lé bâtonnyi est "hors" quand i' tape lé tireli hors du ji, et quand l'tireli est pitchi dans l'cârré ou happé en l'air par lé pitcheux, ou quand l'pitcheux saute ses marches, sauts ou engambées dans l'nombre annoncé.
Si l'jeu est joué dans la route ou dans la cache ou autcheune pliaiche êtraite atout fôssés ou muthâles dé châque côté, lé bâtonnyi es'sa pèrmîns dé taper l'tireli dé iun ou l'autre des deux côtés du cârré tchi fache la route ou la cache sus sa londgeu ; et si l'jeu est joué dans un clios ou dans un empliaichement iou qu' l'y'a tout pliein d'run des quat' côtés du cârré, lé bâtonnyi pouôrra taper l'tireli dans toutes directions. D'amors la position d'fôssés, muthâles ou bâtisses aîguent à décider chutte tchestchion d'direction d'jeu, tchi dévthait êt' tréjous décidé entré sé d'vant c'menchi.
Pouor quémenchi l'jeu lé bâtonnyi s'mâte à la carre et endrait la lîngne du cârré du côté d'la mèrque du pitcheux, san bâton en main.
Lé pitcheux s'mâte driéthe sa mèrque, lé but d'sa botte sus la mèrque et l'tireli en main. Il êprouve à pitchi ou env'yer l'tireli en l'air dans l'cârré.
Quand l'bâtonnyi vait l'tireli arriver il a l'drouait dé l'taper en l'air atout san bâton, mais s'i' l'tape v'là tchi compte comme un coup et il a acouo deux coups à faithe si l'tireli tchait hors du cârré sans touchi ès bords; car lé nombre d'coups alloués quand l'pitcheux envyie l'tireli tout à fait hors du cârré est trais coups.
Si l'bâtonnyi est d'avis qu' ch'est à s'n avantage dé n'taper pon l'tireli dévant tch'i' n'tchaie en pliaiche, i' n'a pon bésoin dé l'faithe, et si l'tireli tchait en d'houors du cârré sans touchi les bords v'là tchi lî donne trais coups.
Eune fais l'tireli tapé par le bâtonnyi, lé pitcheux a l'drouait dé happer l'tireli au vol ou en l'air atout ses mains ou à sa braichie, et s'il a la chance dé l'faithe lé bâtonnyi est hors et i' change dé pliaiche auve lé pitcheux.
Si l'tireli est pitchi dans l'cârré, sans touchi ès bords, par le pitcheux, qué l'bâtonnyi ait éprouvé ou pas à l'taper en l'air ou tch'i' l'ait mantchi, lé bâtonnyi est hors et i' change dé pliaiche auve lé pitcheux ; mais n'y'a pon d'points gângnis par pèrsonne.
Si l'tireli a l'malheur dé tchaie dans l'cârré sans touchi ès bords auprès aver 'té tapé par lé bâtonnyi en autchun temps sans l'vouler ou par accident, v'là tchi l'met hors, et i' faut tch'i' change dé pliaiche auve lé pitcheux. Si, en tchiyant dans l'cârré auprès aver 'té tapé, lé tireli touche à iun des bords, v'là tchi hale un coup au bâtonnyi s'il en a pus qu'iun d'restant ; mais s'i' n'en avait qu'iun, il est hors.
Quand l'tireli est pitchi en d'houors du cârré sans touchi ès bords et qué l'bâtonnyi n'l'a pon tapé en l'air (tch'il ait êprouvé à l'faithe ou pas) lé bâtonnyi a drouait à trais aut' coups.
Quand l'tireli est pitchi drait sus san long sus autcheune des quatre lîngnes du cârré, et tch'il est exactément la maintchi en d'houors du cârré et la maîntchi en d'dans, lé bâtonnyi a drouait à un coup d'pus.
Quand l'tireli est pitchi sus autcheune des quat' lîngnes du cârré mais tch'il est pus en d'dans qu'en d'houors, lé bâtonnyi a drouait à un coup d'pus.
Quand l'tireli est pitchi sus autcheune des quat' lîngnes du cârré, mais tch'il est pus en d'houors qu'en d'dans, lé bâtonnyi a drouait à deux coups d'pus.
A châque coup ou tape lé bâtonnyi êprouve à faithe lé tireli aller aussi liain comme i' peut, mais s'i' manque dé l'taper pus liain qué l'pitcheux n'peut sauter ou engamber dans un saut, qué ché s'sait l'rêsultat dé iun, deux ou trais coups, lé bâtonnyi est forchi d'annoncer eune marche, saut ou engambée, et si l'pitcheux peut l'faithe lé bâtonnyi est hors et change dé pliaiche auve lé pitcheux.
Quand l'nombre d'coups pèrmîns est finni, lé bâtonnyi laisse lé tireli là où'est qu' la dreine tape la env'yé, et pis i' d'vinne combein d'marches, sauts ou engambées tch'i' faut pouor couvri la distance entre la partie du cârré la pus près du tireli et l'tireli même, et en annonce ou crie l'nombre au pitcheux. Lé bâtonnyi a l'drouait dé l's éprouver li-même dévant en annoncer l'nombre et pouor êprouver à s'faithe seux qué l'pitcheux n'pouôrra pon l's engamber dans l'nombre annoncé. Il en annonce tréjous tchiques engambées d'mains tch'i' n'crait tch'il en faut. Lé pitcheux a l'drouait d'êprouver trais fais à sauter ou engamber la distance dans l'nombre crié par lé bâtonnyi. I' s'avole et c'menche à sauter l's engambées, la preunmiéthe atout l'but d'sa botte sus la lîngne du cârré la plus près du tireli, et s'i' peut l'faithe i' compte les points pouor li-même et l'bâtonnyi est hors et change dé pliaiche auve li.
Si l'pitcheux n'peut pon sauter ou engamber dans l'nombre annoncé par lé bâtonnyi, lé bâtonnyi compte les points pouor li-même et continnue comme bâtonnyi jusqu'à qué l'pitcheux piêsse lé battre. Lé jeu continnue jusqu'à qu' iun des deux gângne ses chent points, ou aut' nombre d'points accordé entre les deux d'vant c'menchi.
G. F. Le Feuvre
1959
Viyiz: