Les Pages Jèrriaises

Lé bouan vièr temps

Trenton,Michigan, USA.

Lé 17 dé novembre, 1979.

Moussieu l'Rédacteu,

Quand j'vous pâle du bouan vièr temps, ch'est d'l'êpoque dé y'a huiptante ans qué j'pâle. Ch'la s'comprend - dépis qué j'fus né en 1891. J'avais neuf ans quand l'année 1900 s'montrit sus calendri, et j'avais dêjà apprîns tch'i' y'avait telle chose comme la jouaie d'vivre et qué j'tions dans un mèrveilleux monde pliein d'êvènements tch'avaient un âpre întéthêt pour un mousse. Par exemplye, l'învention d'la machinne à deux rouelles et des pédales tchi vouos pèrmettaient d'aller au Haut du Mathais, et même en ville, pus vite qu'à marchi. Lé “train” qué Papa appelait “La carosse tchi va sans j'vaux” allait pus vite qué les j'vaux et les machinnes à pédales. Pour mé, lé mot “progrès” 'tait dêjà sus l'tapis. J'viyais les machinnes à pédales, tch'avaient eune grande reue et eune toute pétite en drièthe (appelées “penny-farthing” en Angliais), rempliaichies par la machinne à deux p'tites reues d'la meme grandeu et tch'était pus seûthetabl'ye et tch'allait pus vite. Dans chu temps-là les stînmes 'taient dêjà à rempliaichi les navithes à vailes. I' m'pathaîssait qué l'êvangile du progrès 'tait d'aller tréjous pus vite. Et pourtant ché n'tait rein à compather au jour d'aniet. I' n'faut pon oublier qué l'moto et l'avion n'avaient pon 'couo fait lus appathence. Un janne d'à ch't heu peut'i' s'înmaginner un monde sans motos et avions?

J'viyais des changements même dans la forge. Des tchéthues en fé c'menchaient à rempliaichi les cheinnes en bouais, et Papa m'avait montré qué nou pouvait endueurchi du fé en l'trempant dans d'ieau ou d'huile quandi tch'il 'tait caud. Mes toutes preunmiéthes împressions d'eune maîson 'taient qu' oulle 'tait couvèrte en glyi, mais par lé temps qu' j'avais neuf ans j'en viyais un tas couvèrtes en tuiles ou en ardouaises. À ch't heu qué j'sis dans mes vièrs jours, j'voudrais pouver r'vivre ches bieaux jours dé ma jannèche, plieins d'întéthêt et d'dêcouvèrtes des mèrvelles dé la vie et d'la jouaie d'vivre.

En r'liêsant les fanmeux bulletîns d'L'Assembliée d'Jèrriais, un pliaîsi qué j'prends d'temps en temps ouaithe qué jé l's ai dêjà lius bein des fais, j'trouve qué d'aut' vièrs Jèrriais pâlaient d'lus vièr temps chent ans d'vant mé!

Eune poésie par Augustus Asplet Le Gros est entouôrre Esthé P'si, native du Mont Capé à St. Ouën. Dans l's envithons d'l'année 1800, Esther nouos dit: “Hélas! Lé bouan vièr temps n'est pus, et où'est tch'est don nouot' vièr Jèrri? Tch'est qu' les bouans vièrs sont tous dév'nus, tchi n'savaient pon chein qu' ch'est qu' l'ordgi? Ah! Qué nous-a dêgénéthé dé chein qu'nou-s-était dans man temps. Lé monde d'à ch't heu est si èl'vé qué nou né r'connaît pus les gens. La tèrre né peut pus les porter, i' faudrait mett' un tapis d'ssus, et quand i' veulent entrer siez vous nou prendrait bein ragrandi l'us!”

Et ou mentionne des bieaux vièrs noms, ioù tch'i' sont, don, ou nouos dit - “Pèrnelle et Collette, Girette, Julianne et Pauline? Mad'lon, Mèrgot, Douoche et Pirette, Judith, Génette et Philippine, touos les Raulîns, touos les Philippots, touos les Benests, Guille et Collas, touos les Drouëts et les Pièrrots? Où'est tch'i' sont tous? Hélas! Hélas!

“Allez d'La Rocque à St. Où, du fond d'La Mouaie jusqu'à Gouôre, chèrchiz dans les racoins partout, ou n'trouvethez pon chein tch'est pâssé - j'en veins toute êmue quand j'y pense, j'en rouogis vraîment quasi d'honte, à chut ordgi i' n'y'a pon dé d'fense. Enfin, châtchun fait pour san compte, mais pour dé mé j'ai ma c'mînsole car jé n'sis pon dé ches gogu'lues comme vous tchi traînez vouos patouolles pour êpousseter d'vant mé les rues.

“Et vous, mêssieux, tchi vouos r'dréchiz commes des cos d'gamme ou des trous d'chours, ou vouos oubliez, m'est avis! Lé monde est touânne à l'arbours - nou n'vèrra pus chein qu' nou-s-a veu - Lé Jacques d'Aubèrt avec sa catte, les j'vaux Tourgis et Jean Cliément et Jean Gouôré et touos ses tchians, la vielle Rabot - la jument. Hélas! Hélas! Lé bouan vièr temps!”

Ch'n'est-i' pon r'mèrquabl'ye tchi'i' y'a deux chents ans qu' Esthé P'si avait des sentîments d'même au sujet du bouan vièr temps d'san temps? Faut-i' qu'la vie en Jèrri ait changi! Et san mention d'la junment Rabot est preuve dé la vieillèche du vièr diton: “Bête comme la junment Rabot tch'avalit san poulain et tchi riait d'sa bêtise!”

S'ou voulez pâsser eune bouanne demi-heuthe en vouos r'pôsant ou pouvez liéthe tout chenna dans “Les Plliantes d'Esthé P'si” dans l'preunmié voleunme des bulletîns d'L'Assembliée d'Jèrriais tchi sont à ch't heu, nou peut dithe, dé mémouaithe respectée.

George d'La Forge
 

Viyiz étout:

 

Les Pages Jèrriaises