Tout au pid des remparts une large et longue allèe
Condit en descendant jusqu'à l'arche d'entrèe;
Et de chaque côtè si de prês nou rgardait
Nou veirrait bein comme est que l'herche y travaillait.
Dans le bèl, des Paulet nou vait les armeuries,
Ichin à lus tout seu, là es Norrys unies.

L'êcusson de Cornish n'en est pas llain netou
Et les crouaix de St.-George sont au haut de la tou:
A deux pllaiches nou vait l'êcusson d'Angleterre
Piqui, - et comme i faut, - sus la pus dure pierre.
A gauche en ramontant se trouve un pîts profond
Dont le gindas se meut par une chanolle en rond;
Pus llain dans la muraille, une pierre mangie
Par les effets du temps, montre presqu'effachie
Une inscription gothique où-est que nou vait le nom,
Quand nouz y rgarde bein de Captaine Harliston.
Devant que vnin au pîts nou rmerque sus sa dêstre
La chapelle St.-George, sans porte ni fenétre;
Ne vouos êtonnez pas qu'ou sait bâtie ainchin,
De l'êtage de haut i' n'reste pas un brin.
Pus haut dans le châté est une autre chapelle,
Bein p'tit d'monde le sait; Ste.-Marie ou s'apelle;
De nouos jours je n'crai pas que nouz y-aille prier,
Mais je me souveins bein de y-aver veu danser:
De sus le tout fins haut nou dêcouvre la France,
Depis le cap Carteret es cllochiers de Coutance,
Où-est qu'un individu, qui s'criyait bein malin,
Se vantait qu'i'pouvait distinguir un fremin;
Mais iun de ses vaisins, tout en châquant la tête,
Dit, "Vere, je l' ouai grimper;" - i' n'était pas trop bête.
Des ruines qui sont là parsemèes à l'entou,
Je vouos dis seulement, visitez les ètou;
Des choses nouz y vait qui ne sont pas trop belles,
Mais qui pour presque tous paraissent fort nouvelles;
Pourtant vla qui-a durè depis bein des chents ans,
Et il en peut ocouo pt'être durer autant.

Ah! s'i pouvait pâler il en airait à dire,
De qui à faire plleurer, de qui à faire rire;
Mais je crains que l'sérieux ne l'emportît sus l'pllaisant,
Qu'il y-eut bein ptit d'risiblle et hardi de touchant:
Peut-être bein ètou qu'en ouiyant quique histouaire
Ou seriez tout marris, tout rempllis de colere:
Car ch'est seux qu'il a veu du mauvais et du bon, .
De la fidélitè, d'la basse trahison,
Depis le temps qu'i fut défendu par des braves
Qui du rouai des Français n'voulaient pon ètre escllaves:
Barentin, Payn, Tourgis, Lempriere et Bras-d'fer,
St.-Martin et Palot, de la Hougue et Augier.
Hastein, Cartret, Artur, d'la Cour, Anley, Corbel,
Souslemont, Laffoley, Nouel, Picot et Pinel; .
Amy, Gaudin, Hardi, Nicole et Le Marquant;
Levesque, De Gruchy, Godel, Neel et Horman;
Syvret, Lengleys, Godfray, Perchard et des Augrés,
Fale, Ahier, Vautier, Renouf, Breton, Grand, Dumaresc,
Denis, Hamon, Le Cras, formaient la compangnie,
Et de plusieurs ocouo nou trouve la lignie.

Le traître de Nanfan s'laissit surprendre au lliet,
Mais le châté fut r'prins par le sieur de Carteret
Ov l'aide à Harliston cmandant la fllotte Angllaise,
Qui s'en vint au secours d'la milice Jerriaise.
Che fut là que pus tard au seigneu de St.-Ou,
Baker et Boutillier voulurent jouer un tou;
Mais l'amour d'une femme pour le chein qui l'mérite
Est capablle de tout; la noblle Marguérite
En donnit une preuve, et même de nouos jours,
Pus d'une femme ainchi dêvouée à ses amours,
A montrè que du sexe ocouo la bontè dure,
Et qu'ou durera tout autant que la nature.
Du jiesteu de Vaughan i'n'reste pas un mers
Ch'est dêja trop que l'nom d'un homme si pervers;
Du règne de Raleigh courte fut la durèe,
Mais que de bein i'fit dans l'couorant d'une annèe.
Ch'est là que l'bouan Auvray est mort et enterré,
Et nou peut veîr la pllaiche où-est qu'i fut dêposè
Dans un coin de la vote de l'ancienne chapelle,
Pas la cheine de Marie, St. George nou l'appele.
Du désouorillli Prynne nou montre le cachot,
Quant à chute partie là pour me j'n'y crai pas trop,
Mais au haut du châtè se trouve ocouo la fnêtre
Quasi toute bouchie, ou ne devrait pas l' être,
Par ioù les Bandinels pour êviter la mort
Que nou lus préparait eurent un tristre sort:
Pour de me je n'sairais les bllamer ni les pllaindre,
Car dans lus situation ils avaient tout à craindre
Du tyran qui pour lors gouverneux de Jerri,
En vrai pirate était sans pitqi ni merci.

Pour pus de deux chents ans i' n'y-a rein qui mérite
D'arrêter l'attention, si che n'est la visite
Que fit en quarante-six la Reine ov sen Albert,
Qui n'vaut pas la peine que nou la mette en vers.

UN ST.-LOUORENCHAIS.