Chutte vielle danse ou ronde 'tait probabliément la pus populaithe dé nouos vielles gens d'aut'fais, bein connu étout en Nouormandie et ailleurs, souos difféthentes vèrsions. Oulle 'tait censée aver 'té dansée en adouothâtion et à l'honneu du dgieu Grec Apollon, souos un louothi. Dithons qué la vielle danse Angliaîche Oranges and lemons es'sait gentiment à y rav'nîn.
I' faut l'méme nombre d'hommes et d'femmes ou fil'yes — iun entr'aut'. I' joingnent les mains en rond, et chantent en dansant:—
Ah! man bieau laurier tchi danse,
Ah! man bieau laurier!
Ah! man bieau laurier tchi danse,
Ah! man bieau laurier!
Eune femme ou d'mouaîthelle est chouaîthie pouor aller s'plianter dans l'mitan du rond, tout l'restant continnuant danser l'tou d'lyi et à chanter:—
Saluez, Mêssieux et Danmes,
Ah! man bieau laurier!
Saluez, Mêssieux et Danmes,
Ah! man bieau laurier!
Ah! la belle, entrez en danse!
Ah! man bieau laurier!
Ah! la belle, entrez en danse!
Ah! man bieau laurier!
La danme fait eune révéthence (un salut) en s'touônnant ès uns ès aut's dé la compangnie tchi dansent sans r'lâche en chantant:—
Faites-nous la révéthence,
Ah! man bieau laurier!
Faites-nous la révéthence,
Ah! man bieau laurier!
La danme continnue,et pis la compangnie chante et danse
Faites lé pot à deux anses . . .
Ah! man bieau laurier!
Faites lé pot à deux anses . . .
Ah! man bieau laurier!
La danseûthe dans l'mitan du rond, faîthant l'pot à deux anses (les poings sus les hanques), auprès un p'tit brîn change d'èrfrain, et tous chantent, ofûche en faîthant l'pot à deux anses étout:—
Gambe en gambe en ma présence . -
Ah! man bieau laurier!
Gambe en gambe en ma présence . -
Ah! man bieau laurier!
Pis la danme joint les mains l'tou d'iun d'ses genouors en lé l'vant, et pis en saûticotant sus l'aut' pid, toute la compangnie souvent en faîthant autant comme, par exempl'ye, à St. Ouain. A ch't heu toute la compangnie salue bein bas lé tou d'la danme du mitan, en chantant:—
Èrlévez-vous dé d'souos la tèrre
Ah! man bieau laurier!
Èrlévez-vous dé d'souos la tèrre
Ah! man bieau laurier!
I' lus r'lèvent, et pis tout en chantant
Prannez l'chein tchi vos èrsembl'ye
Ah! man bieau laurier!
Prannez l'chein tchi vos èrsembl'ye
Ah! man bieau laurier!
La daume chouaîthit un parchonnyi et les deux joingnent les mains dans l'mitan du rond, et tous r'dansent qué d'pus bé, mais en changeant l'chant et à un aut' air.
Entr'embraich'-ous par lé jeu d'amourette,
Entr'embraich'-ous par lé jeu d'amour!
Entr'embraich'-ous par lé jeu d'amourette,
Entr'embraich'-ous par lé jeu d'amour!
tout en s'entr'embraichant, tout pliein, comme dé raiethon! Pis la compangnie chante:—
Entré-tchittez-vous par lé jeu d'amourette,
Entré-tchittez-vous par lé jeu d'amour!
Entré-tchittez-vous par lé jeu d'amourette,
Entré-tchittez-vous par lé jeu d'amour!
La danme laîsse san galant dans l'mitan du rond et r'prend sa pliaiche dans l'rond. La danse r'quémenche, auve un homme dans l'rond. Et lé rêvillon r'va quédaine .
Viyiz étout: