|
Le temps pâset quand un homme avet eun fât d'habits, Il y duthait des anneais, enfein t'chet pour sa vie; Achteu les gennes hommes lus faout deuex fâts tuous l'zans, Eieun pour l'êtet, ieun pour l'hivé, avec des gants. Le temps pâset eune toppeur lus servet Pour péthe et fîs; il tet bein prêzervet Pour baptêmes, enterrements, prendre le deu, et-caetra, Pour allé à l'Egïyse, avec la kâzaque de drap. Mais tchet bein rarement qu'il tet daîshallet, Tchet seulement est grandes fêtes et tet bein ersêrret; Achteu faut castchiètes, des chapieaux de toutes sortes, Eun change pour change pour toutes saisons, des "gaiters" et haoute bottes. Hélas ouè-qu'est l'vier temps qui mettaient des qu'mînzolles En gros byiu molleton qu'étais cauode et bein molles; Quand ils allaient au vraic, et cherchit des baînnis, Des vlicots, et des crabbes pour lus femme et les p'tits. Achteu faut dgiênes, quéminzes bein âmbzeais et bein bianche, "Knickerbockers," cigares, bagues, et souyiers de danse; Eun byieau bâton à croc, montet en argent, Montre et chaîne en or, v'la qui piaît à Maître Jean. Tchet pas d'même, mes bouannes gens, le temps pâset, Pèthe, filles et fils, ils allaient tous au vraic; N'yiavet pas d'embarras à trouvai des galants, Les garçons lus faisaient les doux yeux en r'venant. Y lus entre ergardais, et marchaient douochottement, Ils teais si ênervées, qui grénottais souvent; Lus pouor t'cheur débatter comme eun balanchit, Eun genne homme preins couothage et yieunne il embrachit. Où vint toute horte d'haleine et devint bein êmue, Et bein fièthe en yï même qu'au vrais ou'l était v'nue; Il y fît des caresses et l'y dîs que j'taime bein, Si tu n'peux pas m'rêpondre, êtreins bein du ma main. Achteu chnest pas au vraix qu'les filles trouvent des galants, Chest pus à des partis, des concerts, en s'promenant; Est "Pic-Nics," est Bazaars, en sortant d'la Chapelle, Yiun les filles suivait d'Saint Sauveuex à Carmel. Chu puour genne homme pâset seulement ouprès yieuex, Y'n dîsait pas grand chose seulement bon scoier il tet si nerveuex D'aoutres fais y dîsait "how-de-doo," et l'vêt sans chappé, Les puoures filles grignïyaient tant y criyaïent d'êfondsé. Y s'en rallet siez l'y lâset mais satisfait, Il y penset toute la s'maine, l'Dîmanche y r'quémenchait; Y les pâset, et les rapâset et dicait "fine weader", Les filles qui t'aient paoumées dirent "go with your mother." Le temps pâset y faîzaient de bourdelots et d'bouan soyï, Y mangeaient des pommes de terre avec du aithan rôti; Achteu chest des "oyster patties," des "tarts" des "mince pies", De la 'sweet cake,' des feinnes beurrées, d'la crême "with ice." Et mon doux, il est vrai, chest tout qu'à changi, Pas d'chandelles de jonc, ni d'crâcsais pour villyï; Pas d'jontchièthe ouprès l'âtre pour s'asièthe dans l'hivé, Mais eunne "couch", eunne lampe pour êkyiéthi et êkaouffé. Le temps pâset, les femmes eun bannette lus servet Presque eunne vie enthièthe; il tet ein conservet; Enfein touos lus habits, ils en prenaient grand soin, Y r'faîsaient pour lus filles quand en v'nait l'besoin. Achteu chnest pas d'même, y faut tréjous changit, Les bannettes où chapieaux, nou n'peut jamais finit; Les modes changent si souvent, chest asseais pour ruiné Les siennes qui veulent tréjous les modes imité. Mais, en même temps, y faut bein qu'les gennes gens Lus habillent à la mode et marche avec le temps; Chnest pus l'temps pâset quand eun homme de trente ans, T'net l'dvanté d'sa mêmée quand y viyiait des gens. Et quand y qu'menchit a pensé de s'mathié, Y fallut qu'san pepée la fille allit d'mandé, S'ou voulet le mathié, s'ou voulet l'accepté, Pour le soigni en temps "d'maladie et d'santé." Chnest pas achteu qu'les gennes gens sont si êfrittées, A t'chienze ans y pense pus est filles qu'à lus mêmée; Y lus en faut ieunne à s'promné avec yieuex, Tuous les sieirs si pôsibyï, tchique fais yian a bein deuex. Et bein tchesque qu'il en est, la vie est bein courte, Faut faithe du mus qu'nou peut en suivant la bouanne route; Et faithe autant de bein comme je pouorrons, Car chi qu'mein ichein jamais j'ner pâssons. Achteu, chest versets ichein où yiaizées, Le temps pâset y n'teaient pas compozées. J'vos suoette eun bouan Noué, N'mangîs pas d'trop d'podein. Georgie |
Viyiz étout: