Dévant s'n aller d' chu monde à san Péthe, Jésû disait à ses discipl'yes: "Mé, jé sis la vraie vîngne, et man péthe est l'vingneron. Tout j'ton tch'est en mé, mais tchi n'porte pon d'frit, man péthe lé hale; tout j'ton tchi donne du frit, i' l'arrange, pouor tch'il en donne acouo pus.

Tant qu'à vous, ous êtes dêjà nets et purifiés grâce à la pathole qué j'vouos ai donnée:

D'meuthez en mé, comme mé en vous. Comme lé j'ton né peut dgéthe porter du frit par li-même s'i' né reste pon sus la vîngne, ni vous ni n'tout, si ch'est qu'ou né d'meuthez pas en mé.

Mé, jé sis la vîngne, et vous les j'tons. Lé chein tchi d'meuthe en mé et dans tchi jé d'meuthe, ch'tî-là donne hardi d'frit, car en d'houors dé mé, ou pouvez rein n' faithe.

Si tchitch'un né d'meuthe pas en mé, il est comme un j'ton qué nou-s-a fliantchi hors, et tchi veint à s'tchi. Les j'tons sés, nou les ramâsse, nou les flianque au feu, et i' brûlent.

Si ch'est qu'ou d'meuthez en mé, et qué mes patholes démeuthent en vous, démandez tout ch' qu'ou voudrez, et ou l'éthez.

Chein tchi fait la glouaithe dé man péthe, ch'est qu'ou donniez hardi d'frit: aînchîn, ou s'sez pouor mé des discipl'yes".