Coumme lé Péthe m'a aimé, j'vos ai aimé étout, mé. Séyiz tréjous dans m'n amour.

S'ou gardez mes c'mandements, ou s'sez tréjous dans m'n amour, tout coumme, mé, j'ai gardé les c'mandements d'man Péthe et j'sis tréjous dans S'n amour.

J'vos ai dit ches choses-'chîn à seule fîn qu'ous ayiz ma jouaie tréjous et qu' vot' jouaie sait parfaite.

Né v'chîn man c'mandement: aim'-ous l's iuns et l's aut's, coumme jé vos ai aimé.

I' n'y'a pon d'pus grand amour qué d'donner sa vie pouor ses anmîns.

Ous êtes mes anmîns, s'ou faîtes chein qué j'vos c'mande.

Jé n'vos appelle pus des sèrveurs, pa'ce qué l'sèrveux né comprend pon chein qu'lé maît' est à faithe. J'vos ai app'lé m's anmîns pa'ce qué j'vos ai explyitchi tout chein qu'lé Péthe m'a dit.

Ch'n'est pon qu'ou m'avez chouaîsi, mais mé, j'vos ai chouaîsi; j'vos ai nommé à seule fîn qu'ou vos en alliez faithe craître des frits, des frits tchi s'sont pouor tréjous, et qu'tout chein qu'ous allez d'mander au Péthe en man nom, I' vos l'donne.

Né v'chîn don man c'mandement pouor vous: aim'-ous l's iuns et l's aut's.